សៀមរាប ៖ បទល្មើសនេសាទគ្រប់ប្រភេទ នៅក្នុងឃុំកំពង់ឃ្លាំង និង តំបន់មួយចំនួនទៀត នៃភូមិសាស្ត្រស្រុកសូទ្រនិគម ត្រូវបានគេមើលឃើញថា កំពុងកើតមានយ៉ាងពេញបន្ទុក ប៉ុន្តែគេមិនដែលឃើញមន្ត្រីជំនាញ មន្ត្រីសមត្ថកិច្ចជំនាញចុះទៅបង្ក្រាបសោះឡើយ។ គេបានដាក់ការសង្ស័យថា សមត្ថកិច្ចក្នុងមូលដ្ឋានខាងលើ ទំនងជាទទួលសំណែនពីក្រុមអ្នករកស៊ីបទល្មើសនេសាទទាំងនេះ។
បទល្មើសនេសាទទាំងនោះរួមមាន របាំងលបសាច់អួនក្រឡាញឹក ប្រវែងរាប់រយម៉ែត្រ ដោយប្រើឧបករណ៍បរ និងលបរ៉ូយ៉ាល, របាំងសាច់អួនក្រឡាញឹកព័ទ្ធព្រៃភ្ជិតចាប់ត្រី ប្រវែងរាប់រយម៉ែត្រ ជាច្រើនរបាំង និងមានសម្រាស់រាប់រយដុំទៀត ដែលពួកគេកំពុងចាប់ផ្ដើមសម្រុកចាប់ត្រីយ៉ាងគគ្រឹកគគ្រេង ទាំងកណ្តាលថ្ងៃ ដោយមិនខ្លាចញញើតសមត្ថកិច្ច និងមន្ត្រីជំនាញឡើយ។
ជាងនេះទៅទៀត មានបទល្មើសធំៗមួយចំនួនដូចជា រុញស៊ីប និងអូសយាំងកាវ របស់ជនជាតិវៀតណាម នៅតំបន់ចុងឃ្នៀស បានឆ្មក់មកអូសយ៉ាងរំភើយ នៅតំបន់កំពង់ឃ្លាំង។
ប្រភពពីប្រជានេសាទលក្ខណៈគ្រួសារបានឲ្យដឹងថា ក្រុមល្មើសនេសាទប្រព្រឹត្តិទៅបានយ៉ាងរលូនមិនខ្លាចការចាប់ចងពីមន្ត្រីជំនាញ និងសមត្ថកិច្ចនេះ ដោយសារតែពួកគេបានត្រូវដង ត្រូវផ្លែគ្នាអស់ហើយ ដោយនៅក្នុងឃុំកំពង់ឃ្លាំង មានអ្នករត់ការប្រមូលលុយពីក្រុមល្មើស ទៅឲ្យមន្ត្រីសមត្ថកិច្ចនិងមន្ត្រីពាក់ព័ន្ធគ្រប់លំដាប់ថ្នាក់។
ប្រភពបានឲ្យដឹងទៀតថា បទល្មើសនេសាទ នៅតំបន់នេះ មិនថារដូវប្រាំង ឬរដូវវស្សា មិនថារដូវបិT ឬរដូវបើកនោះទេ គឺមានជាប្រចាំ គ្រាន់តែតិច ឬច្រើនតែប៉ុណ្ណោះ។ អ្នករកស៊ីបទល្មើសមិនមែនចេះតែប្រថុយប្រថានបានទេ មុននឹងចាប់ផ្តើមចេញធ្វើសកម្មភាព ត្រូវទៅជួបជាមួយអ្នករត់ការ ជាមុនសិន ពីព្រោះពួកគេពូកែរត់ការ និងចេះក្បាច់គុn អាចការពារមិនឲ្យសមត្ថកិច្ច ឬមន្ត្រីជំនាញកាប់បំផ្លាញ ឬចាប់ចងបាន។ ប៉ុន្តែក៏ត្រូវជូនលុយយ៉ាងក្រាស់ក្រែលទៅឲ្យគាត់ផងដែរ ទើបគាត់ការពារឲ្យ។
លោក ម៉ក់ ប្រុស អភិបាលស្រុកសូទ្រនិគម បានឲ្យដឹងនៅរសៀលថ្ងៃទី២៤មករា នេះថា បានទទួលស្គាល់ថា នៅក្នុងស្រុក ពិតជាមានបទល្មើសនេសាទកើតឡើងច្រើននៅក្នុងមូលដ្ឋានរបស់លោកមែន ហើយភាគច្រើនមកពីតំបន់ចុងឃ្នៀស និងមកពីស្រុកជីក្រែង។ លោកបន្តថា ចំណែកពលរដ្ឋក្នុងមូលដ្ឋាននេះ មិនសូវមានអ្នករកស៊ីបទល្មើសនេសាទនោះទេ។
លោកបញ្ជាក់ថា នៅក្នុងអង្គប្រជុំ គណៈអភិបាលម្តងៗ លោកតែងតែក្រើនរំលឹកដល់សមត្ថកិច្ចជំនាញដែលពាក់ព័ន្ធ ចាត់វិធានការបង្ក្រាបបទល្មើសឲ្យមានការថយចុះ។ បន្ថែមពីនោះ លោកក៏តែងតែឆ្មក់ចុះបង្ក្រាបជាមួយកងកម្លាំងផងដែរ។
ចំណែកលោកនាយសង្កាត់រដ្ឋបាលជលផលកំពង់ឃ្លាំង មិនអាចសុំការពន្យល់ពីលោកបានទេ នារសៀលថ្ងៃទី២៤មករានេះ ដោយសារទូរស័ព្ទរបស់លោកនៅក្រៅតំបន់សេវា។ ទាក់ទិននឹងករណីនេះដែរ លោក ព្រិន្ទ សាវិន នាយខណ្ឌរដ្ឋបាលជលផល ខេត្តសៀមរាប ក៏មិនអាចទាក់ទងសុំការពន្យល់ពីលោកបានដែរ នារសៀលថ្ងៃទី២៤មករា នេះ។
ទាក់ទិននឹងករណីនេះដែរ មហាជនសង្ឃឹមថា លោក ទៀ សីហា អភិបាលខេត្តសៀមរាប ដែលទើបនិងឡើងកាន់តំណែងថ្មីថ្មោង អាចមានវិធានការយ៉ាងណា បង្ក្រាបបទល្មើសនេសាទនៅតំបន់កំពង់ឃ្លាំង ឲ្យមានថយចុះផង ព្រោះសមត្ថកិច្ចជំនាញមួយចំនួនអាចមានការពាក់ព័ន្ធនឹងបទល្មើសនេសាទទាំងនេះ៕
Source: Kampuchea Thmey Daily
0 Comments