សេចក្តីប្រកាសរបស់លោកប្រធានាធិបតី Donald Trump នៅក្នុងការនិយាយទូរស័ព្ទជាមួយលោក Tayyip Erdogan ដែលថាលោកនឹងដកកងទ័ពអាមេរិកចេញពីប្រទេសស៊ីរីបានធ្វើឲ្យប្រទេសទួរគីមានការភ្ញាក់ផ្អើល ហើយបានធ្វើឲ្យទួរគីត្រូវប្រញាប់ប្រញាល់ដើម្បីឆ្លើយតបទៅនឹងការផ្លាស់ប្តូរសមរភូមិនៅតាមព្រំដែនភាគខាងត្បូងរបស់ខ្លួន។
ក្រុមមន្ត្រីអាមេរិកបាននិយាយថា នៅក្នុងការហៅទូរស័ព្ទកាលពីពីរសប្តាហ៍មុន លោក Trump ត្រូវបានគេរំពឹងថានឹងផ្តល់ការព្រមានស្តង់ដារមួយដល់ប្រធានាធិបតីទួរគីអំពីផែនការរបស់គាត់ក្នុងការបើកការវាយប្រហារឆ្លងកាត់ព្រំដែនមួយដែលសំដៅទៅលើកងកម្លាំងឃឺដដែលគាំទ្រដោយអាមេរិកនៅភាគឦសានប្រទេសស៊ីរី។
ផ្ទុយទៅវិញ នៅក្នុងការពិភាក្សាគ្នានោះ លោក Trump បានកែប្រែគោលនយោបាយរបស់សហរដ្ឋអាមេរិកនៅមជ្ឈឹមបូព៌ាដោយបោះបង់ចោលទឹកដីស៊ីរីមួយភាគបួនហើយប្រគល់កិច្ចការដល់ក្រុងអង់ការ៉ាឲ្យបញ្ចប់ក្រុមរដ្ឋឥស្លាមនៅប្រទេសស៊ីរី។
មន្ត្រីទួរគីម្នាក់បានប្រាប់រ៉យទ័រថា “លោក Trump សួរថា: ប្រសិនបើយើងដកទ័ពរបស់យើង តើអ្នកអាចបោសសម្អាតក្រុម ISIS បានដែរឬទេ? ”។ មន្ត្រីរូបនេះបាននិយាយថា លោក Erdogan បានឆ្លើយតបថា កងកម្លាំងទួរគីនឹងបំពេញភារកិច្ចនេះ។
មន្ត្រីម្នាក់ក្នុងចំណោមមន្ត្រីទួរគីចំនួន៥នាក់ដែលនិយាយទៅកាន់រ៉យទ័រអំពីការហៅទូរស័ព្ទកាលពីថ្ងៃទី១៤ខែធ្នូរវាងមេដឹកនាំទាំងពីរបាននិយាយថា “ខ្ញុំត្រូវតែនិយាយថា វាជាការសម្រេចចិត្តដែលមិនបានរំពឹងទុកជាមុន”។
ក្រុមមន្ត្រីអាមេរិកបាននិយាយថា ការសម្រេចចិត្តរបស់លោក Trump ក៏បានបង្កការភ្ញាក់ផ្អើលនៅទីក្រុងវ៉ាស៊ីនតោនផងដែរដោយមន្ត្រីរដ្ឋបាលជាន់ខ្ពស់រួមទាំងរដ្ឋមន្ត្រីការពារជាតិលោក Jim Mattis ផងដែរបានព្យាយាមជាច្រើនថ្ងៃដើម្បីផ្លាស់ប្តូរគំនិតរបស់លោកប្រធានាធិបតី។
នៅក្នុងដំណើរទស្សនកិច្ចទៅកាន់មូលដ្ឋានទ័ពអាកាសអាមេរិកក្នុងប្រទេសអ៊ីរ៉ាក់នៅសប្តាហ៍នេះ លោក Trump បាននិយាយថា ក្រុមមេបញ្ជាការយោធាបានស្នើសុំម្តងហើយម្តងទៀតឲ្យមានការពន្យារពេលសម្រាប់កងទ័ពអាមេរិក២,០០០នាក់នៅក្នុងប្រទេសស៊ីរីប៉ុន្តែការស្នើសុំនេះត្រូវបានលោកបដិសេធដោយសារតែលោកនិយាយថា ក្រុមរដ្ឋឥស្លាមត្រូវបានកម្ចាត់ភាគច្រើន៕ REUTERS
Source: Kampuchea Thmey Daily
0 Comments