ការជំរុញរយៈពេលមួយទសវត្សដើម្បីបញ្ឈប់អំពើហិង្សា ដែលបានឆក់យកជីវិតមនុស្សប្រហែល១៥០,០០០នាក់នៅភាគខាងត្បូងប្រទេសហ្វីលីពីនឈានដល់ចំណុចកំពូលនៅថ្ងៃចន្ទជាមួយនឹងការបោះឆ្នោតមួយស្តីពីការផ្តល់ឲ្យជនជាតិភាគតិចមូស្លីមរបស់ប្រទេសនេះ នូវការគ្រប់គ្រងកាន់តែធំធេងលើតំបន់។
ការបោះឆ្នោតនេះគឺជាជំហានចុងក្រោយនៅក្នុងកិច្ចព្រមព្រៀងសន្តិភាពមួយជាមួយក្រុមឧទ្ទាមមូស្លីមធំជាងគេបំផុតរបស់ប្រទេសកាន់សាសនាកាតូលិកភាគច្រើនមួយនេះគឺរណសិរ្សរំដោះឥស្លាម Moro (MILF) ដែលជាកងកម្លាំងដ៏សំខាន់មួយនៅក្នុងការបះបោរបំបែកខ្លួនដែលបានផ្ទុះឡើងចាប់តាំងពីទសវត្សរ៍ឆ្នាំ១៩៧០មក។
ចំណុចស្នូលនៃតំបន់ Bangasmoro ដែលមានទីតាំងស្ថិតនៅលើកោះ Mindanao ភាគខាងត្បូងត្រូវបានគេរំពឹងថានឹងបោះឆ្នោតយ៉ាងច្រើនលើសលុបដើម្បីចូលរួមវា។
អ្នកបោះឆ្នោតប្រហែល២.៨លាននាក់នឹងត្រូវបានឃ្លាំមើលដោយកងកម្លាំងប៉ូលិសនិងទាហានចំនួន២០,០០០នាក់ចំពេលមានការព្រួយបារម្ភថា ក្រុមបះបោរគូប្រជែងអាចប្រើអំពើហឹង្សាដើម្បីព្យាយាមរំខានការបោះឆ្នោត។
ដំណើរការសន្តិភាពបានចាប់ផ្តើមនៅក្នុងទសវត្សរ៍ឆ្នាំ១៩៩០ប៉ុន្តែមិនរាប់បញ្ចូលក្រុមឥស្លាមនិយមដូចជាពួកដែលមានសម្ព័ន្ធភាពជាមួយក្រុមរដ្ឋឥស្លាមដែលក៏សកម្មនៅភាគខាងត្បូងប្រទេសហ្វីលីពីនផងដែរនោះទេ។
រដ្ឋាភិបាលនិង MILF សង្ឃឹមថា តំបន់ Bangasmoro ថ្មីដែលពោរពេញដោយស្ថិរភាពនឹងទាក់ទាញការវិនិយោគទៅកាន់តំបន់នេះ។ ភាពក្រីក្រនិងការបង្ហូរឈាមបានជំរុញឲ្យមានការជ្រើសរើសអ្នកប្រយុទ្ធដោយក្រុមរ៉ាឌីកាល់។
លោកប្រធានាធិបតី Rodrigo Duterte ដែលក៏ជាអ្នកមកពីកោះ Mindanao ផងដែរនោះគឺបានគាំទ្រជាយូរមកហើយចំពោះការបង្កើតតំបន់ស្វយ័តមួយសម្រាប់ប្រជាជនមូស្លីមរបស់កោះនេះ។
ក្រោមលក្ខខណ្ឌនៃច្បាប់ដែលដាក់ចេញអំណាចរបស់តំបន់នេះ, Bangasmoro នឹងទទួលបានទឹកប្រាក់ចំនួន៩៥០លានដុល្លារអាមេរិកនៅក្នុងមូលនិធិអភិវឌ្ឍន៍ក្នុងរយៈពេល១០ឆ្នាំខាងមុខក៏ដូចជាបណ្តុំប្រាក់ចំណូលពន្ធដែលបង្កើតនៅតាមព្រំដែនរបស់ខ្លួនផងដែរ។
រដ្ឋាភិបាលជាតិនឹងគ្រប់គ្រងលើប៉ូលិសបើទោះបីជាថ្នាក់ដឹកនាំនៃតំបន់ស្វយ័តនេះនឹងចូលរួមយ៉ាងជិតស្និទ្ធក្នុងបញ្ហាសន្តិសុខក៏ដោយ។
លទ្ធផលចុងក្រោយត្រូវបានគេរំពឹងថានឹងចេញក្នុងរយៈពេល៤ថ្ងៃក្រោយការបោះឆ្នោត៕ AFP
Source: Kampuchea Thmey Daily
0 Comments