ភ្នំពេញ ៖ ការឯកភាពគ្នាក្នុងការពង្រីកទំនាក់ទំនងលើផ្នែកពាណិជ្ជកម្ម វិនិយោគ និងសេដ្ឋកិច្ចនេះ បានធ្វើឡើងនៅក្នុងកិច្ចប្រជុំគណៈកម្មការអន្តររដ្ឋាភិបាលកម្ពុជា-រុស្ស៊ី ស្តីពីកិច្ចសហប្រតិបត្តិការវិស័យពាណិជ្ជកម្ម សេដ្ឋកិច្ច វិទ្យាសាស្ត្រ និងបច្ចេកទេស កាលពីថ្ងៃទី២៥ ខែមករា ឆ្នាំ២០១៩ ដែលកិច្ចប្រជុំនេះ ដឹកនាំដោយឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការកម្ពុជា និងលោក ឌីមីតទ្រី កូប៊ិលគីន រដ្ឋមន្ត្រីក្រសួងធនធានធម្មជាតិ និងបរិស្ថាននៃសហព័ន្ធរុស្ស៊ី។
តាមលទ្ធផលស្តីពីកិច្ចប្រជុំនោះ រដ្ឋមន្ត្រីទាំងពីរបានរំលឹកអំពីដំណើរទស្សនកិច្ចទៅវិញទៅមករបស់នាយករដ្ឋមន្ត្រីនៃប្រទេសទាំងពីរ កាលពីឆ្នាំ២០១៥ និង២០១៦ ដែលបានធ្វើឲ្យមិត្តភាពជាប្រពៃណីរវាងកម្ពុជានិងរុស្ស៊ីកាន់តែមានភាពរឹងមាំ និងធ្វើឲ្យរស់រវើកឡើងវិញនូវកិច្ចសហប្រតិបត្តិការលើគ្រប់វិស័យ ដែលផ្តល់ផលប្រយោជន៍រួម តាមរយៈការចុះហត្ថលេខាលើកិច្ចព្រមព្រៀងជាច្រើន។ ជាងនេះទៅទៀត រដ្ឋមន្ត្រីទាំងពីរបានគូសបញ្ជាក់ថា កិច្ចប្រជុំប្រកបដោយផ្លែផ្ការវាងនាយករដ្ឋមន្ត្រីនៃប្រទេសទាំងពីរនៅទីក្រុងប្រ៊ុចស៊ែល កាលពីខែតុលា ឆ្នាំ២០១៨ ក៏ដូចជាកិច្ចសន្ទនារវាងសម្តេចតេជោ ហ៊ុន សែន នាយករដ្ឋមន្ត្រី និងប្រធានាធិបតីរុស្ស៊ី ឯកឧត្តម វ្ល៉ាឌីមៀរ ពូទីន នៅប្រទេសសិង្ហបុរី កាលពីខែវិច្ឆិកា កន្លងទៅ មិនត្រឹមតែពង្រឹងបន្ថែមនូវជំនឿជាក់ផ្នែកនយោបាយប៉ុណ្ណោះទេ ប៉ុន្តែថែមទាំងបានផ្តល់នូវលទ្ធភាពថ្មី និងទូលំទូលាយ ដើម្បីលើកកម្ពស់ភាពជាដៃគូទ្វេភាគី ឲ្យកាន់តែខ្ពស់មួយកម្រិតទៀត។
កិច្ចប្រជុំបានពិនិត្យឡើងវិញនូវកិច្ចព្រមព្រៀងចំនួន៤៤ ដែលបានចុះហត្ថលេខា ចាប់តាំងពីឆ្នាំ២០១៥ មក និងបានកត់សំគាល់ថា ការអនុវត្តកិច្ចព្រមព្រៀងមួយចំនួនមានការវិវត្តគួរឲ្យលើកទឹកចិត្ត។ សហប្រធានទាំងពីរ បានឯកភាពជំរុញអាជ្ញាធរពាក់ព័ន្ធឲ្យប្រកាន់យកនូវវិធានការសកម្មក្នុងការធានាការអនុវត្តកិច្ចព្រមព្រៀងដទៃទៀត ឲ្យបានពេញលេញ និងមានប្រសិទ្ធភាព។ លើសពីនេះទៅទៀត ឯកឧត្តមសហប្រធាន ក៏បានពិភាក្សាពីបច្ចុប្បន្នភាពនៃកិច្ចព្រមព្រៀងចំនួនជាង១០ ផ្សេងទៀត ដែលកំពុងស្ថិតក្នុងដំណាក់កាលចរចា និងបានគូសបញ្ជាក់ពីសារៈសំខាន់ក្នុងការបញ្ចប់ការចរចាលើឯកសារទាំងនេះឲ្យបានឆាប់រហ័ស។
រដ្ឋមន្ត្រីទាំងពីរ បានឯកភាពលើវិធានការជាក់លាក់ថ្មីៗ ក្នុងការពង្រីកទំនាក់ទំនងផ្នែកពាណិជ្ជកម្ម វិនិយោគ និងសេដ្ឋកិច្ច។ ប្រទេសទាំងពីរ មានសក្តានុពលកិច្ចសហប្រតិបត្តិការក្នុងវិស័យរ៉ែ វារីអគ្គិសនី ឧស្ម័នធម្មជាតិ និងប្រេង ការដឹកជញ្ជូន ហេដ្ឋារចនាសម្ព័ន្ធសម្រាប់បច្ចេកវិទ្យាព័ត៌មាន និងទូរគមនាគមន៍ (ICT) គ្រឿងយន្តធុនធ្ងន់ ឧស្សាហកម្មកែច្នៃ និងផលិតផលកសិកម្មជាដើម។ រដ្ឋមន្ត្រីទាំងពីរ បានផ្តល់សារៈសំខាន់ខ្ពស់ចំពោះការចែករំលែកព័ត៌មានទាក់ទងនឹងពិព័រណ៍ធុរកិច្ច វេទិកាធុរកិច្ច និងព្រឹត្តិការណ៍ជំរុញពាណិជ្ជកម្មនានា និងបានឯកភាពជួយពន្លឿនការបង្កើតយន្តការ ដែលអាចជួយសម្រួលដល់ការផ្លាស់ប្តូរព័ត៌មានវិនិយោគ។ កម្ពុជារង់ចាំទទួលស្វាគមន៍ក្រុមហ៊ុនរុស្ស៊ី មកចូលរួមក្នុងកម្មវិធី “ពិព័រណ៌ផលិតផលកម្ពុជានិងផលិតផលនាំចេញ” ដែលនឹងប្រព្រឹត្តទៅនៅថ្ងៃទី១៥-១៨ ខែធ្នូ ឆ្នាំ២០១៩ នៅរាជធានីភ្នំពេញ។ តាមសេចក្តីប្រកាសស្តីពីលទ្ធផលនៃកិច្ចប្រជុំនោះ រុស្ស៊ី នឹងធ្វើជាម្ចាស់ផ្ទះរៀបចំកិច្ចប្រជុំក្រុមការងារជាន់ខ្ពស់លើកទី២ ស្តីពីការលើកកម្ពស់គម្រោងវិនិយោគរួមគ្នា ក្នុងពេលអនាគតដ៏ខ្លីខាងមុខ ដើម្បីពិនិត្យឡើងវិញនូវបញ្ជីឈ្មោះគម្រោងនានាសម្រាប់កិច្ចសហប្រតិបត្តិការពាណិជ្ជកម្ម សេដ្ឋកិច្ច និងវិនិយោគ រវាងកម្ពុជា-រុស្ស៊ី រហូតដល់ឆ្នាំ២០២០ និងសហការអភិវឌ្ឍគម្រោងលម្អិតរួមគ្នា។ បន្ថែមលើនេះ រុស្ស៊ីបានបញ្ជាក់ឡើងវិញនូវការគាំទ្ររបស់ខ្លួនចំពោះបំណងរបស់កម្ពុជា ដែលចង់ចរចាកិច្ចព្រមព្រៀងពាណិជ្ជកម្មសេរីជាមួយសហភាពសេដ្ឋកិច្ចអឺរ៉ាស៊ី (EAEU)។
