កណ្តាល ៖ នគរបាលប៉ុស្តិ៍ស្វាយរលំ ស្រុកស្អាង បានធ្វើការឃាត់ខ្លួនបុរសម្នាក់យោងតាមបណ្តឹងចោទប្រកាន់ចាប់រំលោភក្មួយខ្លួនឯង ពេលដែលធ្វើដំណើរជាមួយគ្នាដោយម៉ូតូមកផ្សារ តែជនសង្ស័យជាពូបានប្រកែកថាមិនបានប្រព្រឹត្តដូចការចោទប្រកាន់។
ហេតុការណ៍នេះ បានកើតឡើងកាលពីវេលាម៉ោងជាង១១ព្រឹក ថ្ងៃទី០៩ ខែមករា ឆ្នាំ២០១៩ នៅចំណុចផ្លូវលំ ស្ថិតក្នុងភូមិលេខ២ ឃុំស្វាយរលំ ស្រុកស្អាង ខេត្តកណ្ដាល។
នគរបាលស្រុកស្អាងបានឲ្យដឹងថា ជនរងគ្រោះ ឈ្មោះ ប ណ រ ភេទស្រី អាយុ១៧ឆ្នាំ ជនជាតិខ្មែរ មុខរបរកសិករ(មានស្នាមកូតចំនួន០៣កន្លែង,ដើមដៃ និងកំភួនដៃឆ្វេង) មានទីលំនៅភូមិ លេខ២ ឃុំស្វាយរលំ ស្រុកស្អាង។
ជនសង្ស័យ ឈ្មោះ ប៉ុក អាមីឡា ភេទប្រុស អាយុ៣៨ឆ្នាំ ជនជាតិខ្មែរ មានទីលំនៅភូមិសំបួរ ឃុំ សំរោង ស្រុកឯកភ្នំ ខេត្តបាត់ដំបង។
លោកវរសេនីយ៍ សេង សុជាតិ អធិការនគរបាលស្រុកស្អាងបានឲ្យដឹងតាមការអះអាងក្នុងពាក្យបណ្ដឹងថា នៅថ្ងៃទី០៩ ខែមករា ឆ្នាំ២០១៩ វេលាម៉ោង១១និង៣០នាទី មានឈ្មោះ ប៉ុក អាមីឡា(ជនសង្ស័យ) និងប្រពន្ធ បានបបួល ឈ្មោះ ប ណ វ(ជនរងគ្រោះ)ទៅរកទិញអីហូបនៅផ្សារកាច់ជ្រុងតាខ្មៅ ដោយនាំគ្នាជិះម៉ូតូ០១គ្រឿង ម៉ាកFZ ពណ៌ខៀវ កាត់ផ្លូវលំទួលអន្សែ ភូមិលេខ២ ឃុំស្វាយរលំ។ ពេលមកដល់ចំណុចកើតហេតុ បានជិះម៉ូតូចូលផ្លូវលំតូច ហើយជនសង្ស័យបានឈប់ម៉ូតូរបស់ខ្លួន ហើយដេញប្រពន្ធរបស់ខ្លួនឲ្យដើរចេញឲ្យឆ្ងាយ បន្ទាប់មក ឈ្មោះ ប៉ុក អាមីឡា បានធ្វើសកម្មភាពចាប់រំលោភជនរងគ្រោះបានសម្រេច។
ក្រោយពីជនសង្ស័យបានធ្វើសកម្មភាពចាប់រំលោភបានសម្រេចហើយ បានប្រាប់ជនរងគ្រោះ កុំឲ្យប្រាប់រឿងនេះអ្នកណាដឹងឲ្យសោះ។ បន្ទាប់មកអ្នកទាំង០៣នាក់បាននាំគ្នាជិះម៉ូតូត្រឡប់មកផ្ទះវិញ។ពេលមកដល់ផ្ទះរបស់ខ្លួន ឈ្មោះ ជនរងគ្រោះ បានរៀបរាប់ប្រាប់ម្ដាយរបស់ខ្លួន ឲ្យបានដឹងពីរឿងហេតុ។ ក្រោយមក ម្តាយជនរងគ្រោះ បានមកដាក់ពាក្យបណ្ដឹងនៅប៉ុស្ដិ៍នគរបាលរដ្ឋបាលស្វាយរលំ ហើយសមត្ថកិច្ចនគរបាលបានធ្វើការកោះហៅ ឈ្មោះ ប៉ុក អាមីឡា មកសាកសួរ។
ជនសង្ស័យ បានប្រកែកថា មិនបានប្រព្រឹត្តដូចការរៀបរាប់របស់ជនរងគ្រោះទេ។ ទោះយ៉ាងណាដោយផ្អែកលើវត្ថុតាង និងការៀបរាប់រសប់ជនរងគ្រោះ សមត្ថកិច្ចជំនាញបានកសាងសំណុំរឿងតាមនីតិវិធីបញ្ជូនទៅកាន់តុលាការចាត់ការតាមផ្លូវច្បាប់៕
Source: Kampuchea Thmey Daily
0 Comments