ប្រធានាធិបតីអាមេរិកលោក Donald Trump បាននិយាយថា “លាហើយ” និងបានដើរចេញពីកិច្ចចរចាកាលពីថ្ងៃពុធស្តីពីការផ្តល់មូលនិធិដល់ជញ្ជាំងព្រំដែនអាមេរិក - ម៉ិកស៊ិកនៅពេលដែលគូប្រជែងខាងគណបក្សប្រជាធិបតេយ្យបានបដិសេធយល់ព្រមចំពោះគម្រោងនេះ។
លោក Trump បានបង្ហោះ Twitter អំពីជំនួបនៅសេតវិមានរបស់គាត់ជាមួយនឹងមេដឹកនាំកំពូលនៃសភាបក្សប្រជាធិបតេយ្យថា “ខ្ជះខ្ជាយពេលវេលាទាំងស្រុង។ ខ្ញុំបាននិយាយថាលាហើយ គ្មានអ្វីផ្សេងទៀតឡើយ!”។
លោក Chuck Schumer ដែលជាអ្នកប្រជាធិបតេយ្យជាន់ខ្ពស់នៅក្នុងព្រឹទ្ធសភាបានប្រាប់អ្នកកាសែតថា “លោក Trump បានទះតុហើយបន្ទាប់មកបានក្រោកឡើងនិងដើរចេញ”។ លោក Schumer បន្តថា “ជាថ្មីម្តងទៀតយើងបានឃើញពីកំហឹងដ៏ខ្លាំងក្លាព្រោះគាត់មិនអាចទទួលបានតាមមធ្យោបាយរបស់គាត់”។
យោងតាមអ្នកគាំទ្រលោក Trump នៅក្នុងកិច្ចប្រជុំនោះបានឲ្យដឹងថា លោកប្រធានាធិបតីបានសួរមេដឹកនាំគណបក្សប្រជាធិបតេយ្យថា តើពួកគេនឹងយល់ព្រមផ្តល់មូលនិធិដល់គម្រោងជញ្ជាំងរបស់គាត់ដើម្បីជាការផ្លាស់ប្តូរឲ្យគាត់បញ្ចប់ការបិទដ៏ឈឺចាប់នៃរដ្ឋាភិបាលដែរឬអត់។
លោក Kevin McCarthy ជាសមាជិកគណបក្សសាធារណរដ្ឋជាន់ខ្ពស់នៅក្នុងសភាដែលក៏មានវត្តមានផងដែរនោះបានថ្លែងថា “ប្រធានសភាគណបក្សប្រជាធិបតេយ្យលោកស្រី Nancy Pelosi បានលើកដៃឡើងហើយនិយាយថា ទេ! មិនមានអ្វីទាល់តែសោះ”។
ស្របពេលជាមួយគ្នានោះដែរ អនុប្រធានាធិបតីលោក Mike Pence បាននិយាយថា “យើងបានឮជាថ្មីម្តងទៀតថា បណ្តាមេដឹកនាំគណបក្សប្រជាធិបតេយ្យមិនចង់ចរចា”។ លោកអនុប្រធានាធិបតីបានទទូចថាលោក Trump បានចូលមកក្នុងកិច្ចប្រជុំនេះដោយមានជំនឿយ៉ាងមុតមាំ។
លោក Trump ត្រូវការប្រាក់ចំនួន៥.៧ពាន់លានដុល្លារដើម្បីផ្តល់មូលនិធិដល់ជញ្ជាំងដែលគាត់និយាយថាជាការចាំបាច់ដើម្បីរារាំងជនអន្តោប្រវេសន៍ខុសច្បាប់ អ្នកជួញដូរគ្រឿងញៀននិងអ្នកជួញដូរមនុស្សមកពីប្រទេសម៉ិកស៊ិក។
ទោះបីជាយ៉ាងណាក៏ដោយ គណបក្សប្រជាធិបតេយ្យបាននិយាយថា ជញ្ជាំងនេះនឹងមានឥទ្ធិពលតិចតួចលើបញ្ហាព្រំដែនពិតប្រាកដហើយថា វិធីសាស្ត្រដ៏តឹងតែងរបស់លោក Trump នឹងបង្កើតឲ្យមានវិបត្តិមនុស្សធម៌មួយក្នុងចំណោមជនឥន្តោប្រវេសន៍ដែលងាយរងគ្រោះនិងជនឥន្តោប្រវេសន៍ដែលមិនបង្កការគំរាមកំហែង។
គណបក្សប្រជាធិបតេយ្យបានទទូចថា ពួកគេនឹងមិនដកការជំទាស់របស់ពួកគេចំពោះគម្រោងជញ្ជាំងទេហើយជឿជាក់ថា ជនជាតិអាមេរិកនឹងធុញទ្រាន់ចំពោះភាពចលាចលនៃការបិទរដ្ឋាភិបាលហើយពួកគេនឹងបន្ទោសដល់លោក Trump៕ AFP
Source: Kampuchea Thmey Daily
0 Comments