ភ្នំពេញ ៖ ស្របពេលដែលថ្មីៗនេះ មានការចុះផ្សាយ និងចែករំលែកយ៉ាងព្រោងព្រាយអំពីដំណឹងដ៏រន្ធត់ចិត្ត និងចាប់អារម្មណ៍ខ្លាំង ក្រោយពេលដែលយុវតីស្រស់ស្អាតរៀនថ្នាក់១២ម្នាក់ បានសម្រេចបញ្ចប់ជីវិតខ្លួនតាមរយៈការចង.ក សម្លាប់ខ្លួន ព្រោះតែមានបញ្ហា នៃជំងឺបាក់ទឹកចិត្ត បង្កឲ្យរីកសុសសាយពេញបណ្ដាញសង្គមហ្វេសប៊ុកនោះ កវីនិពន្ធ លោក សុខ ជំនោរ ក៏ស្រាប់តែលើកជាទស្សនៈផ្ទុយពីការសរសេរអត្ថាធិប្បាយរបស់ព័ត៌មានមួយចំនួន។
ការលើកឡើងជាទស្សនៈរបស់កវីនិពន្ធល្បីឈ្មោះ លោក សុខ ជំនោរ នាពេលនេះ ដោយយល់ឃើញថា ករណី នៃការសរសេររៀបរាប់ភ្ជាប់ជាមួយឃ្លោងឃ្លាបញ្ចូលខ្លឹមសារកម្សត់មួយចំនួន ហាក់មិនត្រឹមតែធ្វើឲ្យអ្នកអានបាក់ទឹកចិត្តអាណិតអាសូរប៉ុណ្ណោះទេ ពោលគឺផ្ទុយពីការអាណិតអាសូរនោះដែរ អាចនឹងជំរុញឲ្យបុគ្គលកំពុងមានជំងឺបាក់ទឹកចិត្តដូចគ្នានេះកាន់តែមានចរិតទន់ជ្រាយអាចងាយនឹងផ្ដេកផ្ដួលធ្វើតាមទៅវិញផងដែរ។
លោក សុខ ជំនោរ បាននិយាយរៀបរាប់បែបនេះថា ឃើញគេហទំព័រ និងPage ព័ត៌មានល្បីៗចុះផ្សាយព្រោងព្រាត អំពីយុវតីសិស្សសាលាសម្លាប់ខ្លួនដោយជំងឺបាក់ទឹកចិត្ត ដោយរៀបរាប់ដើមទង កម្សត់ អូសមនោសញ្ចេតនាតាមរឿងរ៉ាវបែបប្រលោមលោក ដែលធ្វើឲ្យអ្នកអានលង់លក់អាណិតអាសូរ ពិសេសអាចញ៉ាំងឲ្យអ្នកដែលមានជំងឺបាក់ទឹកចិត្តដទៃ ហាក់ផ្ដេកផ្ដួលតាម។
អ្នកនិពន្ធល្បីឈ្មោះ លោក សុខ ជំនោ បានបញ្ជាក់បន្ថែមទៀតថា មិនឃើញអ្នកជំនាញ ឬអ្នកសរសេរអត្ថបទទាំងនោះ និយាយលើកទឹកចិត្តកែស្ថានភាព ឬស្រង់សម្តីអ្នកជំនាញពីការព្យាបាល ឬឲ្យទៅរកអ្នកប្រឹក្សាសោះឡើយ.....។ សភាពការណ៍នេះ គេគួរឆ្លៀតឱកាសចាប់យកជ្រុងមួយផ្សេងដើម្បីជួសជុលស្ថានភាពក្តៅនេះ។
សូមជម្រាបថា យុវតីរូបស្រស់ ដែលបានសម្លាប់ខ្លួនដោយការចង.ក ព្រោះជំងឺបាក់ទឹកចិត្តស្រស់ស្អាតរូបនោះមាន ឈ្មោះ ដេត ពេជ្រចន្ទលីហ្សា អាយុ១៧ឆ្នាំ ជាសិស្សថ្នាក់ទី១២ នៃសាលាសុវណ្ណភូមិ។ ចំណែកឯហេតុការណ៍ដែលបង្កឲ្យមានការភ្ញាក់ផ្អើលនេះបានកើតឡើងកាលពីល្ងាចថ្ងៃទី០៤ ខែមករា ឆ្នាំ២០១៩ ស្ថិតនៅផ្ទះលេខ 25E បុរី ប៊ុន ហួរ ភូមិថ្នល់បំបែក សង្កាត់ចោមចៅ៣ ខណ្ឌពោធិ៍សែនជ័យ ៕
Source: Kampuchea Thmey Daily
0 Comments