ម្ចាស់ជើងឯកនៃពានរង្វាន់លីគកំពូលកម្ពុជា (Metfone Cambodian League 2018) ក្លិបណាហ្គាវើល បានចេញទៅបោះជុំរុំហ្វឹកហាត់និងប្រកួតមិត្តភាពកម្តៅសាច់ដុំដកស្រង់បច្ចេកទេសនៅប្រទេសថៃ ដើម្បីត្រៀមមុនពេលចេញទៅប្រកួតក្នុងពានរង្វាន់លំដាប់ទី២ប្រចាំទ្វីបអាស៊ី (AFC Cup 2019) នៅខែកុម្ភៈ ខាងមុខ។
ក្រុមណាហ្គាវើល បានធ្វើដំណើរទៅកាន់ប្រទេសថៃ នៅព្រឹកថ្ងៃអង្គារ សប្ដាហ៍នេះ ខណៈនៅពេលល្ងាចឡើងត្រូវប្រកួតមិត្តភាពនៅប្រទេសថៃ តែម្តង។ ក្រុមណាហ្គាវើល បានប្រកួតចាញ់ក្រុមPolice Tero សមាជិកពានរង្វាន់លីគកំពូលថៃនៅល្ងាចថ្ងៃទី៨ ខែមករា នេះខណៈតាមគម្រោងនៅថ្ងៃទី ៩ ខែ មករា បន្តប៉ះក្រុមAssumption Unitedសមាជិកពានរង្វាន់លីគលំដាប់ទី៤របស់ថៃ ហើយនៅថ្ងៃទី ១០ ខែ មករា ជួបក្រុមBG Pathum United សមាជិកពានរង្វាន់លីគលំដាប់ទី២ប្រទេសថៃ និងប្រកួតចុងក្រោយនៅថ្ងៃទី ១២ ខែ មករា ណាហ្គាវើលគ្រោងប៉ះក្រុមTratFC សមាជិកពានរង្វាន់លីគលំដាប់ទី២ថៃដែរ។
តាមផែនការរបស់ក្លិបគឺលោក មាស ចាន់ណា ដែលជាគ្រូបង្វឹកនឹងដឹកនាំកីឡាករទាំងខ្មែរនិងបរទេសដែលទើបចុះកិច្ចសន្យារួមធ្វើតេស្តសមត្ថភាពទៅប្រទេសថៃ ចាប់ពីថ្ងៃទី៨ដល់១៥ ខែមករា ឆ្នាំ២០១៨ ខាងមុខ ពោលគឺត្រៀមប្រកួតមិត្តភាព៤ប្រកួតនៅទីនោះ។ ក្រោយចប់ការការប្រកួតមិត្តភាពនៅក្រៅប្រទេសនេះត្រូវបន្តទៅប្រកួតក្នុងពានរង្វាន់ AFC Cup 2019 វិញម្តង។
សូមបញ្ជាក់ថា ក្រុមណាហ្គាវើល ស្ថិតនៅពូល F ក្នុងពានរង្វាន់ AFC Cup 2019 ជាមួយក្រុម Hanoi FC (ម្ចាស់ជើងឯកលីគកំពូលវៀតណាម) ក្រុមTampines Rovers ( ជើងឯករងលីគកំពូលសិង្ហបុរី ) និង Yangon United ( ជើងឯកលីគកំពូលមីយ៉ាន់ម៉ា) ឬ ZwekapinUnitedក្រុមលេខ៣នៅលីគមីយ៉ាន់ម៉ា ដូចគ្នា។ តាមគម្រោងការប្រកួតនឹងចាប់ផ្ដើមនាខែ កុម្ភៈ ដើមឆ្នាំក្រោយតាមរូបមន្តវិលជុំសន្សំពិន្ទុ សរុបស្មើ៦ប្រកួត (ក្នុងដីនិងក្រៅដី) ដើម្បីយកតែមួយក្រុមឡើងទៅវគ្គបន្ត ដោយគ្រោងនឹងបញ្ចប់ការប្រកួតទាំងមូលនៅដើមខែតុលា ឆ្នាំ២០១៩។ នេះជាឆ្នាំទី១ សម្រាប់ណាហ្គាវើល ក្នុងការប្រកួតនៅវគ្គបែងចែកពូលបន្ទាប់ពីបានក្លាយជាម្ចាស់ជើងឯកលីគកំពូលកម្ពុជា ឆ្នាំ២០១៨ ខណៈកាលពីឆ្នាំ២០១៧ ធ្លាប់បានចូលរួមប្រកួតម្តងតែត្រូវប្រកួតជម្រុះនៅវគ្គជម្រុះបឋម៕
Source: Kampuchea Thmey Daily
0 Comments