ប្រធានាធិបតីអាមេរិកលោក ដូណាល់ ត្រាំ បាននិយាយកាលពីថ្ងៃអាទិត្យថា ការចរចារកំពុងប្រព្រឹត្តទៅស្តីអំពីទីតាំងនៃកិច្ចប្រជុំកំពូលបន្ទាប់របស់គាត់ជាមួយមេដឹកនាំកូរ៉េខាងជើងលោក គីម ជុងអ៊ុន។
លោក ត្រាំ ដែលបានចូលរួមកិច្ចប្រជុំកំពូលជាប្រវត្តិសាស្ត្រជាមួយលោក គីម នៅប្រទេសសិង្ហបុរីកាលពីខែមិថុនាបាននិយាយកាលពីដើមសប្តាហ៍នេះថា លោកបានទទួល “លិខិតដ៏អស្ចារ្យមួយ” ពីមេដឹកនាំកូរ៉េខាងជើងប៉ុន្តែបានបដិសេធបញ្ចេញខ្លឹមសាររបស់លិខិតនេះ។
លោកបានប្រាប់ក្រុមអ្នកយកព័ត៌មានថា “យើងកំពុងចរចាអំពីទីតាំងមួយ”។
លោកបាននិយាយអំពីជំនួបកំពូលមួយជាមួយលោក គីម ថា “វានឹងត្រូវបានប្រកាសប្រហែលជានៅក្នុងពេលអនាគតដ៏ខ្លីខាងមុខ។ ពួកគេចង់ជួបហើយយើងក៏ចង់ជួបដែរ។ យើងនឹងឃើញអ្វីដែលនឹងកើតឡើង”។ លោកបន្ថែមថា “យើងមានការសន្ទនាដ៏ល្អជាមួយកូរ៉េខាងជើង”។
លិខិតចុងក្រោយមកពីលោកគីមបានកើតឡើងបន្ទាប់ពីមេដឹកនាំកូរ៉េខាងជើងរូបនេះព្រមាននៅក្នុងសុន្ទរកថាឆ្នាំថ្មីថា ក្រុងព្យុងយ៉ាងអាចផ្លាស់ប្តូរវិធីសាស្ត្ររបស់ខ្លួនចំពោះកិច្ចចរចានុយក្លេអ៊ែរប្រសិនបើក្រុងវ៉ាស៊ីនតោននៅតែបន្តដាក់ទណ្ឌកម្ម។
លោក ត្រាំ បាននិយាយកាលពីថ្ងៃអាទិត្យថា ការដាក់ទណ្ឌកម្មនៅតែមានប្រសិទ្ធភាពនិងពេញលេញហើយនឹងបន្តធ្វើដូច្នេះរហូតដល់សហរដ្ឋអាមេរិកមើលឃើញលទ្ធផល “វិជ្ជមាន”។
នៅក្នុងកិច្ចប្រជុំកំពូលលើកដំបូងរវាងគូសត្រូវយូរអង្វែងទាំងពីរកាលពីខែមិថុនា លោកត្រាំនិងលោកគីមបានព្រមព្រៀងគ្នាធ្វើការឆ្ពោះទៅរកការលុបបំបាត់អាវុធនុយក្លេអ៊ែរលើឧបទ្វីបកូរ៉េប៉ុន្តែមានកិច្ចព្រមព្រៀងមិនច្បាស់លាស់ទេស្តីពីអត្ថន័យនេះ។
សហរដ្ឋអាមេរិកបានជំរុញឲ្យកូរ៉េខាងជើងលុបបំបាត់អាវុធនុយក្លេអ៊ែររបស់ខ្លួនមុនពេលសម្ពាធសេដ្ឋកិច្ចត្រូវបានបន្ថូរបន្ថយ៕ AFP
Source: Kampuchea Thmey Daily
0 Comments