អាមេរិកនិងបណ្ដាប្រទេសសំខាន់ៗនៅអាមេរិកខាងត្បូងបានទទួលស្គាល់មេដឹកនាំគណបក្សប្រឆាំងវេណេហ្ស៊ូអេឡាលោក Juan Guaido ថាជាមេដឹកនាំបណ្តោះអាសន្នកាលពីថ្ងៃពុធខណៈសហភាពអឺរ៉ុបបានអំពាវនាវឲ្យមានការបោះឆ្នោតដោយសេរីដើម្បីស្តារលទ្ធិប្រជាធិបតេយ្យឡើងវិញដែលជាហេតុទុកឲ្យលោក Nicolas Maduro ស្ថិតក្នុងភាពឯកោ។
មហាអំណាចក្នុងតំបន់ដូចជាប្រេស៊ីល កូឡុំប៊ី ឈីលី ប៉េរូនិងអាហ្សង់ទីនសុទ្ធតែបានគាំទ្រដល់ការប្រកាសខ្លួនឯងរបស់លោក Guaido ថាជាប្រធានាធិបតីស្តីទី។ លោកបានធ្វើការប្រកាសបែបនេះនៅចំពោះមុខអ្នកគាំទ្ររាប់ម៉ឺននាក់ក្នុងរដ្ឋធានី Caracas។
ទោះបីជាយ៉ាងណាក៏ដោយ ប្រទេសគុយបាបានការពារសម្ព័ន្ធមិត្តសង្គមនិយមរបស់ខ្លួនដោយបង្ហាញពី “សាមគ្គីភាព” ជាមួយលោក Maduro ខណៈប្រទេសម៉ិកស៊ិកបានផ្តល់ការគាំទ្រដល់គាត់។
ការគាំទ្រដ៏ច្រើនលើសលប់ដល់លោក Guaido បានជំរុញឲ្យមានភាពមិនប្រាកដប្រជានៅក្នុងប្រទេសវេណេហ្ស៊ូអេឡាដែលជាប្រទេសសម្បូរប្រេងប៉ុន្តែធ្លាក់ចូលក្នុងភាពក្រីក្រក្រោមការដឹកនាំរបស់លោក Maduro ។
លោក Maduro បានចូលកាន់កាប់អំណាចតាមរយៈការគាំទ្ររបស់យោធាវេណេហ្ស៊ូអេឡាហើយគាត់គឺជាសម្ព័ន្ធមិត្តរបស់ប្រទេសរុស្ស៊ីដែលកាលពីខែមុនបានបញ្ជូនយន្តហោះទម្លាក់គ្រាប់បែកសមត្ថភាពនុយក្លេអ៊ែរពីរគ្រឿងឲ្យចូលរួមក្នុងសមយុទ្ធយោធាមួយ។
ត្រឹមតែប៉ុន្មាននាទីបន្ទាប់ពីសេចក្តីប្រកាសរបស់លោក Guaido, ប្រធានាធិបតីសហរដ្ឋអាមេរិក លោក Donald Trump បានទទួលស្គាល់ថា គាត់គឺជាមេដឹកនាំបណ្តោះអាសន្នហើយបានប្រកាសថា រដ្ឋសភារបស់គាត់គឺជារដ្ឋាភិបាលស្របច្បាប់តែមួយគត់ដែលត្រូវបានជ្រើសរើសដោយប្រជាជនវេណេហ្ស៊ូអេឡា។
ស្របពេលជាមួយគ្នានោះដែរ ប្រធានាធិបតីប្រេស៊ីលលោក Jair Bolsonaro បានបង្ហោះ Twitter ចេញពីទីក្រុង Davos របស់ប្រទេសស្វីសដែលជាកន្លែងគាត់និងមេដឹកនាំដទៃទៀតចូលរួមក្នុងវេទិកាសេដ្ឋកិច្ចពិភពលោកថា “ប្រទេសប្រេស៊ីលទទួលស្គាល់លោក Juan Guaido ជាប្រធានាធិបតីស្តីទីរបស់ប្រទេសវេណេហ្ស៊ូអេឡា”។
ចំណែករដ្ឋមន្ត្រីការបរទេសកាណាដាលោកស្រី Chrystia Freeland បានបង្ហាញពីការគាំទ្រយ៉ាងពេញទំហឹងពីប្រទេសរបស់លោកស្រីដល់លោក Guaido។
សមាជិកចំនួន១១ប្រទេសនៃក្រុម Lima ដែលមានសមាជិក១៤ប្រទេសគឺអាហ្សង់ទីន ប្រេស៊ីល កាណាដា ឈីលី កូឡុំប៊ី កូស្តារីកា ហ្គាតេម៉ាឡា ហុងឌូរ៉ាស ប៉ាណាម៉ា ប៉ារ៉ាហ្គាយនិងប៉េរូក្រោយមកបានចេញសេចក្តីថ្លែងការណ៍រួមមួយដោយគាំទ្រលោក Guaido ឲ្យធ្វើជាប្រធានាធិបតីស្តីទី៕ AFP
Source: Kampuchea Thmey Daily
0 Comments