ភ្នំពេញ ៖ កម្មករសំណង់ម្នាក់ ត្រូវបានជនសង្ស័យមួយក្រុមមានគ្នា៤នាក់ ជិះម៉ូតូពីរគ្រឿងចូលទៅកាប់បណ្ដាលឲ្យស្លាប់ភ្លាមៗនៅក្នុងថ្លុកឈាមយ៉ាងអាណោចអាធ័មក្នុងបរិវេណក្រុមហ៊ុនក្រឡុកស៊ីម៉ងត៍យីហោ(ណានតុង ហ្សុងរ៉ាន់ ខនគ្រីត ខាមបូឌា ឯ-ក )។ ក្រោយកើតហេតុ រត់គេចខ្លួនបាត់គេសង្ស័យគំនុំ។
ហេតុការណ៍ បង្កឲ្យមានការភ្ញាក់ផ្អើលនេះ កើតឡើងកាលពីវេលាម៉ោង១៨និង៣០នាទីយប់ ថ្ងៃទី៥ខែមករា ឆ្នាំ២០១៩ ស្ថិតនៅក្នុងបរិវេណក្រុមហ៊ុនក្រឡុកស៊ីម៉ងត៍យីហោ(ណានតុង ហ្សុងរ៉ាន់ ខនគ្រីត ខាមបូឌា ឯ-ក )តាមបណ្ដោយផ្លូវ៣ស្ថាប័ន ភូមិទួលសំពៅ សង្កាត់ទួលសង្កែ១ ខណ្ឌឫស្សីកែវ។
សពជនរងគ្រោះ(ស្លាប់)មានឈ្មោះរ៉ាន វៃ ភេទប្រុស អាយុ៣០ឆ្នាំ មុខរបរកម្មករសំណង់ ស្នាក់នៅនៅកន្លែងកើតហេតុ មានស្រុកកំណើត ភូមិសេរីអា ឃុំក្រស់ ស្រុករមាសហែក ខេត្តស្វាយរៀង។
តាមប្រភពពីសន្តិសុខយាមនៅក្នុងការដ្ឋានបានឲ្យដឹងថា មុនពេលកើតហេតុនៅវេលាម៉ោង១៨និង០០នាទី ខ្ញុំបាទបានមកដល់ក្នុងការដ្ឋានចិនរួចហើយខ្ញុំបានប្ដូរវេនពីកម្លាំងសន្តិសុខយាមពេលព្រឹកឈ្មោះកែវ ភារិន ភេទប្រុស អាយុ៣៨ឆ្នាំ ពេលខ្ញុំបានប្តូរវេនជាមួយគាត់រួចហើយ គាត់ក៏បានចេញទៅផ្ទះ។ មួយសន្ទុះក្រោយមក នៅវេលាម៉ោង១៨និង៣០នាទីថ្ងៃដដែល ក៏មានបុរសម្នាក់បើករ៉ឺម៉កកង់បីមួយគ្រឿងដឹកស្រាបៀរចូលមកដើម្បីឲ្យប្រពន្ធរបស់គាត់លក់នៅក្នុងការដ្ឋានក្បែរកន្លែងកើតហេតុ ហើយក៏បានប្រើគាត់ឲ្យជួយលើកស្រាបៀរយកឲ្យប្រពន្ធគាត់នៅខាងក្នុង។ ពេលនោះស្រាប់តែឮសំឡេងឆោឡោ រួបគាត់បានរត់ចេញមកវិញ ក៏ឃើញជនរងគ្រោះត្រូវបានជនសង្ស័យកាប់ដេកស្លាប់នៅក្នុងថ្លុកឈាមទៅហើយ។
បើតាមប្រភពពីប្រជាពលរដ្ឋរស់នៅក្បែរកន្លែងកើតហេតុបានឲ្យដឹងថា មុនកើតហេតុគេឃើញជនសង្ស័យចំនួន៤នាក់ជិះម៉ូតូពីរគ្រឿងមិនចាំម៉ាក បានជិះមកឈប់មុខការដ្ឋានចំណុចកើតហេតុខាងលើ រួចហើយមានជនសង្ស័យម្នាក់ក្នុងចំណោម៤នាក់ បានចុះពីលើម៉ូតូ រួចបានដើរកាន់កាំបិតចូលទៅ ហើយបានធ្វើសកម្មភាពកាប់ទៅលើជនរងគ្រោះ ដែលកំពុងឈរក្បែរប៉ុស្តិ៍យាមសន្តិសុខបណ្តាលឲ្យត្រូវចំនួនពីរកាំបិត ១កាំបិតត្រូវចំក និង១កាំបិតទៀតត្រូវចំដើមទ្រូងមើលឃើញគ្រឿងក្នុងស្លាប់នៅក្នុងថ្លុកឈាមយ៉ាងអាណោចអាធ័ម។ ចំណែកជនសង្ស័យទាំង៤នាក់បន្ទាប់ពីបានធ្វើសកម្មភាពកាប់ទៅលើជនរងគ្រោះរួចហើយ បានរត់ចេញមកក្រៅឡើជិះម៉ូតូ ដែលបក្ខពួកនៅចាំខាងក្រៅ គេចខ្លួនបាត់ស្រមោល។
ក្រោយកើតហេតុ សមត្ថកិច្ចមូលដ្ឋាន និងជំនាញ បានចុះមកដល់ រួចធ្វើកោសល្យវិច័យប្រគល់ជូនសាច់ញាតិយកទៅស្រុកកំណើតធ្វើបុណ្យតាមប្រពៃណី។ ចំណែកជនសង្ស័យ សមត្ថកិច្ច កំពុងធ្វើការស្រាវជ្រាវដើម្បីស្វែងរកចាប់ខ្លួនយកមកផ្ដន្ទាទោសទៅតាមផ្លូវច្បាប់៕
Source: Kampuchea Thmey Daily
0 Comments