ចក្រភពអង់គ្លេស បានប្រកាសកាលពីថ្ងៃចន្ទថា ខ្លួននឹងដាក់ពង្រាយនាវាល្បាតព្រំដែនចំនួនពីរគ្រឿងនៅតាមផ្លូវទឹក Channel ដើម្បីឆ្លើយតបទៅនឹងការកើនឡើងនៃជនអន្តោប្រវេសន៍ដែលឆ្លងកាត់ពីប្រទេសបារាំងនៅក្នុងទូកពោង។
រដ្ឋមន្ត្រីក្រសួងមហាផ្ទៃលោក Sajid Javid បាននិយាយថា នាវាកងកម្លាំងព្រំដែន នឹងរក្សាតុល្យភាពការពារជីវិតមនុស្សជាមួយនឹងការការពារព្រំដែនរបស់ចក្រភពអង់គ្លេស។
លោក Javid បាននិយាយថា នៅក្នុងខែធ្នូ មនុស្សប្រហែល២៣០នាក់បានព្យាយាមធ្វើដំណើរចម្ងាយ៣៣គីឡូម៉ែត្រពីប្រទេសបារាំងទៅអង់គ្លេស។
ការប៉ុនប៉ងនេះដែលជាពិសេសដោយជនជាតិអ៊ីរ៉ង់ដើម្បីឆ្លងកាត់ផ្លូវដឹកជញ្ជូនដ៏មមាញឹកបំផុតមួយនៅលើពិភពលោកគឺត្រូវបានធ្វើឡើងនៅក្នុងទូកពោងនិងក្បូនតូចៗដទៃទៀត។
លោក Javid បានកាត់បន្ថយថ្ងៃឈប់សម្រាកបុណ្យណូអែលរបស់គាត់នៅប្រទេសអាហ្វ្រិកខាងត្បូងដើម្បីត្រួតពិនិត្យស្ថានការណ៍នេះដោយផ្ទាល់។
គាត់បាននិយាយថា គាត់បានដាក់ពង្រាយនាវាកងកម្លាំងព្រំដែនពីរគ្រឿងជាថ្មីពីសមុទ្រមេឌីទែរ៉ាណេទៅផ្លូវទឹក Channel ដើម្បីចូលរួមជាមួយនាវាមួយគ្រឿងនៅកន្លែងកើតហេតុនិងនាវាល្បាតឆ្នេរពីរគ្រឿងផ្សេងទៀត។
លោក Javid បាននិយាយបន្ទាប់ពីបានជួបមន្ត្រីជាន់ខ្ពស់មកពីទីភ្នាក់ងារកងកម្លាំងព្រំដែននិងឧក្រិដ្ឋកម្មជាតិថា “វាទាំងដើម្បីការពារជីវិតមនុស្សនិងការពារព្រំដែនរបស់យើងផងដែរ។ ខ្ញុំចង់ធ្វើឲ្យប្រាកដថា យើងកំពុងធ្វើអ្វីដែលយើងអាចធ្វើបានដើម្បីការពារប្រជាជន”។
ចក្រភពអង់គ្លេសនិងបារាំងបានព្រមព្រៀងគ្នាកាលពីថ្ងៃអាទិត្យក្នុងការជំរុញកិច្ចសហប្រតិបត្តិការទ្វេភាគីស្តីពីការកើនឡើងនេះ។
នៅប៉ុន្មានសប្តាហ៍ខាងមុខនេះ ប្រទេសទាំងពីរនឹងបង្កើនការល្បាតតាមដាន កិច្ចខិតខំប្រឹងប្រែងដើម្បីបំបែកក្រុមជួញដូរមនុស្សនិងលើកកម្ពស់ការយល់ដឹងអំពីគ្រោះថ្នាក់នៃការឆ្លងកាត់ផ្លូវទឹក Channel។
កាលពីថ្ងៃព្រហស្បតិ៍មុន មន្ត្រីព្រំដែនរបស់ប្រទេសអង់គ្លេសបានរកឃើញជនជាតិអ៊ីរ៉ង់២៣នាក់នៅទីតាំងបីកន្លែងក្នុងតំបន់ Kent ប៉ុន្មានម៉ោងបន្ទាប់ពីអាជ្ញាធរដែនសមុទ្របារាំងបានស្ទាក់ចាប់ជនអន្តោប្រវេសន៍ចំនួន១១នាក់នៅក្នុងទូកតូចមួយ៕ AFP
Source: Kampuchea Thmey Daily
0 Comments