ភ្នំពេញ ៖ កំពុងមានការភ្ញាក់ផ្អើល និងចែករំលែកយ៉ាងកក្រើកពេញបណ្ដាញសង្គមហ្វេសប៊ុក ខណៈមានការទម្លាយព័ត៌មានដ៏រសើបមកថា តារាចម្រៀងស្រី កញ្ញា ខេមរៈ ស្រីពៅ ប្អូនស្រីបង្កើត លោក ខេមរៈ សិរីមន្ត និងលោក ខេមរៈ ភារុន បានទទួលមរណភាពហើយ កាលពីវេលាម៉ោងប្រមាណ១រសៀល ថ្ងៃទី២៥ ខែមករា ឆ្នាំ២០១៩។ នេះបើយោងតាមប្រភពពីតារាចម្រៀង អ្នកនាង ខាត់ សុឃីម ។
តារាចម្រៀងអ្នកនាង ខាត់ សុឃីម បានបង្ហោះសារចូលរួមរំលែកទុក្ខភ្ជាប់ជាមួយរូបភាព កញ្ញា ខេមរៈ ស្រីពៅ ដោយបញ្ជាក់ថា ព័ត៌មានដ៏ក្រៀមក្រំ សូមចូលរួមមរណទុក្ខ តារាចម្រៀង ខេមរៈ ស្រីពៅ ដែលត្រូវជាប្អូនស្រីបង្កើតរបស់តារាចម្រៀង ខេមរៈ សិរីមន្ត បានលាចាកលោកនេះហើយ នៅរសៀលថ្ងៃនេះ វេលាម៉ោង១ នៅប្រទេសឥណ្ឌា សូមបងប្អូនទាំងអស់គ្នាជួយចែករំលែកជូនសាធារណជនឲ្យបានជ្រាបផង។ សូមបញ្ជាក់ថា កញ្ញាបានឈឺអស់រយៈពេល៤ឆ្នាំមកហើយ 😭បងសោកស្ដាយផងអូន។
មិនខុសគ្នាពីតារាស្រី អ្នកនាង ខាត់ សុឃីម នោះទេ នៅលើបណ្តាញសង្គមហ្វេសប៊ុកថ្ងៃនេះ ក៏បានបង្ហោះភ្ជាប់ជាមួយរូបភាពរបស់កញ្ញា ខេមរៈ ស្រីពៅ ដែរថា សូមចូលរួមរំលែកទុក្ខ កញ្ញា ខេមរៈ ស្រីពៅ ប្អូនស្រីលោក ខេមរៈ សេរីមន្ត ទទួលមរណភាពនៅថ្ងៃនេះ(២៥ខែមករា)។ លោកខេមរៈ ភារុណ ដែលជាបងប្រុសបង្កើតរបស់កំពូលតារាចម្រៀង លោក ខេមរៈ សិរីមន្ត និងកញ្ញា ខេមរៈ ស្រីពៅបានបញ្ជាក់នៅលើគណនីហ្វេសបុកផ្ទាល់ខ្លួនរបស់លោកនៅម៉ោងជាង១រសៀលនេះថា កញ្ញា ខេមរៈ ស្រីពៅ ដែលជាប្អូនស្រីពៅរបស់លោកបានទទួលមរណភាពហើយ។
ដោយឡែកស្របពេលជាមួយគ្នា នៃដំណឹងដ៏សោកសៅ និងក្រៀមក្រំនេះដែរ បើតាមការបញ្ជាក់ឲ្យដឹងពីសំណាក់ក្រុមគ្រួសាររបស់ កញ្ញា ខេមរៈ ស្រីពៅ ថ្លែងប្រាប់សារព័ត៌មានថា នេះជាការពិត។
ខេមរៈ ស្រីពៅ គឺមានជំងឺសួត និងក្រលៀនធ្ងន់ធ្ងរយូរណាស់មកហើយ តែក្រុមគ្រួសារ មិនសូវជាចាប់អារម្មណ៍ប៉ុន្មាននោះទេ ទើបតែរយៈពេលប្រមាណជា២ខែ ទើបអាការៈជំងឺរបស់នាងកាន់តែធ្ងន់ធ្ងរ ខណៈនោះ ក្រុមគ្រួសារក៏បានសម្រេចបញ្ជូនទៅព្យាបាលនៅប្រទេសឥណ្ឌា ប៉ុន្តែជាអកុសលក្រុមគ្រូពេទ្យមិនអាចជួយសង្គ្រោះជីវិតរបស់នាងបានឡើយ។
សព របស់តារាចម្រៀងស្រីមានប្រជាប្រិយភាព កញ្ញា ខេមរៈ ស្រីពៅ ពេលនេះ កំពុងតែរៀបចំដឹកមកធ្វើបុណ្យតាមប្រពៃណីនៅស្រុកកំណើត ប៉ុន្តែមិនទាន់ដឹងនៅឡើយទេថា នឹងអាចមកដល់ស្រុកខ្មែរពេលណានោះ។ ខណៈមានអ្នកគាំទ្រនាងជាច្រើនបានបង្ហាញក្តីរន្ធត់ចិត្ត និងបង្ហាញការសោកសៅស្រណោះស្តាយនូវការបាត់បង់អ្នកសិល្បៈស្រីរូបនេះ៕
Source: Kampuchea Thmey Daily
0 Comments