មាស សុជាតិ អ្នកប្រដាល់ក្លិបឃ្លាំងមឿងកីឡា ត្រូវគេផ្គូឲ្យជួបប្រកួតជាមួយអ្នកប្រដាល់ថៃឈ្មោះPITNAM ETH នៅក្នុងកម្មវិធីប្រដាល់TV5 by K.cement នៅសង្វៀនទូរទស្សន៍ប៉ុស្តិ៍លេខ៥ ព្រែកកំពឹស នាយប់ថ្ងៃសៅរ៍ ទី២៦ ខែមករា ឆ្នាំ២០១៩នេះ។ ពីរនាក់នេះ ជួបប្រកួតគ្នាក្នុងទម្ងន់៦៥ គីឡូក្រាម។
ជើងខ្លាំងទាំងពីរនាក់នេះ ធ្លាប់ប៉ះគ្នាម្តងហើយកាលពីឆ្នាំ២០១៧ នៅSEATV ដែលក្នុងការជួបគ្នាកាលណោះ គឺស្មើគ្នា។ ដូច្នេះ ការជួបប្រកួតលើកនេះ មិនដឹងថា នរណាជួបសំណាងល្អ នរណាជួបសំណាងអាក្រក់នោះទេ?។
មាស សុជាតិ គេវាយលឿន រហ័ស និងខ្លាំង ប៉ុន្តែហាក់ដូចជាមិនសូវមានផ្លែល្អនោះឡើយ។ ប៉ុន្តែយ៉ាងណា គេជាអ្នកប្រដាល់ដែលមានកម្លាំងកាយសម្បទារឹងមាំ។ សុជាតិ មានប្រវត្តិប្រកួតចំនួន៨៦លើក ឈ្នះ៧៦លើក ចាញ់១០លើក។
PITNAM ETH គេក៏ល្អ និងខ្លាំងដែរ។ អ្នកប្រដាល់ជើងចាស់ថៃរូបនេះ គេមានភាពខ្លាំងខាងជង្គង់ និង កែង ហើយពេលប្រកួតកៀក ឬ អោបគ្នា PITNAM ETH ក៏ប៉ិនកាច់ផ្ដួលគូប្រកួតដែរ។ គេវាយមួយៗទេ តែច្បាស់និងចំគោលដៅល្អ។ PITNAM ETH គេមានប្រវត្តិប្រកួតចំនួន៨៤លើក ឈ្នះ៦៦លើក ចាញ់១៧លើក និងស្មើ០១លើក។
ទោះជាយ៉ាងនេះក្តី សម្រាប់ការប្រកួតលើកនេះ មិនដឹងថា មាស សុជាតិ អាចឈ្នះ PITNAM ETH បានឬអត់នោះទេ ?។ តែយ៉ាងណា PITNAM ETH ប្រហែលជាមិនឈ្នះ មាស សុជាតិ នោះទេ ដោយសារគេខ្លាំងសម្រុកវាយយកៗ មិនដកដៃឡើយ។ ដោយសារបែបនេះហើយ ទើបក្រុមអ្នកវិភាគកីឡាប្រដាល់ក្នុងស្រុក ក៏គេមិនហ៊ានថា PIT NAM ETH ឈ្នះ មាស សុជាតិ នោះដែរ?។
PITNAM ETH នេះ គេធ្លាប់មកប្រកួតនៅស្រុកខ្មែរច្រើនលើកហើយកន្លងមក។ បើតាម លោក ថៃ អ៊ូ អ្នកដឹកនាំកីឡាករថៃមកប្រកួតឲ្យដឹងថា អ្នកប្រដាល់ថៃរូបនេះ មានថ្វីដៃល្អ និងវាយខ្លាំង ដោយសារគេជាជើងខ្លាំងនៅស្រុកថៃ។ គេជាអ្នកប្រដាល់ចាស់វស្សាហើយនៅស្រុកខ្មែរ ដោយគេធ្លាប់ជួបប្រកួតជាមួយអ្នកប្រដាល់យើងច្រើននាក់មកហើយ រួមទាំងធ្លាប់ចូលរួមប្រកួតដណ្ដើមខ្សែក្រវាត់ថែមទៀត។ អ្នកប្រដាល់ថៃរូបនេះ មានសមត្ថភាពបច្ចេកទេសប្រដាល់កម្រិតខ្ពស់ ដែល មាស សុជាតិ មិនអាចមើលស្រាលបានឡើយ។
ដូច្នេះ ចាំមើល មាស សុជាតិ ជួបអ្នកប្រដាល់ថៃ PITNAM ETH លើកនេះ តើគេអាចយកឈ្នះបានដែរឬអត់?៕
Source: Kampuchea Thmey Daily
0 Comments