ឧត្តរមានជ័យ ៖ មានករណីរកឃើញសាកសពស្លាប់ក្នុងទឹកអូរ(អូរម៉ាស៊ីនរ៉ៃ) ភូមិអូរតាម៉ូត ឃុំផ្អាវ ស្រុកត្រពាំងប្រាសាទ ខេត្តឧត្តរមានជ័យ។
ក្រោយទទួលដំណឹងនេះ ពីប្រជាពលរដ្ឋនៅវេលាម៉ោង១៧និង៣០នាទី ថ្ងៃទី៦ ខែមករា ឆ្នាំ២០១៩ កម្លាំងជំនាញបានសហការជាមួយលោកស្រី សែម សេម ឋានៈជាអនុប្រធានមណ្ឌលសុខភាពឃុំផ្អាវ និងកម្លាំងប៉ុស្តិ៍រដ្ឋបាលឃុំផ្អាវ បានចុះទៅដល់កន្លែងកើតហេតុនៅម៉ោង១៨និង៣០នាទី ថ្ងៃខែដដែល ដើម្បីធ្វើការពិនិត្យ និងស្រាវជ្រាវ។
សមត្ថកិច្ចបានឲ្យដឹងថា សាកសពជនរងគ្រោះ ឈ្មោះ គួ បាន ភេទប្រុស អាយុ២២ឆ្នាំ មានទីលំនៅភូមិកើតហេតុ។ ប្រពន្ធឈ្មោះ លួន លីន អាយុ២៦ឆ្នាំ មិនទាន់មានកូន។
សមត្ថកិច្ចបានបន្តឲ្យដឹងទៀតថា តាមការប្រមូលព័ត៌មានជុំវិញរឿងហេតុ ៖ យោងតាមការបំភ្លឺរបស់ឈ្មោះ វណ្ណ វឿន ភេទប្រុស ត្រូវជាបងថ្លៃរបស់ជនរងគ្រោះបានឲ្យដឹងថា ជនរងគ្រោះធ្លាប់មានជំងឺប្រកាច់ឆ្កួតជ្រូករយៈពេល៥ឆ្នាំមកហើយ។ កាលពីអំឡុងឆ្នាំ២០១៧ ពេលដែលខ្លួនទៅរកត្រីជាមួយជនរងគ្រោះ និងឈ្មោះម៉ាប់ ត្រូវជាក្មួយរបស់ជនរងគ្រោះ ពេលនោះជនរងគ្រោះធ្លាប់ប្រកាច់ក្នុងទឹកម្ដងរួចមកហើយ តែត្រូវបានខ្លួន និងឈ្មោះ ម៉ាប់ ជួយទាញមកលើគោក ហើយជួយរឹតខ្នង និងដើមទ្រូងបានពីរនាទី ទើបជនរងគ្រោះដឹងខ្លួនមកវិញ។ ក្រោយៗមកទៀត ជនរងគ្រោះធ្លាប់ប្រកាច់ជាច្រើនដង តែបានគេជួយសង្គ្រោះទាន់ពេល ចំពោះការទំនាក់ទំនងសង្គម ជនរងគ្រោះពុំដែលមានការឈ្លោះប្រកែកជាមួយអ្នកណាឡើយ។
ការបំភ្លឺរបស់ ឈ្មោះ យ៉ែម ណាក់ ភេទប្រុស អាយុ២០ឆ្នាំ នៅភូមិកើតហេតុ ត្រូវជាក្មួយជនរងគ្រោះ ក៏បំភ្លឺដូចគ្នា។ រីឯឈ្មោះ សាំ ភឿន ត្រូវជាឪពុកធម៌របស់ជនរងគ្រោះ និងឈ្មោះ លួន លីន ភេទស្រីអាយុ២៦ឆ្នាំ ត្រូវជាប្រពន្ធរបស់ជនរងគ្រោះ សុទ្ធតែបានអះអាងដូចគ្នាថា ជនរងគ្រោះមានជំងឺប្រកាច់ឆ្កួតជ្រូក ពុំដែលមានទំនាស់ជាមួយអ្នកដទៃឡើយកន្លងមក លុះមកដល់ថ្ងៃទី៣ ខែមករា ឆ្នាំ២០១៩ ពេលដែលជនរងគ្រោះមករកត្រីតែម្នាក់ឯង តាំងពីម៉ោង១២ថ្ងៃត្រង់ ហើយមិនឃើញត្រឡប់មកផ្ទះវិញ រហូតថ្ងៃទី០៦មករា ទើបរកឃើញសាកសពតែម្តងទៅ។
សមត្ថកិច្ចបានឲ្យដឹងទៀតថា ការពិនិត្យកន្លែងកើតហេតុ និងសព ពុំមានដានផ្សេងក្រៅពីដានជើងជនរងគ្រោះឡើយ និងពុំមានវត្ថុផ្សេងក្រៅពីកាំបិតដែលជនរងគ្រោះកាន់ពីផ្ទះទៅដែរ។ ស្លាកស្នាមនៅលើខ្លួនប្រាណរបស់សាកសព ពុំមានអ្វីគួរឲ្យសង្ស័យឡើយ។
តាមការសន្និដ្ឋានរបស់សមត្ថកិច្ចបានឲ្យដឹងទៀតថា សាកសព ត្រូវបានស្លាប់ក្នុងរយៈពេល៤ថ្ងៃហើយ អាចបណ្តាលមកពីជំងឺប្រកាច់រើឡើង ត្រូវបានដួលទៅក្នុងទឹកពេលកំពុងរកត្រី ធ្វើឲ្យថប់ដង្ហើមស្លាប់តែម្តង។
ក្រោយពីពិនិត្យចប់សព្វគ្រប់អស់ សមត្ថកិច្ចបានប្រគល់សពឲ្យទៅសាច់ញាតិយកធ្វើបុណ្យតាមប្រពៃណី៕
Source: Kampuchea Thmey Daily
0 Comments