ភ្នំពេញ ៖ យោងតាមរបាយការណ៍ដែលកាសែតកម្ពុជាថ្មី ទទួលបានពីមន្ទីរប្រឆាំងគ្រឿងញៀន នៃអគ្គស្នងការដ្ឋាននគរបាលជាតិ បញ្ជាក់ថា ក្នុងឆ្នាំ២០១៨ សមត្ថកិច្ចទូទាំងប្រទេសបង្ក្រាបបទល្មើសគ្រឿងញៀនប្រមាណ៦,៧៩២ករណី ឃាត់ខ្លួនជនល្មើស១៣,៣៩៧នាក់ (ស្រី១,០១១នាក់) និងអនុវត្តតាមដីកា២២៥ករណី ឃាត់ខ្លួន២១៧នាក់ (ស្រី៩នាក់) និងរឹបអូសគ្រឿងញៀនទម្ងន់សរុប ចំនួន ៥០៨គីឡូ៨៩៣,៧១ក្រាម។
យោងតាមរបាយការណ៍ដដែលបន្តថា ក្នុងនោះមន្ទីរប្រឆាំងគ្រឿងញៀន បង្ក្រាបបានចំនួន១០១៧ករណី ឃាត់ខ្លួនជនល្មើស១៧៥២នាក់ ( ស្រី២១៨នាក់ ) ដោយរឹបអូសថ្នាំញៀន បានចំនួន១៥៨គីឡូ២១៤,៥៩ក្រាម។ បង្ក្រាបករណីធំៗ ចាប់ពី១០០ក្រាម ឡើងទៅ បានចំនួន៥៣ករណី ឃាត់មនុស្ស៨៥នាក់ ( ស្រី២៣នាក់ ) រឹបអូសគ្រឿងញៀន ទម្ងន់សរុប១៥៦គីឡូ៥៨៨,៥១ក្រាម។
ក្នុងឆ្នាំ២០១៨ មន្ទីរប្រឆាំងគ្រឿងញៀន បានសហការជាមួយស្នងការដ្ឋាននគរបាលរាជធានីភ្នំពេញ ខេត្តព្រះសីហនុ និងខេត្តសៀមរាប ដើម្បីរួមគ្នាបង្ការ គ្រប់គ្រង និងបង្ក្រាបបទល្មើសគ្រឿងញៀន នៅតាមបណ្ដាទីតាំងកម្សាន្តផ្សេងៗផងដែរ។
ក្រៅពីនេះ មន្ត្រីជំនាញ ក៏បានចុះស្រង់តាមបណ្ដាគោលដៅងាយរងគ្រោះ បទល្មើសគ្រឿងញៀន សរុប ចំនួន២៩៩៧ទីតាំង ក្នុងនោះបានធ្វើកិច្ចសន្យារួម ចំនួន៩៧២ទីតាំង មិនទាន់ធ្វើកិច្ចសន្យា ២០២៥ទីតាំង៕
Source: Kampuchea Thmey Daily
0 Comments