ប៉ូលិសនិងប្រព័ន្ធផ្សព្វផ្សាយ បាននិយាយថា ប៉ូលិសក្រុងតូក្យូកំពុងស៊ើបអង្កេតលើការធ្វើអត្តឃាតរបស់មន្ត្រីម្នាក់ ដែលទទួលខុសត្រូវគ្រប់គ្រងចរាចរណ៍នៅជិតកន្លែងកើតហេតុ នៃការវាយប្រហារដោយរថយន្តនៅថ្ងៃចូលឆ្នាំសកលដែលបណ្ដាលឲ្យមនុស្សចំនួន៩នាក់រងរបួស។
ក្នុងការវាយប្រហារនៅសង្កាត់ Harajuku ដ៏ល្បីល្បាញរបស់ទីក្រុងតូក្យូ, ជនសង្ស័យអាយុ២១ឆ្នាំម្នាក់ឈ្មោះ Kazuhiro Kusakabe បានបើកឡានបុកចូលហ្វូងមនុស្សដោយធ្វើឲ្យមនុស្សម្នាក់រងរបួសធ្ងន់។
យោងតាមប៉ូលិសក្រុងតូក្យូបានឲ្យដឹងថា មួយថ្ងៃបន្ទាប់ពីឧបទ្ទវហេតុនេះ មន្ត្រីអាយុ៣៦ឆ្នាំម្នាក់មកពីនាយកដ្ឋានចរាចរណ៍ក្នុងស្រុកត្រូវបានគេរកឃើញស្លាប់នៅក្នុងបន្ទប់ក្រោមដីនៃប៉ុស្តិ៍ប៉ូលិស Harajuku។
អ្នកនាំពាក្យប៉ូលិសក្រុងតូក្យូបានប្រាប់ AFP កាលពីថ្ងៃចន្ទថា “មន្ត្រីបានហូរឈាមចេញពីក្បាលរបស់គាត់។ គាត់មានកាំភ្លើងនៅដៃខាងស្តាំរបស់គាត់ហើយគ្រាប់កាំភ្លើងមួយគ្រាប់ត្រូវបានបាញ់ចេញពីកាំភ្លើង”។
លោកបាននិយាយបន្ថែមដោយមិនលម្អិតថា “យើងកំពុងស៊ើបអង្កេតថាតើរឿងនេះកើតឡើងដោយសារអ្វី”។
ទូរទស្សន៍ NHK បានរាយការណ៍ដោយដកស្រង់ប្រភពប៉ូលិសថា មន្ត្រីរូបនេះគឺជាអ្នកទទួលខុសត្រូវលើការត្រួតពិនិត្យចរាចរណ៍នៅជិតសង្កាត់ដែលការវាយប្រហារបានកើតឡើងអំឡុងពេលចូលឆ្នាំថ្មី។
ទូរទស្សន៍នេះបាននិយាយថា ប៉ូលិសរូបនេះបានរងការយាយីនៅកន្លែងធ្វើការហើយត្រូវបានគេរាយការណ៍ថា គាត់បានបន្សល់ទុកនូវកំណត់ហេតុអត្តឃាតមួយដោយពុំបានផ្តល់ព័ត៌មានលម្អិតអំពីខ្លឹមសាររបស់វា។
អ្នកវាយប្រហារដែលត្រូវបានគេរាយការណ៍ថាបានបើកឡានមកពីទីក្រុង Osaka ភាគខាងលិចគឺត្រូវបានចាប់ខ្លួនដោយសង្ស័យពីបទប៉ុនប៉ងឃាតកម្ម៕ AFP
Source: Kampuchea Thmey Daily
0 Comments