ភ្នំពេញ ៖ តារាចម្រៀងប្រុស-ស្រីពីររូបរបស់ផលិតកម្មហង្សមាស គឺកញ្ញា ទេព បូព្រឹក្ស និងលោក ងួន ចាន់ដេវិត ហៅ G-Devith ដូចមហាជនធ្លាប់បានដឹងមកហើយថា អ្នកទាំងពីមិនត្រឹមតែជាដៃគូសិល្បៈដ៏មានភាពស្និទ្ធស្នាល និងផ្អែមល្ហែមយល់ចិត្តគ្នាប៉ុណ្ណោះទេ ពួកគេក៏ថែមទាំងបានបង្កើនពីមិត្តភាពរួមអាជីពសិល្បៈមកក្លាយជាចំណងស្នេហាយ៉ាងកក់ក្តៅផងដែរ។
តាមការកត់សម្គាល់ ចាប់តាំងពីពួកគេ កញ្ញា ទេព បូព្រឹក្ស និង G-Devith ផ្តើមបែកធ្លាយនូវសម្ពន្ធភាព នៃការសាងស្នេហាក្រៅឆាកជាមួយគ្នា គឺអ្នកទាំងពីរកាន់តែបង្ហាញពីភាពស្និទ្ធស្នាលផ្អែមល្ហែមតាមរយៈការទម្លាយរូបភាពកៀកកើយគ្នា ប្រៀបបានដូចជាសត្វលលកញីឈ្មោល គួរឲ្យច្រណែនពីក្រសែភ្នែកទស្សនិកជនទៀតផង។
ជាក់ស្ដែងនាឱកាសដើមឆ្នាំថ្មី២០១៩នេះ តារាចម្រៀងស្រីដែលទើបផ្ទុះរឿងរ៉ាវដ៏រសើបត្រូវគេជះស្រា និងគប់កំប៉ុងស្រាបៀ អំឡុងពេលឡើងឆាកតន្ត្រី កញ្ញា ទេព បូព្រឹក្ស បានប្រកាសទម្លាយជាសាធារណៈនូវការរឹតចំណងស្នេហាដ៏រឹងម៉ាំរវាងនាង និងដៃគូប្រុស G-Devith បង្កឲ្យមានការចាប់អារម្មណ៍ខ្លាំងពីសំណាក់មហាជនគ្រប់មជ្ឈដ្ឋាន។
បើតាមការរៀបរាប់ភ្ជាប់មកជាមួយរូបភាពថតកៀកកើយគ្នា កញ្ញា ទេព បូព្រឹក្ស បានលើកឡើងថាតាមពិតទៅពួកយើងមិនទាមទារនៅជាមួយគ្នាយូរទេ គឺសូមត្រឹមតែមួយជីវិតបានហើយ ទម្រាំតែពួកយើងដើរមកដល់ពេលនេះ គឺពិតជាពិបាកណាស់ ទាំងក្រុមគ្រួសារ ទម្រាំតែគាត់យល់ និងទទួលយកក្តីស្រលាញ់ពួកយើង ….។
បន្ថែមពីលើនេះ តារាចម្រៀងធ្មេញជំពើស ពូកែខាងក្បាច់រាំ កញ្ញា ទេព បូព្រឹក្ស បានលើកឡើងថាពួកយើងបានកាន់ដៃគ្នាជម្នះរាល់ឧបសគ្គ គឺមានតែពាក្យថាទ្រាំ ដូចនេះហើយ ឆ្នាំថ្មីនេះ សូមឲ្យបំណងប្រាថ្នាពួកខ្ញុំ បានសម្រេចដូចបំណងផង ថាមើលបើអ្នកទាំងអស់គ្នាជាហ្វេន បូព្រឹក្ស និង ដេវិត ពិត ដឹងអត់ថាបំណងប្រាថ្នាអ្វី ទាយត្រូវប៉ាវបាយ១ពេល G-Devith…។
ទន្ទឹមគ្នា នៃការបង្ហោះសារ និងបង្ហាញពីរូបភាពផ្អែមល្ហែមរបស់តារាស្រី កញ្ញា ទេព បូព្រឹក្ស ជាមួ យសង្សារប្រុស លោក G-Devith នេះដែរ មានទស្សនិកជនជាច្រើនបានចូលរួមអបអរ និងផ្ញើសារជូនពរចំណងស្នេហារបស់អ្នកទាំងពីរ។ ក្នុងនោះក៏មានការលើកឡើងថា មិនដឹងនិយាយថាម៉េចទេ បើគេCommentមុនអស់ហើយ តែណាស់ហើយ ជូនពរបងទាំងពីរចាប់ដៃគ្នា និងរកស៊ីឲ្យកាន់តែមានភ្ញៀវច្រើនៗ…៕
Source: Kampuchea Thmey Daily
0 Comments