ឧត្តរមានជ័យ ៖ កម្លាំងនគរបាល នៃការិយាល័យនគរបាលព្រហ្មទណ្ឌកម្រិតស្រាល បានសហការជាមួយអធិការដ្ឋាននគរបាលស្រុកចុងកាល់ នាល្ងាចថ្ងៃទី២៣ ខែមករា ឆ្នាំ២០១៩ ធ្វើការឃាត់ខ្លួនជនសង្ស័យ២នាក់ ខណៈពេលដែលកម្លាំងសណ្ដាប់ធ្នាប់បានធ្វើការ ចុះត្រួតពិនិត្យចរាចរណ៍តាមដងផ្លូវ នៅចំណុចភូមិជើងទៀន ឃុំជើងទៀន ស្រុកចុងកាល់។
លោកឧត្ដមសេនីយ៍ទោ ម៉ែន លី ស្នងការនគរបាលខេត្តឧត្ដរមានជ័យ បានឲ្យដឹងថា កម្លាំងនគរបាលបានធ្វើឃាត់ខ្លួនជនសង្ស័យទី១-ឈ្មោះ ហូរ មករា (ហៅម៉ី) ភេទប្រុស អាយុ២៣ឆ្នាំ នៅភូមិតាវង ឃុំពន្លៃ ស្រុកភ្នំស្រុក ខេត្តបន្ទាយមានជ័យ មុខរបរ កម្មករសំណង់ នៅក្នុងក្រុមហ៊ុនកាស៊ីណូអូរស្មាច់រីសត និងទី២-ឈ្មោះ សេង ឆាយណា ភេទប្រុស អាយុ២៥ឆ្នាំ នៅភូមិចំការចេក សង្កាត់អូស្មាច់ ក្រុងសំរោង ជាជាងជួសជុលរថយន្ត នៅខេត្តសៀមរាប ពាក់ព័ន្ធនឹងករណីលួចម៉ូតូ១គ្រឿង ម៉ាកវេវ RSX សេ១០០ ពណ៌ខ្មៅ-ក្រហម ស៊េរីឆ្នាំ២០១៥ ពាក់ស្លាកលេខ ឧ.ជ 1B -1690 លេខតួ-លេខម៉ាស៊ីន៣៩២៣៧១២ របស់ជនរងគ្រោះ ឈ្មោះ ម៉ាន់ រ៉ាម៉ន ភេទប្រុស អាយុ៣៣ឆ្នាំ ស្នាក់នៅភូមិដងទង សង្កាត់កូនក្រៀល ក្រុងសំរោង ខេត្តឧត្តរមានជ័យ។
លោកឧត្ដមសេនីយ៍ទោ ម៉ែន លី ស្នងការនគរបាលខេត្តបានបន្តថា កម្លាំងយើងបានប្រទះឃើញ ជនសង្ស័យ២នាក់បណ្ដើរម៉ូតូខាងលើនេះ នៅចំណុចភូមិជើងទៀន ឃុំជើងទៀន ស្រុកចុងកាល់ ខេត្តឧត្តរមានជ័យ ដោយកម្លាំងសមត្ថកិច្ចមានការសង្ស័យ ព្រោះពេលមកដល់កន្លែងត្រួតពិនិត្យជនសង្ស័យបានចុះបណ្តើរម៉ូតូ សមត្ថកិច្ចក៏បានធ្វើការឃាត់ត្រួតពិនិត្យ ទើបឃើញមានសោកាច់អក្សរ T នៅក្នុងកាបូបខោអាវ ភ្លាមនោះ សមត្ថកិច្ចក៏បានធ្វើការឃាត់ខ្លួនភ្លាមៗតែម្ដង។ តាមចម្លើយសារភាពរបស់ ឈ្មោះ ហូង មករា បានសារភាពថា ខ្លួនបានកាច់សោ.ក ម៉ូតូ របស់កម្មករធ្វើសំណង់ជាមួយគ្នានៅអូរស្មាច់ពិតប្រាកដមែន។
បច្ចុប្បន្ន ជនសង្ស័យទាំង២នាក់ខាងលើ និងម៉ូតូមួយគ្រឿង ព្រមទាំងវត្ថុតាង បានបញ្ជូនទៅការិយាល័យព្រហ្មទណ្ឌកម្រិតស្រាលដើម្បីចាត់ការតាមនីតិវិធីច្បាប់៕
Source: Kampuchea Thmey Daily
0 Comments