ឃាត់ខ្លួន​ជនសង្ស័យ​២​នាក់ ​ករណី​ឆក់​កាបូបស្ពាយ

ភ្នំពេញ ៖ នគរបាល​ការិយាល័យ​ព្រហ្មទណ្ឌ​កំរិត​ស្រាល​រាជធានី​ភ្នំពេញ បាន​ស្រាវជ្រាវ​ឃាត់​ជនសង្ស័យ​២​នាក់ ដែល​បាន​ប្រព្រឹត្ត​បទល្មើស អំពើ​លួច​មាន​ស្ថាន​ទម្ងន់ទោស (​ឆក់​កាបូបស្ពាយ ពណ៌ ខ្មៅ​) ។

សមត្ថកិច្ច​ប្រាប់​ឲ្យ​ដឹង​ថា កាលពី​ថ្ងៃទី​១៤ ខែមករា ឆ្នាំ២០១៩ វេលា​ម៉ោង ២២ និង ០០ នាទី កម្លាំង​ជំនាញ​របស់​ការិយាល័យ​នគរបាល​ព្រហ្មទណ្ឌ​កម្រិត​ស្រាល​រាជធានី​ភ្នំពេញ បាន​ស្រាវជ្រាវ ឃាត់ខ្លួន​ជនសង្ស័យ ២ នាក់ នៅ​ចំណុច​ផ្លូវ​លេខ​៥១ សង្កាត់​ចតុមុខ ខណ្ឌដូនពេញ រាជធានី​ភ្នំពេញ ដែល​បាន​ប្រព្រឹត្ត​បទល្មើស អំពើ​លួច​មាន​ស្ថាន​ទម្ងន់ទោស (​ឆក់​កាបូបស្ពាយ ពណ៌ ខ្មៅ​)។

ហេតុការណ៍​កើតឡើង នៅ​ចំណុច​មុខ​ស្តូប​កម្ពុជា​វៀតណាម ផ្លូវ​សុធារស ភូមិ​២ សង្កាត់​ចតុមុខ ខណ្ឌដូនពេញ រាជធានី​ភ្នំពេញ កាលពី​ថ្ងៃទី​២៦ ខែធ្នូ ឆ្នាំ​២០១៨ វេលា​ម៉ោង ២១និង៣០នាទី។

វត្ថុតាង​ចាប់​យក​ម៉ូតូ​ជា​មធ្យោបាយ​ធ្វើ​សកម្មភាព ចំនួន ០២ គ្រឿង និង​ភស្តុតាង​ជា​របស់​ជនរងគ្រោះ បញ្ជូន​មកកាន់​ការិយាល័យ​នគរបាល​ព្រហ្មទណ្ឌ​កម្រិត​ស្រាល​រាជធានី​ភ្នំពេញ ដើម្បី​ចាត់ការ​តាម​នីតិវិធី។



ជនសង្ស័យ​ទាំង​២​នាក់​ ដែល​ត្រូវ​ឃាត់ខ្លួន ១-​ឈ្មោះ ហុង ម៉េង​ហ៊ត់ ភេទប្រុស អាយុ២៧ឆ្នាំ មុខរបរ​ជាងទង ស្នាក់​នៅផ្ទះ​មិន​ចាំ​លេខ ផ្លូវ​លេខ​៥៩៨ សង្កាត់​ទួល​សង្កែ​២ ខណ្ឌ​ឫស្សី​កែវ រាជធានី​ភ្នំពេញ​ ២-​ឈ្មោះ ធឿន ជា ភេទប្រុស អាយុ២៤ឆ្នាំ មុខរបរ​មិន​ពិតប្រាកដ ស្នាក់នៅ​មិន​ពិតប្រាកដ​វត្ថុ​តាង​ចាប់​យក ម៉ូតូ ម៉ាក​ស៊ុយ​ហ្សុ​យ​គី​ឡេ​ត ពណ៌ ស គ្មាន​ស្លាក​លេខ ចាប់​យក​ពី​ឈ្មោះ ហុង ម៉េង​ហ៊ត់ ម៉ូតូ ម៉ាក ស៊ុយ​ហ្សុ​យ​គី​ឡេ​ត ពណ៌ ទឹកប្រាក់ ពាក់​ស្លាក​លេខ ១HJ-៥៦៩៤ , ទូរ​ស័ព្ទ​ដៃ ចំនួន ០២ គ្រឿង ម៉ាក អាយ​ហ្វូ​ន 6s ពណ៌ទឹកប្រាក់ ចិញ្ចៀន​លោហធាតុ ពណ៌ លឿង​ស្លេក ចំនួន ០២ វង់ , ខ្សែក ចំនួន ០១ ខ្សែ ,​បណ្តោង​រូប​ឆ្កែ ចំនួន ០១ ចាប់យក​ពី​ឈ្មោះ ធឿន ជា​ភស្តុតាង​របស់​ជនរងគ្រោះ ដែល​ចាប់​យក​បាន នាឡិកា​ដៃ ម៉ាក CARTIER ខ្សែ​ស្បែក ពណ៌សូកូឡា ដាំ​ត្បូង​ពណ៌ស ចំនួន​១៣៤​គ្រាប់ , ខ្សែក លោហធាតុ ពណ៌ លឿង​ស្លេក មាន​បន្តោង​រូប​ព្រះ​ចំនួន ០១ ដាំ​ត្បូង​ពណ៌​ស​ចំនួន ២៥ គ្រាប់ និង​ប្រាក់​ដុល្លារ​ចំនួន​២៥០០​ដុល្លារ​អាមេរិក។

ជនរងគ្រោះ​មានឈ្មោះ ទូ សុទ្ធា ភេទប្រុស អាយុ៣៥ឆ្នាំ ស្នាក់​នៅផ្ទះ​លេខ ៦២ ផ្លូវ​លេខ​៨ សង្កាត់​ឫស្សី​កែវ ខណ្ឌ​ឫស្សី​កែវ រាជធានី​ភ្នំពេញ មុខរបរ លក់ដូរ​សម្ភារៈ​បាត់បង់ កាបូបស្ពាយ ពណ៌ខ្មៅ ចំនួន​០១ , លិខិតឆ្លងដែន​វៀតណាម​ឈ្មោះ PHAN THI THANH HOAN ចំនួន ០១, អត្តសញ្ញាណ​ប័ណ្ណ​សញ្ជាតិ​វៀតណាម​ចំនួន ០១,-​ខ្សែក​មាស​ទម្ងន់ ៣​តម្លឹង​កន្លះ ចំនួន ០១​ខ្សែ​,-​នាឡិកា​ដៃ​ស្រី​ចំនួន ០១ ,-​ប្រាក់​វៀតណាម ៤​លាន​ដុង​,-​ប្រាក់​ដុល្លារ ៤៦០០០ ដុល្លារ​អាមេរិក និង​ទូរស័ព្ទ​ដៃ ម៉ាក IPhoneX ចំនួន ០១។

បច្ចុប្បន្ន​ជនសង្ស័យ និង​វត្ថុ​តាង​ទាំងអស់ ការិយាល័យ​បាន​កសាង​សំណុំរឿង បញ្ជូន​ទៅ​សាលាដំបូង​រាជធានី​ភ្នំពេញ ចាត់ការ​តាម​នីតិវិធី៕

Source: Kampuchea Thmey Daily