ស្វាយរៀង ៖ នៅព្រឹកថ្ងៃទី០១ ខែមករា ឆ្នាំ២០១៩ នេះ លោក ម៉ែន វិបុល អភិបាល នៃគណៈអភិបាលខេត្តស្វាយរៀង បានអញ្ជើញជាអធិបតីភាពក្នុងពិធីប្រកាសទទួលស្គាល់សមាគមអ្នកជិះកង់ដើម្បីសុខភាព និងការអភិវឌ្ឍន៍ ស្ថិតនៅសាលប្រជុំស្នងការដ្ឋាននគរបាលខេត្ត។ អញ្ជើញចូលរួមក្នុងពិធីនេះមានលោកអភិបាលរងខេត្ត លោកស្នងការ ស្នងការរងនគរបាលខេត្តលោកមេបញ្ជាការតំបន់ប្រតិបត្តិការសឹករងខេត្ត លោកមេបញ្ជាការរងកងរាជអាវុធហត្ថខេត្ត លោកអភិបាលក្រុង/ស្រុក លោក លោកស្រី ប្រធានមន្ទីរអង្គភាពនានា លោក លោកស្រី សមាជិក សមាជិកា សមាគមអ្នកជិះកង់ដើម្បីសុខភាព និងការអភិវឌ្ឍន៍ ខេត្តស្វាយរៀង សរុបប្រមាណជាង២០០នាក់។
លោកអភិបាលខេត្ត មានប្រសាសន៍កោតសរសើរ និងផ្ដាំផ្ញើដល់សមាជិក សមាជិកាសមាគម និងអាជ្ញាធរពាក់ព័ន្ធនូវចំណុចសំខាន់ៗមួយចំនួនដូចជា ៖
-សមាគម បានផ្តល់ផលប្រយោជន៍ជាច្រើនដល់ សមាជិក សមាជិកា ទាំងអស់ ដែលបានចូលរួមជាសមាជិកក្នុងធាក់កង់ហាត់ប្រាណជាក្រុមរៀងរាល់ព្រឹកព្រលឹមដើម្បីសុខភាព។
-ស្របពេលដែលខេត្តស្វាយរៀងរបស់យើងកំពុងតែទទួលបាននូវអ្នកវិនិយោគជាបន្តបន្ទាប់ និងកំណើនអភិវឌ្ឍន៍កាន់តែទៅមុខ ចំពោះក្រុងស្វាយរៀងអ្នកទទួលបន្ទុកភ្លើងដែលពាក់ព័ន្ធទាំងអស់ត្រូវពិនិត្យ និងដោះដូរឱ្យឲ្យភ្លឺឡើងវិញ នូវភ្លើងបំភ្លឺផ្លូវសាធារណៈ ដើម្បីងាយស្រួលប្រជាពលរដ្ឋ ក៏ដូចជាការជិះកង់ហាត់ប្រាណនៅពេលយប់។
-ចំពោះការធ្វើច្រាំងទន្លេវ៉ៃគោរដ្ឋបាលខេត្តនិងបន្តធ្វើនាដើមឆ្នាំ២០១៩នេះ ក្នុងនោះខេត្តនឹងរៀបចំជាសួនច្បារ កន្លែងហាត់ប្រាណ ព្រមទាំងបន្ថែមសម្ភារៈហាត់ប្រាណសម្រាប់បងប្អូនប្រជាពលរដ្ឋ ទូទៅមកចូល រួមលេងកម្សាន្តនឹងហាត់ប្រាណនូវទីនេះផងដែរ។
-ការចូលជាសមាជិកសមាគមនេះ មិនប្រកាន់និន្នាការនយោបាយអ្វីឡើយ ព្រោះថាសមាគម មានចែងនូវលក្ខន្តិកៈច្បាស់លាស់ហើយសម្រាប់បងប្អូនប្រជាពលរដ្ឋទូទៅចូលជាសមាជិកសមាគម។
-សមាគមត្រូវរៀបចំបង្កើតឲ្យមានកម្មវិធីប្រកួតយករង្វាន់នានាជាបន្តបន្ទាប់ទៀត ដូចជាចូលរួមប្រកួតក្នុងកម្មវិធីសង្ក្រាន្តស្វាយរៀងជាដើម។
លោកអភិបាលខេត្តបានបន្ថែមថា សមាជិក សមាជិកា សមាគម ទាំងអស់ត្រូវបន្ត សកម្មភាពសមាគមឲ្យបានផុលផុស ក្នុងនោះមន្ទីរអប់រំត្រូវរៀបចំដាក់បញ្ចូលប្រភេទកីឡាធាក់កង់របស់សមាគម ក្នុងការប្រកួតកីឡាថ្នាក់ជាតិនាពេលខាងមុខ ដើម្បីយកជ័យលាភីជូនខេត្តស្វាយរៀងរបស់យើង៕
Source: Kampuchea Thmey Daily
0 Comments