អូស្ត្រាលី​ទាមទារ​ឲ្យ​ចិន​ដោះស្រាយ​ករណី​ជនជាតិ​របស់ខ្លួន​ដែល​ជាប់ឃុំ​ដោយ “​យុត្តិធម៌​”

ប្រទេស​អូស្ត្រាលី​នៅ​ថ្ងៃ​ព្រហស្បតិ៍​បានទាមទារ​ឲ្យ​ប្រទេស​ចិន​ត្រូវ​ដោះស្រាយ​ករណី​របស់​អ្នកនិពន្ធ​ដែល​ជាប់​ឃុំឃាំង​ឈ្មោះ Yang Hengjun ឲ្យ “​មាន​តម្លាភាព​និង​យុត្តិធម៌​” ស្រប​ពេលដែល​មានការ​កើនឡើង​នៃ​ជម្លោះ​អំពី​ជោគវាសនា​របស់​ជនជាតិ​អូស្ត្រាលី​ដើមកំណើត​ចិន​រូបនេះ​។​

លោក Yang ដែលជា​អ្នកនិពន្ធ​រឿង​ប្រលោមលោក អ្នកតស៊ូ​មតិ​លទ្ធិប្រជាធិបតេយ្យ​និង​ជា​អតីត​អ្នកការទូត​ចិន​គឺ​ត្រូវបាន​គេ​ឃុំខ្លួន​ភ្លាមៗ​បន្ទាប់ពី​គាត់​បានធ្វើ​ការវិល​ត្រលប់​ដ៏​កម្រ​មក​ប្រទេស​ចិន​វិញ​ពី​សហរដ្ឋអាមេរិក​កាលពី​សប្តាហ៍​មុន​។​

អាជ្ញាធរ​ចិន​មិនបាន​និយាយ​ជា​សាធារណៈ​ទេ​ថា​តើ​ហេតុអ្វី​បានជា​គាត់​ត្រូវគេ​ឃុំឃាំង​ឬថា​តើ​គាត់​កំពុង​ប្រឈម​នឹង​ការចោទប្រកាន់​អ្វី​។​

លោកស្រី Marise Payne រដ្ឋមន្ត្រី​ក្រសួងការបរទេស​អូស្ត្រាលី​បាន​និយាយ​នៅក្នុង​សេចក្តីថ្លែងការណ៍​មួយ​ថា “​ស្ថានទូត​របស់​យើង​នៅ​ទីក្រុង​ប៉េកាំង​នឹង​ជួប​ជាមួយ​អាជ្ញាធរ​ចិន​នៅ​ព្រឹក​នេះ​ដើម្បី​ស្វែងរក​ការបំភ្លឺ​បន្ថែមទៀត​អំពី​លក្ខណៈ​នៃ​ការឃុំខ្លួន​នេះ​”​។​

លោកស្រី​បាន​បន្ថែមថា “​យើង​នឹង​បន្តធ្វើ​តំណាង​ឲ្យ​ប្រទេស​ចិន​ដើម្បី​ធានាថា បញ្ហា​នេះ​ត្រូវបាន​ដោះស្រាយ​ដោយ​តម្លាភាព​និង​យុត្តិធម៌​”​។​

ដោយ​ធ្លាប់​ត្រូវបាន​គេ​ពិពណ៌នា​ថា​ជា “​អ្នកសរសេរ​ប្លក់​នយោបាយ​ដ៏​មាន​ឥទ្ធិពល​បំផុត​” របស់​ប្រទេស​ចិន​នោះ​, លោក Yang បាន​ក្លាយជា​ពលរដ្ឋ​អូស្ត្រាលី​នៅក្នុង​ឆ្នាំ​២០០០​ប៉ុន្តែ​បច្ចុប្បន្ន​មាន​មូលដ្ឋាន​នៅ​សាកលវិទ្យាល័យ Columbia ក្នុង​ទីក្រុង​ញូវយ៉ក​។​

ការរិះគន់​របស់គាត់​ទៅលើ​រដ្ឋាភិបាល​ចិន​និង​ការគាំទ្រ​លទ្ធិប្រជាធិបតេយ្យ​កាលពី​អតីតកាល​បានធ្វើ​ឲ្យ​គាត់​ក្លាយជា​គោលដៅ​នៃ​សន្តិសុខ​របស់​រដ្ឋាភិបាល​ក្រុង​ប៉េកាំង​។​

គាត់​បាន​បាត់​ខ្លួន​ម្តង​ក្នុងអំឡុងពេល​ធ្វើដំណើរ​ឆ្នាំ​២០១១​ទៅ​ប្រទេស​ចិន​ប៉ុន្តែ​ប៉ុន្មាន​ថ្ងៃ​ក្រោយមក​គាត់​បាន​រៀបរាប់​អំពី​ការបាត់​ខ្លួន​របស់គាត់​ថា​ជា “​ការយល់ច្រឡំ​”​។​

ប៉ុន្តែ​ការឃុំ​ឃាំង​នាពេល​បច្ចុប្បន្ន​របស់គាត់​បាន​កើតឡើង​ចំពេល​មាន​ភាព​តានតឹង​ខ្លាំង​រវាង​បណ្តា​ប្រទេស​លោកខាងលិច​និង​ទីក្រុង​ប៉េកាំង​។​

ការចាប់ខ្លួន​នាពេល​ថ្មីៗ​នេះ​លើ​នាយក​ប្រតិបត្តិ​ជាន់ខ្ពស់​របស់​ក្រុមហ៊ុន​ទូរគមនាគមន៍​ចិន Huawei នៅឯ​ព្រលានយន្តហោះ​ទីក្រុង Vancouver គឺ​ត្រូវបាន​ឆ្លើយតប​វិញ​ដោយ​ការចាប់ខ្លួន​ជនជាតិ​កាណាដា​ពីររូប​។​

ទំនាក់ទំនង​រវាង​ចិន​និង​អូស្ត្រាលី​ត្រូវបាន​ប៉ះពាល់​ដោយ​ការសម្រេចចិត្ត​របស់រ​ដ្ឋា​ភិ​បាល​ក្រុង​អង់កា​រ៉ា​ក្នុងការ​ហាមឃាត់​ក្រុមហ៊ុន Huawei ពី​ការចូលរួម​ក្នុង​បណ្តាញ​ឥត​ខ្សែ 5G របស់ខ្លួន​ជុំវិញ​ការព្រួយបារម្ភ​ផ្នែក​សន្តិសុខ​ហើយ​ចំពេល​ប្រទេស​ទាំងពីរ​កំពុង​គិតគូរ​អំពី​ការបើកចំហ​បន្ថែមទៀត​នៃ​ឥទ្ធិពល​នៅក្នុង​មហាសមុទ្រ​ប៉ាស៊ីហ្វិក​៕ AFP
​

​

Source: Kampuchea Thmey Daily