ភ្នំពេញ ៖ លោកជំទាវកិត្ដិសង្គហបណ្ឌិត ម៉ែន សំអន ឧបនាយករដ្ឋមន្ដ្រី រដ្ឋមន្ដ្រីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ចបានថ្លែងនូវការអបអរសាទរចំពោះការបើកសម្ពោធជាផ្លូវការរបស់សមាគមសហគ្រិនចិន ជាំងស៊ូនៅក្នុងប្រទេសកម្ពុជាដែលជាប្រទេសមួយកំពុងតែមានការអភិវឌ្ឍន៍យ៉ាងឆាប់រហ័សគួរឲ្យចាប់អារម្មណ៍លើឆាកអន្តរជាតិពិសេសមានសុខសន្តិភាពពេញផ្ទៃប្រទេសតែម្ដងជាកត្តាសំខាន់បំផុត។
លោកជំទាវកិត្តិសង្គហបណ្ឌិតថ្លែងនូវការអបអរសាទរបែបនេះខណៈដែល បានអញ្ជើញជាអធិបតីកិត្តិយស ក្នុងពិធីសម្ពោធជាផ្លូវការសមាគមសហគ្រិនចិន ជាំងស៊ូ នៅកម្ពុជា នៅសណ្ឋាគារ Sofitel Phnom Penh Phokeethra រាជធានីភ្នំពេញ កាលពីរាត្រីថ្ងៃសៅរ៍ ១៤រោច ខែមិគសិរ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី០៥ ខែមករា ឆ្នាំ២០១៩ ចុងសប្ដាហ៍នេះ។
លោកជំទាវកិត្តិសង្គហបណ្ឌិតបានថ្លែងថា ប្រទេសកម្ពុជាបច្ចុប្បន្នក្រោមការដឹកនាំដ៏ត្រឹមត្រូវប្រកបដោយគតិបណ្ឌិតរបស់សម្ដេចអគ្គមហាសេសនាតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជាកម្ពុជា បានដឹកនាំប្រទេសឲ្យមានសុខភាពសន្ដិភាព ឯកភាពទឹកដី និងមានការអភិវឌ្ឍន៍ យ៉ាងខ្លាំងក្លា ក្នុងនោះ ក៏បានបង្កលក្ខណៈងាយស្រួលដល់អ្នកវិនិយោគទុនគ្រប់ប្រភេទដែលមានបំណងចង់បណ្តាក់ទុនវិនិយោគនៅកម្ពុជា។
លោកជំទាវកិត្តិសង្គហបណ្ឌិតបានថ្លែងបន្តថា តាមរយៈសមាគមន៍នេះ ពិតជាមានសារៈសំខាន់ណាស់ សម្រាប់ទាក់ទាញអ្នកវិនិយោគ ពាណិជ្ជករ អាជីវករ និងអ្នកទេសចរណ៍ មកពីខេត្តជាំងស៊ូ ដើម្បីចូលរួមចំណែកក្នុងការអភិវឌ្ឍន៍ សេដ្ឋកិច្ចសង្គមកម្ពុជា ក៏ដូចជារួមចំណែកពង្រឹងពង្រីកមិត្ដភាព កម្ពុជា-ចិន ឲ្យកាន់តែមានភាពជិតស្និទ្ធបន្ថែមទៀតផងដែរ៕
Source: Kampuchea Thmey Daily
0 Comments