ភ្នំពេញ ៖ រដ្ឋមន្ត្រីក្រសួងសុខាភិបាល បានណែនាំឲ្យប្រជាពលរដ្ឋប្រុងប្រយ័ត្នចំពោះជំងឺផ្តាសាយបក្សីទៅលើមនុស្សក្នុងឱកាសចូលឆ្នាំចិនខាងមុខនេះ ខណៈសត្វបសុបក្សីជាច្រើន ត្រូវបានចរាចរពីខេត្ត មកកាន់រាជធានី ឬទៅកាន់តំបន់ផ្សេងទៀត ដើម្បីសម្លាប់យកសាច់ធ្វើម្ហូបអាហារសម្រាប់ផ្គត់ផ្គង់តម្រូវការរបស់ប្រជាពលរដ្ឋ។
លោកសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល មានប្រសាសន៍ថា « ប្រសិនបើមិនមានការប្រុងប្រយ័ត្ន និងការធ្វើអនាម័យឲ្យបានល្អត្រឹមត្រូវ ករណីឆ្លងវីរុសជំងឺផ្ដាសាយបក្សី នឹងអាចកើតមានឡើងក្នុងឱកាសប្រជាពលរដ្ឋកម្ពុជា កំពុងតែសប្បាយរីករាយនារដូវកាល នៃបុណ្យចូលឆ្នាំចិនខាងមុខនេះ ដោយសារតែវីរុស នៃជំងឺនេះ នៅតែមានចរាចរលើសត្វបសុបក្សីនៅតាមបណ្តាប្រទេសមួយចំនួនដោយគ្មានព្រំដែន»។
លិខិតក្រើនរំលឹករបស់លោករដ្ឋមន្ត្រីចេញផ្សាយ កាលពីល្ងាចថ្ងៃទី២៤ ខែមករា ឆ្នាំ២០១៩ បានឲ្យដឹងថា ជំងឺផ្ដាសាយបក្សីនៅតែបន្តគំរាមកំហែងដល់សុខភាពប្រជាជននៅលើពិភពលោក និងនៅតំបន់អាស៊ីអាគ្នេយ៍ តាមរយៈការបម្លាស់ទី នៃសត្វបសុបក្សី។ ព្រោះថា វីរុសជំងឺផ្ដាសាយបក្សី ជាធម្មតាចរាចរក្នុងចំណោមបសុបក្សី ដែលមានផ្ទុកវីរុសនេះដូចជា H5N1, H5N6, H7N3, H7N7, H7N9, និងH9N2 ហើយដែលអាចឆ្លងទៅមនុស្សបាន និងបណ្តាលឲ្យមានជំងឺផ្ដាសាយបក្សី។
លោករដ្ឋមន្ត្រី បានណែនាំឲ្យប្រជាពលរដ្ឋជៀសវាងការចូលទៅកន្លែងចិញ្ចឹមសត្វ ឬប៉ះពាល់ផ្ទាល់ជាមួយសត្វនៅតាមកសិដ្ឋានចិញ្ចឹមសត្វ និងទីផ្សារបក្សីរស់ ឬចូលកន្លែងសត្តឃាត ឬប៉ះពាល់ជាមួយផ្ទៃណាមួយដែលកខ្វក់ ឬប្រឡាក់ ដោយលាមកសត្វបសុបក្សី ឬសត្វដទៃទៀត។ ជាមួយគ្នានេះ ក៏ត្រូវលាងដៃឲ្យបានញឹកញាប់ជាមួយសាប៊ូ និងទឹកស្អាត ព្រមទាំងប្រកាន់ខ្ជាប់នូវការអនុវត្តអនាម័យផ្ទាល់ខ្លួន និងអនាម័យចំណីអាហារដែលមានសុវត្ថិភាពល្អ។ ចំណែកឯការចម្អិនម្ហូបអាហារ ក៏ត្រូវឲ្យបានឆ្អិនមុននឹងទទួលទាន ព្រមទាំងត្រូវដុត ឬកប់ចោលចំពោះបក្សីដែលឈឺ ឬងាប់។
ចំពោះរោគសញ្ញាដែលសង្ស័យថា មនុស្សកើតជំងឺផ្ដាសាយបក្សីនេះ មានដូចជា គ្រុនក្ដៅលើសពី៣៨.៥អង្សាសេ ក្អក ឈឺក ដកដង្ហើមហត់ និងមានប្រវត្តិប៉ះពាល់ជាមួយបក្សីឈឺ ឬងាប់ ក្នុងអំឡុងពេល៧ថ្ងៃ មុនពេលចេញរោគសញ្ញា។
សូមរំឭកថា រយៈពេលពីឆ្នាំ២០០៥ រហូតដល់២០១៤ នៅកម្ពុជា ធ្លាប់កើតជំងឺផ្សាសាយបក្សី ដែលឆ្លងពីសត្វបក្សីទៅមនុស្សចំនួន៥៦ករណី ក្នុងនោះមាន៣៧ករណី បានសម្លាប់មនុស្ស។
យ៉ាងណាក៏ដោយ បន្ថែមពីការព្រមាន នៃការកើតឡើងជំងឺផ្សាសាយបក្សី សម្រាប់ឱកាសបុណ្យចូលឆ្នាំចិន និងចូលឆ្នាំប្រពៃណីខ្មែរខាងមុខនេះ ក្រសួងសុខាភិបាល ក៏បានក្រើនរំលឹកឲ្យប្រជាពលរដ្ឋប្រុងប្រយ័ត្នពីការពុលចំណីអាហារ និងស្រាផងដែរ ដោយសារតែកន្លងមក ប្រជាពលរដ្ឋតែងតែកើតមានករណីនេះរួចទៅហើយ ពិសេសពុលស្រាដែលផលិត ឬបិតនៅតាមមូលដ្ឋានសហគមន៍មិនមានក្បួនខ្នាតបច្ចេកទេសត្រឹមត្រូវ៕
Source: Kampuchea Thmey Daily
0 Comments