ភ្នំពេញ ៖ ស្ត្រីម្នាក់ បានស្លាប់ និងបុរសពីរនាក់ទៀត រងរបួសធ្ងន់ ក្នុងហេតុការណ៍គ្រោះថ្នាក់ចរាចរណ៍។ តាមប្រភពពី លោកវរសេនីយ៍ទោ ឯក សារ៉ន អធិការរងខណ្ឌច្បារអំពៅ ទទួលបន្ទុកសណ្ដាប់ធ្នាប់បានឲ្យដឹងថា កាលពីវេលាម៉ោង២០និង១៥នាទីយប់ ថ្ងៃទី៣១ធ្នូនេះ មានករណីគ្រោះថ្នាក់ចរាចរណ៍មួយបានកើតឡើងនៅតាមបណ្ដោយផ្លូវ៣៦៩ ភូមិកោះក្របី សង្កាត់ព្រែកថ្មី ខណ្ឌច្បារអំពៅ រាជធានីភ្នំពេញ ដែលបណ្តាលឲ្យមុស្សម្នាក់ស្លាប់ និង២នាក់ទៀតរងរបួសយ៉ាងធ្ងន់ធ្ងរ។
លោកអធិការរងបានបន្តថា នៅមុនពេលគ្រោះថ្នាក់ សាក្សីបានឃើញម៉ូតូម៉ាកសង់ស៊េរី២០១៥ ពណ៌ខ្មៅ ពាក់ស្លាកលេខភ្នំពេញ1DD 59 02 បើកបរដោយ ឈ្មោះ ហឹម វិបុល ភេទប្រុស អាយុ៤៥ឆ្នាំមុខរបរគ្រូបង្រៀន មានទីលំនៅភូមិកោះក្របី សង្កាត់ព្រែកថ្មី បានឌុបស្ត្រីម្នាក់ ឈ្មោះ នួន សីហា អាយុ៣១ឆ្នាំ មុខរបរកម្មករកាត់ដេរ និងមានទីលំនៅភូមិកោះក្របី១ សង្កាត់ព្រែកថ្មី ដោយធ្វើដំណើរតាមបណ្ដោយផ្លូវ៣៦៩ ក្នុងទិសដៅពីត្បូងមកជើង។
លុះមកដល់ចំណុចកើតហេតុ បានបត់ស្តាំ មិនបានងាកមើលក្រោយ ក៏ស្រាប់តែមានម៉ូតូសង់ ពណ៌ខ្មៅ ពាក់ស្លាកលេខបាត់ដំបង1R 87 98 បើកបរដោយ ឈ្មោះ ទិន វ៉េវ ភេទប្រុស អាយុ១៨ឆ្នាំ មុខរបរកម្មករសំណង់ មានទីលំនៅភូមិបន្ទាយមាស ឃុំហុងស៊ុយ ស្រុកបន្ទាយមាសខាងលិច ខេត្តកំពត ដែលបើកមកពីក្រោយ បានបុកពីចំហៀង បណ្តាលឲ្យស្ត្រីដែលជិះពីក្រោយម៉ូតូសង់២០១៥ បានស្លាប់ និងអ្នកឌុប ហើយយុវជនដែលមកបុកក៏រងរបួសធ្ងន់ធ្ងរទៀតផង។
លោកអធិការរងបានបញ្ជាក់ថា ករណីគ្រោះថ្នាក់ចរាចរណ៍នេះ គឺបង្កឡើងដោយម៉ូតូសង់២០១៥បើកបត់ស្តាំអត់មើលក្រោយ៕
Source: Kampuchea Thmey Daily
0 Comments