កាលពីថ្ងៃអាទិត្យ ប្រធានាធិបតីអាមេរិកលោក Donald Trump បានប្រកាន់ខ្ជាប់លើតម្រូវការរបស់លោកសម្រាប់ទឹកប្រាក់រាប់ពាន់លានដុល្លារដើម្បីផ្តល់ថវិកាដល់ជញ្ជាំងព្រំដែនជាមួយប្រទេសម៉ិកស៊ិកដោយលោកបានអះអាងអំពីការគាំទ្រយ៉ាងខ្លាំងក្លានៅក្នុងរង្វង់ខាងក្នុងរបស់លោកលើបញ្ហាដ៏ចម្រូងចម្រាសនេះដែលឥឡូវនេះការបិទរដ្ឋាភិបាលទាំងបង្ខំបានឈានចូលដល់សប្តាហ៍ទីបីហើយ។
លោក Trump បានប្រាប់ក្រុមអ្នកកាសែតនៅពេលលោកចាកចេញពីសេតវិមានថា “យើងត្រូវតែសាងសង់ជញ្ជាំង។ វាជាសុវត្ថិភាព វាជាបញ្ហាសន្តិសុខសម្រាប់ប្រទេសរបស់យើង”។
ប្រធានាធិបតីអាមេរិករូបនេះបានព្រមានជាថ្មីម្ដងទៀតថា គាត់អាចយកអំណាចគ្រាអាសន្នមកប្រើដើម្បីទទួលបានជញ្ជាំងមួយដែលត្រូវបានសាងសង់ឡើងដោយមិនចាំបាច់មានការអនុម័តពីសភា។ លោកបានថ្លែងថា “ខ្ញុំអាចប្រកាសគ្រាអាសន្នថ្នាក់ជាតិដោយផ្អែកលើអ្វីដែលនឹងកើតឡើងក្នុងរយៈពេលពីរបីថ្ងៃខាងមុខ”។
ទន្ទឹមនោះ អ្នកប្រជាធិបតេយ្យដ៏ល្បីឈ្មោះម្នាក់គឺលោក Adam Schiff បានច្រានចោលការនិយាយអំពីគ្រាអាសន្នជាតិភ្លាមៗ។ លោកបានកត់សម្គាល់ថា នៅពេលដែលអតីតប្រធានាធិបតីលោក Harry Truman ប្រើភាសាបែបនេះក្នុងបំណងធ្វើតូបនីយកម្មឧស្សាហកម្មដែកថែបនិងបញ្ចប់កូដកម្មពលកម្មអំឡុងសង្គ្រាមកូរ៉េ, គាត់ត្រូវបានបដិសេធដោយតុលាការកំពូល។
ភាពជាប់គាំងជាមួយសមាជិកសភាជុំវិញការផ្តល់ថវិកាសម្រាប់ជញ្ជាំងព្រំដែនបានបណ្តាលឲ្យបិទរដ្ឋាភិបាលដោយផ្នែកចាប់តាំងពីថ្ងៃទី២២ខែធ្នូមក។ លោក Trump បានទាមទារទឹកប្រាក់ចំនួន៥.៦ពាន់លានដុល្លារខណៈព្រឹទ្ធសភាគណបក្សប្រជាធិបតេយ្យផ្តល់ឲ្យ១.៣ពាន់លាន់ដុល្លារ។
លោក Trump បាននិយាយកាលពីថ្ងៃសុក្រថា ការប្រឈមមុខគ្នានេះអាចអូសបន្លាយពេលរាប់ខែឬច្រើនឆ្នាំ។
ការបិទនេះបានធ្វើឲ្យបុគ្គលិកសហព័ន្ធប្រមាណ៨០០,០០០នាក់ត្រូវត្រលប់ទៅផ្ទះវិញឬធ្វើការដោយគ្មានប្រាក់ខែ។ អ្នកម៉ៅការសហព័ន្ធធំៗក៏កំពុងខាតបង់ប្រាក់ផងដែរនៅក្នុងអ្វីដែលជាការបិទរដ្ឋាភិបាលដ៏យូរបំផុតមួយនៅក្នុងប្រវត្តិសាស្ត្រអាមេរិក៕ AFP
Source: Kampuchea Thmey Daily
0 Comments