បាត់ដំបង ៖ លោកឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរងកងយោធពលខេមរភូមិន្ទមេបញ្ជាការកងទ័ពជើងគោក មានប្រសាសន៍បែបនេះ នៅក្នុងសិក្ខាសាលាបូកសរុបលទ្ធផលការងារយោធាសន្តិសុខឆ្នាំ២០១៨ និងផ្សព្វផ្សាយផែនការសកម្មភាពការងារយោធាសន្តិសុខឆ្នាំ២០១៩ នៅទីបញ្ជាការយោធភូមិភាគទី៥ ខេត្តបាត់ដំបង កាលពីថ្ងៃពុធ ទី០៩ ខែមករា ឆ្នាំ២០១៩។
ថ្លែងនៅក្នុងពិធីនោះ លោកបានវាយតម្លៃខ្ពស់ចំពោះការខិតខំប្រឹងប្រែងរបស់នាយទាហាន នាយទាហានរង និងពលទាហានគ្រប់អង្គភាពចំណុះឲ្យយោធភូមិភាគទី៥ ដែលបានខិតខំបំពេញភារកិច្ចកន្លងមក និងកំពុងបំពេញភារកិច្ចបច្ចុប្បន្ននិងត្រៀមទៅថ្ងៃអនាគត ដើម្បីបំពេញភារកិច្ចការពារជាតិបូរណភាពទឹកដី សុខសន្តិភាព ជូនប្រជាពលរដ្ឋរបស់យើង។
លោកបន្តថា ដើម្បីថែរក្សាប្រៀបឈ្នះ និងការពារស្ថិរភាពសង្គម ការងារនយោបាយ និងការងារសន្តិសុខ គឺដើរទន្ទឹមគ្នា គឺការប្រមូលកម្លាំងមហាជន ដើម្បីជួយទៅដល់ប្រជាពលរដ្ឋ ដើម្បីឲ្យមហាជនផ្ដល់ជំនឿទៅលើកងទ័ពនិងរាជរដ្ឋាភិបាល ដែលនេះគឺជាការចូលរួមដ៏សំខាន់។
ថ្លែងនៅក្នុងពិធីនោះដែរ លោកឧត្តមសេនីយ៍ឯក ហ៊ុន ម៉ាណែត បានសាទរ និងកោតសរសើរចំពោះអង្គភាពនៅក្នុងយុទ្ធភូមិភាគទី៥ ដែលបានចូលរួមចលនាប្រឡងប្រណាំងក្នុងការពង្រឹងប្រៀបការពារជាតិ និងការត្រៀមលក្ខណៈបំពេញភារកិច្ចជូនជាតិមាតុភូមិរបស់យើង។ ជាមួយនេះ ក៏បានកោតសរសើរចំពោះយោធភូមិភាគទី៥ ក្នុងការងារទំនាក់ទំនងព្រំដែនជាមួយប្រទេសជិតខាងបានល្អ។
ទាក់ទងបញ្ហាព្រំដែន លោកឧត្តមសេនីយ៍ឯក ហ៊ុន ម៉ាណែត បញ្ជាក់ថា គឺជារឿងដែលយើងត្រូវទទួលខុសត្រូវទាំងអស់គ្នា ការការពារទឹកដីត្រូវធ្វើតាមគ្រប់រូបភាពទាំងអស់ មិនមែនរឿងព្រំដែនទាល់តែយើងលើកគ្នាទៅវ៉ៃដូចកាលនៅព្រះវិហារទើបថា ការពារព្រំដែននោះទេ ព្រោះមានរូបភាពច្រើនណាស់ក្នុងការការពារទឹកដី និងការដណ្ដើមប្រៀបឈ្នះ។ ការប្រែក្លាយព្រំដែនពីតំបន់សមរភូមិទៅជាតំបន់មិត្តភាព និងសេដ្ឋកិច្ច គឺយើងត្រូវធ្វើតាមទិសដៅរបស់រាជរដ្ឋាភិបាល ប៉ុន្តែមិនធ្វើអ្វីឲ្យបាត់ប្រៀបនោះទេ ព្រោះរឿងព្រំដែននេះ គឺជារឿងយូរអង្វែង។ ដូច្នេះសូមយកចិត្តទុកដាក់ក្នុងការថែរក្សា និងការឈរជើងរបស់កងកម្លាំងរបស់យើង។
លោកឧត្តមសេនីយ៍ឯក ហ៊ុន ម៉ាណែត អះអាងថា រាជរដ្ឋាភិបាលបានយកចិត្តទុកដាក់នៅក្នុងការងារកំណែទម្រង់ ដើម្បីធ្វើអោយប្រព័ន្ធការងារដើរទៅរលូន និងប្រសិទ្ធភាពនៅក្នុងការដឹកនាំបញ្ជា និងបន្សល់ប្រព័ន្ធការងារនេះទុកឲ្យនាយទាហានជំនាន់ក្រោយ គឺជាគោលដៅរួម និងធានានិរន្តរភាពសម្រាប់កងទ័ព ដែលនេះគឺជាការកសាងគ្រោងឆ្អឹងដ៏រឹងមាំមួយសម្រាប់វិស័យការពារជាតិយូរអង្វែងទៅមុខទៀត៕
Source: Kampuchea Thmey Daily
0 Comments