ល្បាត​ការពារ​សុវត្ថិភាព​នៅ​ក្នុង​មូលដ្ឋាន ឃាត់ខ្លួន​ជនសង្ស័យ​បាន​ម្នាក់​ ពាក់ព័ន្ធ​រក្សាទុក​ដោយ​ខុស​ច្បាប់​នូវ​សារធាតុ​ញៀន

ភ្នំពេញ ​៖ ជន​សង្ស័យ​ម្នាក់ ​ត្រូវបាន​កម្លាំង​នគរបាល​ប៉ុស្តិ៍​រដ្ឋបាល​បឹង​សាឡាង នៃ​អធិការដ្ឋាន​នគរបាល​ខណ្ឌ​ទួលគោក​ ធ្វើការ​ឃាត់​ខ្លួន ខណៈ​ល្បាត​ការពារ​សុវត្ថិភាព​នៅ​ក្នុង​មូលដ្ឋាន ហើយ​បាន​រក​ឃើញ​ថ្នាំញៀន​នៅ​ជាប់​ខ្លួន​នោះ។

ជនសង្ស័យ​ ត្រូវបាន​ឃាត់ខ្លួន​កាលពី​ថ្ងៃ​ទី​២៣ ខែ​មករា ឆ្នាំ​២០១៩ វេលា​ម៉ោង​ប្រហែល​១១​និង​២០​នាទី ចំណុច​ផ្ទះ​លេខ​៥៣ ផ្លូវ​លេខ​៣៣៦ ​ក្រុម​ទី​២៨ ភូមិ​១០ សង្កាត់​បឹង​សាឡាង ខណ្ឌ​ទួលគោក រាជ​ធានី​ភ្នំពេញ​។​
​
ជនសង្ស័យ ឈ្មោះ តេង សុ​ត្រា ហៅ ម៉ៅ ភេទ​ប្រុស អាយុ​៣៦​ឆ្នាំ ជនជាតិខ្មែរ មុខរបរ រត់​ម៉ូតូ​កង់​បី ស្នាក់ នៅផ្ទះ​លេខ​២១A ផ្លូវ លេខ​៥៩៨ សង្កាត់​ភ្នំពេញ​ថ្មី ខណ្ឌ​សែន​សុខ រាជធានី​ភ្នំពេញ​។​ រីឯ​វត្ថុតាង​ចាប់​យក​រួមមាន ក្រាម​ពណ៌​ស​ថ្លា (​សង្ស័យ​ជា​គ្រឿងញៀន​) ចំនួន​០១​កញ្ចប់​តូច , ទូរស័ព្ទ​ដៃ​
០១​គ្រឿង​ម៉ាក Nokia ស៊េរី​105 ពណ៌​ខៀវ និង​ម៉ូតូ​កង់​បី (Pass App) ចំនួន​០១​គ្រឿង ពណ៌​ទឹកមាស ពាក់​ស្លាក​លេខ ភ្នំពេញ 1HE-1070 (​ចាប់យក​ពី​ជនសង្ស័យ ​ឈ្មោះ តេង សុ​ត្រា ហៅ ម៉ៅ )។​
​
បច្ចុប្បន្ន ជនសង្ស័យ​ខាងលើ ​កំពុង​ឃាត់ខ្លួន​ជា​បណ្ដោះអាសន្ន​ នៅ​អធិការដ្ឋាន​នគរបាល​ខណ្ឌ​ទួល​គោក ដើម្បី​ធ្វើការ​សាកសួរ និង ចាត់ការ​បន្ត​តាម​ផ្លូវ​ច្បាប់៕

 

Source: Kampuchea Thmey Daily