ក្លិបកីឡាបាល់ទាត់វិសាខា សមាជិកពានរង្វាន់លីគកំពូលកម្ពុជា (Metfone Cambodian League 2018) បានរៀបចំកម្មវិធី “សប្បុរសធម៌ ស្ដីពីកីឡាបាល់ទាត់” នៅរសៀលថ្ងៃសៅរ៍ ទី០៥ ខែមករា ឆ្នាំ២០១៩ ថ្មីៗនេះនៅកីឡដ្ឋានខេត្តព្រៃវែង ដោយមានកុមារា-កុមារី និងក្មេងៗ ប្រមាណជិត៣០០នាក់ចូលរួម។
ក្លិបបានបញ្ជាក់ក្រោយរៀបចំកម្មវិធី “សប្បុរសធម៌ ស្ដីពីកីឡាបាល់ទាត់” លើកទី៣ នេះថាគឺបានបញ្ចប់ដោយជោគជ័យ ជាមួយស្នាមញញឹម និងអនុស្សាវរីយ៍ជាច្រើន ដោយមានសិស្សានុសិស្ស និងក្មេងៗជិត៣០០នាក់ មកពីតាមបណ្តាសាលា និងអង្គការក្នុងក្រុងព្រៃវែងចូលរួម កាលពីល្ងាចថ្ងៃទី០៥ ខែមករា ឆ្នាំ២០១៩។ កម្មវិធីនេះ បានធ្វើឡើងក្រោមអធិបតីភាពឯកឧត្តម ស សុខា រដ្ឋលេខាធិការក្រសួងអប់រំ យុវជន និងកីឡា និងជាអនុប្រធានសហភាពសហព័ន្ធយុវជនកម្ពុជា និងលោកជំទាវ កែ សួនសុភី ប្រធានក្លិបកីឡាបាល់ទាត់ វិសាខា, លោក ជា សុមេធី អភិបាលនៃគណៈអភិបាលខេត្តព្រៃវែង និងឯកឧត្តម ខៀវ ភារិទ្ធ តំណាងរាស្ដ្រមណ្ឌល ខេត្តព្រៃវែង និងជាប្រធានសហភាពសហព័ន្ធយុវជនកម្ពុជា-ខេត្តព្រៃវែង។
ក្លិបបានបញ្ជាក់ថា កម្មវិធីនេះរៀបចំឡើង ក្នុងគោលបំណងផ្សារភ្ជាប់សកម្មភាពកីឡា ទៅនឹងការងារសង្គម តាមរយៈការចែករំលែកនូវបច្ចេកទេសបាល់ទាត់ដល់កុមារ និងក្មេងៗ ដោយមានការចូលរួមពីសំណាក់គ្រូបង្វឹក និងកីឡាករទាំងអស់ នៃក្លិបកីឡាបាល់ទាត់វិសាខា ដើម្បីបង្កើននូវភាពស្និទ្ធស្នាល មិត្ដភាព សុខភាព និងបណ្ដុះស្មារតីជាក្រុម ឆ្ពោះទៅរកភាពជោគជ័យ នាថ្ងៃអនាគត។
សូមបញ្ជាក់ថា ថ្មីៗនេះ ថ្នាក់ដឹកនាំក្លឹបវិសាខា បានសម្រេចប្តូរសមាសភាពដឹកនាំថ្មីដោយចាប់ពីរដូវកាលឆ្នាំ២០១៩ តទៅដោយប្រគល់តួនាទីជាប្រធានក្លិបជូនលោកជំទាវ កែ សួនសុភី ស សុខា វិញ ស្របពេលប្រធានក្លិបចាស់ លោកស សុខា មិនមានពេលវេលាគ្រាប់គ្រាន់ដើម្បីដឹកនាំក្លិប ព្រោះលោកកំពុងមមាញឹកជាមួយតំណែងដែលទើបជារដ្ឋលេខាធិការក្រសួងអប់រំ យុវជន និងកីឡា។
ក្រុមវិសាខា បានបង្កើតឡើងពីថ្ងៃទី៥ ខែកុម្ភៈ ឆ្នាំ២០១៧ ក្រោមការឧបត្ថម្ភគាំទ្រពីសំណាក់លោក ស សុខា នៅកាលនោះ។ បច្ចុប្បន្នក្លឹបមានកីឡាករជាង៣០នាក់ ដែលមានលោក ហុក សុចិត្រា អតីតគ្រូបង្វឹកក្រុមជម្រើសជាតិកម្ពុជា ដើរតួធ្វើជាអ្នកចាត់ការទូទៅរបស់ក្រុម ខណៈលោក ហុក សុជីវ័ន ជាប្អូនប្រុសបង្កើតធ្វើជាគ្រូបង្វឹក។ ក្រុមវិសាខា បានបញ្ចប់រដូវកាលចាស់របស់ខ្លួនដោយឈរចំណាត់ថ្នាក់លេខ៣ ក្នុងចំណោមក្លិបជាសមាជិកទាំង១២ ក្រោយប្រកួត២២លើក ឈ្នះបាន១៤លើក ហើយស្មើគ្នា៣លើក និងចាញ់៥លើក។ ចំណែកក្នុងពានរង្វាន់សម្តេចតេជោ ហ៊ុន សែន វិញក្រុមវិសាខា បានធ្លាក់ចេញត្រឹមវគ្គ១៦ក្រុមចុងក្រោយចាញ់ក្រុមព្រះខ័នរាជស្វាយរៀង ២ទល់១៕
Source: Kampuchea Thmey Daily
0 Comments