ជាមួយគ្នានោះ កិច្ចប្រជុំបានកត់សម្គាល់ប្រកបដោយសុទិដ្ឋិនិយម ចំពោះវឌ្ឍនភាពនៃភាពជាដៃគូសក្តានុពលក្នុងវិស័យការពារបរិស្ថាន និងថាមពលនុយក្លេអ៊ែរក្នុងគោលបំណងសន្តិភាព។ រដ្ឋមន្ត្រីទាំងពីរ បានស្វាគមន៍ចំពោះបំណងរបស់ប្រទេសទាំងពីរ ក្នុងការជំរុញកិច្ចសហប្រតិបត្តិការប្រកបដោយផ្លែផ្កាលើវិស័យការពារបរិស្ថាន ការគ្រប់គ្រងកាកសំណល់ ទឹកស្អាត និងការអភិវឌ្ឍទីក្រុង និងបានសង្កត់ធ្ងន់ពីសារៈសំខាន់នៃការអភិវឌ្ឍធនធានមនុស្ស នៅក្នុងវិស័យថាមពលនុយក្លេអ៊ែរក្នុងគោលបំណងសន្តិភាព ការបង្កើតឲ្យបានឆាប់នូវមជ្ឈមណ្ឌលព័ត៌មានស្តីពីថាមពលនុយក្លេអ៊ែរ និងការបញ្ចប់ការចរចាលើកិច្ចព្រមព្រៀងស្តីពីការបង្កើតមជ្ឈមណ្ឌលវិទ្យាសាស្ត្រ និងបច្ចេកវិទ្យានុយក្លេអ៊ែរ។
កិច្ចប្រជុំក៏បានកំណត់វិធានការជាក់លាក់ ដើម្បីជំរុញបន្ថែមទៀតនូវកិច្ចសហប្រតិបត្តិការប្រកបដោយផ្លែផ្កាក្នុងវិស័យអប់រំ វប្បធម៌ ទេសចរណ៍ និងសុខាភិបាល។ ភាគីរុស្ស៊ីបានយល់ព្រមពិចារណាបង្កើនចំនួនអាហារូបករណ៍ប្រចាំឆ្នាំសម្រាប់និស្សិតកម្ពុជា ហើយបានបញ្ជាក់ជាថ្មីពីការគាំទ្រជាគោលការណ៍របស់ខ្លួន ក្នុងការស្តារ និងជួសជុលប្រាសាទព្រះវិហារ ហើយអង្គប្រជុំ ក៏បានលើកឡើងពីការសិក្សាពីលទ្ធភាពធ្វើទំនើបកម្មមន្ទីរពេទ្យមិត្តភាពខ្មែរ-សូវៀត ដែលនឹងត្រូវបញ្ចប់នៅខែមីនា ឆ្នាំ២០១៩ខាងមុខ ហើយរដ្ឋមន្ត្រីទាំងពីរ បានឯកភាពបន្តការពិភាក្សាលើលទ្ធភាពបើកឲ្យមានជើងហោះហើរត្រង់រវាងកម្ពុជា និងរុស្ស៊ី។
កម្ពុជា នឹងធ្វើជាម្ចាស់ផ្ទះរៀបចំសម័យប្រជុំលើកទី១១ នៃគណៈកម្មការអន្តររដ្ឋាភិបាលកម្ពុជា-រុស្ស៊ី នៅឆ្នាំ២០២០ ដែលក្នុងឱកាសនោះ កិច្ចព្រមព្រៀងទ្វេភាគីមួយចំនួន នឹងត្រូវបានចុះហត្ថលេខា ហើយភាគីរុស្ស៊ី នឹងអមដំណើរដោយគណៈប្រតិភូធុរកិច្ចរុស្ស៊ីមួយក្រុមផងដែរ៕
Source: Kampuchea Thmey Daily
0 Comments