តាកែវ ៖ រថយន្តតាក់ស៊ី ដឹកអ្នកដំណើរប្រភេទសាំយ៉ុងមួយគ្រឿង បួងចង្កូតក្រឡាប់ បណ្តាលឲ្យអ្នកដំណើរក្នុងរថយន្តរងរបួសធ្ងន់ស្រាល៤នាក់ បន្ទាប់ពីបើកបុកអ្នកថ្មើរជើងម្នាក់ នៅស្រុកត្រាំកក់។
ហេតុការណ៍គ្រោះថ្នាក់ចរាចរណ៍នេះកើតឡើងនៅថ្ងៃទី២៨ ខែមករា ឆ្នាំ២០១៩ វេលាម៉ោង១៩និង១០នាទី ស្ថិតនៅលើផ្លូវជាតិលេខ៣ ចន្លោះគីឡូម៉ែត្រលេខ៩២-៩៣ ក្នុងភូមិបឹងម្កាក់ ឃុំត្រាំកក់ ស្រុកត្រាំកក់ ខេត្តតាកែវ។
តាមការឲ្យដឹងពីប៉ូលិសស្រុកត្រាំកក់បានប្រាប់ថា ពិតជា មានករណីគ្រោះថ្នាក់ចរាចរណ៍មួយកើតឡើងរវាងរថយន្ត និងអ្នកថ្មើរជើង ហើយបណ្តាលឲ្យរថយន្តក្រឡាប់ប្រាកដមែន ដោយរថយន្តបង្កម៉ាកសាំយ៉ុង ពណ៌ស ពាក់ស្លាកលេខ ភ្នំពេញ 2Q-1074 (អ្នកបើកបរគេចខ្លួនបាត់) ដែលបើកបរមកពីទិសខាងកើត លុះបើកបរមកដល់ចំណុចខាងលើ ក៏បានបុកអ្នកថ្មើរជើងម្នាក់ ភេទប្រុស មិនទាន់ស្គាល់អត្តសញ្ញាណពិតប្រាកដ (វិកលចរិត) ដែលដើរមកពីទិសខាងលិច បណ្តាលឲ្យរងរបួសធ្ងន់។
បន្ទាប់ពីបុកអ្នកថ្មើរជើង រថយន្តបានក្រឡាប់ ធ្វើឲ្យអ្នកដំណើរក្នុងរថយន្តខាងលើរងរបួសធ្ងន់ស្រាលចំនួន៤នាក់គឺ ទី១-ឈ្មោះ ហួន កាយ ភេទស្រី អាយុ២៨ឆ្នាំ មុខរបរលក់ដូរ នៅភូមិដំណាក់កន្ទួត ឃុំដំណាក់កន្ទួត ស្រុកកំពង់ត្រាច ខេត្តកំពត (រងរបួសស្រាល)។ ទី២-ឈ្មោះ រស្មី ភេទប្រុស អាយុ២០ឆ្នាំ មុខរបរលក់ដូរ នៅភូមិដំណាក់កន្ទួត ឃុំដំណាក់កន្ទួត ស្រុកកំពង់ត្រាច ខេត្តកំពត (រងរបួសស្រាល)។ ទី៣-ឈ្មោះ ង៉ែត ឆែម ភេទប្រុស អាយុ៥៣ឆ្នាំ មុខរបរធ្វើស្រែ នៅភូមិមនោសុខ ឃុំតាកែន ស្រុកឈូក ខេត្តកំពត (រងរបួសធ្ងន់)។ ទី៤-ឈ្មោះ ឌឿក ស្តើង ភេទស្រី អាយុ៣២ឆ្នាំ មុខរបរធ្វើស្រែ នៅភូមិមនោសុខ ឃុំតាកែន ស្រុកឈូក ខេត្តកំពត (រងរបួសស្រាល)។
ក្រោយពេលកើតហេតុ សមត្ថកិច្ចស្រុកត្រាំកក់ បានចុះមកដល់ធ្វើកំណត់ហេតុ កសាងសំណុំរឿងទៅតាមនីតិវិធី និងចាត់បញ្ជូនអ្នករងរបួសទៅព្យាបាល រីឯវត្ថុតាងរថយន្តខាងលើ ត្រូវបានយកទៅរក្សាទុកនៅអធិការដ្ឋាននគរបាលស្រុកត្រាំកក់ រង់ចាំម្ចាស់ចូលខ្លួនមកដោះស្រាយ៕
Source: Kampuchea Thmey Daily
0 Comments