កណ្តាល ៖ សមត្ថកិច្ចនគរបាលបានចាប់ខ្លួនបុរស២នាក់ កំពុងធ្វើសកម្មភាពយកថ្នាំញៀនមកលក់ចែកចាយដោយខុសច្បាប់ នៅចំណុចភូមិពោធិតូច ជាប់ផ្លូវជាតិលេខ៥ ស្ថិតក្នុងឃុំកំពង់លួង ស្រុកពញាឮ ខេត្តកណ្តាល កាលពីវេលាម៉ោង២១និង៣០នាទីយប់ ថ្ងៃទី១៦ ខែមករា ឆ្នាំ២០១៩។
ក្រុមជនសង្ស័យដែលត្រូវបានចាប់ខ្លួនខាងលើ១.ឈ្មោះ សាយ សុភក្តិ អាយុ៣១ឆ្នាំ ជនជាតិខ្មែរគ្មានមុខរបរ មានទីលំនៅភូមិចេតិយថ្មី ឃុំវិហារលួង ស្រុកពញាឮ ខេត្តកណ្តាល។ ២.ឈ្មោះ ទឹម សារ៉ាក់ អាយុ៣៣ឆ្នាំ ជនជាតិខ្មែរ មានមុខរបរ ធ្វើចុងភៅ មានទីលំនៅភូមិចេតិយថ្មី ឃុំវិហារលួង ស្រុកពញាឮ ខេត្តកណ្តាល។
ប៉ូលិសនិយាយថា នៅមុនពេលកើតហេតុមានគេរាយការណ៍មកថា មានបុរស២នាក់ ជនសង្ស័យខាងលើកំពុងធ្វើសកម្មភាពយកថ្នាំញៀនមកលក់ចែកចាយអោយក្មេងៗនៅក្នុងភូមិប្រើប្រាស់។ ក្រោយពីទទួលបាននូវព័ត៌មាននេះលោក ដួង តេង អធិការនគរបាលខណ្ឌសែនសុខបាន ដឹកនាំកម្លាំងចុះទៅត្រួតពិនិត្យឃើញមានសកម្មភាពដូច្នេះមែនក៏បង្ក្រាបបានតែម្តង។
នៅក្នុងការបង្ក្រាបនោះ សមត្ថកិច្ចបានរកឃើញនូវវត្ថុតាងចាប់បានមានដូចជា ថ្នាំញៀនប្រភេទមេតំហ្វេតាមីន ឬហៅថា ម៉ាទឹកកក(ice)ចំនួន៣កញ្ចប់តូចទម្ងន់ ០,២០ក្រាម និងទូរស័ព្ទ២គ្រឿង ម៉ាកoppo១គ្រឿង និង HiyA១ គ្រឿង បែក) ម៉ូតូ ០១គ្រឿង ម៉ាក សង់កូរ៉េ ស្លាកលេខកំពង់ចាម 1Q1765 ព្រមទាំងលុយកាក់មួយចំនួនទៀត។
ជនសង្ស័យបានសារភាពថា ថ្នាំញៀនដែលខ្លួនបានយកមកលក់នេះគឺបានទិញពីបុរសម្នាក់ឈ្មោះ ទែល នៅភ្នំពេញ ម្តុំគល់ស្ពានព្រែកព្នៅ សង្កាត់ស្វាយប៉ាក ដោយទិញមកម្តងៗចាប់ពី៣០ម៉ឺនរៀល ទៅ៤០ម៉ឺនរៀល ដើម្បីយកមកច្រកថង់ជាកញ្ចប់តូចៗលក់យកចំណេញក្នុងតម្លៃ៤ម៉ឺនរៀលក្នុង១កញ្ចប់តូច។ ពួកគេក៏ត្រូវបានរកឃើញថា មានផ្ទុកនូវសារធាតុញៀនក្នុងទឹកនោមផងដែរ៕
Source: Kampuchea Thmey Daily
0 Comments