ភ្នំពេញ ៖ មុនមួយថ្ងៃនេះពិធីជួបសំណេះសំណាលជាមួយអ្នកកាសែត ប្រមុខរាជរដ្ឋាភិបាលកម្ពុជាសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីកម្ពុជាបានចេញនូវសារមួយតាមរយៈផេក ហ្វេសបុកផ្ទាល់របស់សម្តេចដោយបានធ្វើការបញ្ជាក់ថា ការរីកចម្រើនរបស់ប្រទេសជាតិ គឺមិនអាចកាត់ផ្តាច់ពីការចូលរួមរបស់អ្នកសារព័ត៌មានបានឡើយ។
សាររបស់សម្ដេចតេជោត្រូវបានបង្ហោះនាព្រឹកថ្ងៃទី ១០ ខែ មករា គឺមុនមួយថ្ងៃនៃពិធីជួបសំណេះ សំណាលនិងពិសាអាហារសាមគ្គីជាមួយអ្នកសារព័ត៌មានជាលើកទី៣ ដែលប្រព្រឹត្តធ្វើនៅកោះពេជ្រ នាល្ងាចថ្ងៃទី១១ ខែមករា ឆ្នាំ២០១៩។
ខ្លឹមសារទាំងស្រុងនៃសារបានលើកឡើងថា «នៅល្ងាចថ្ងៃសុក្រស្អែកទី ១១ មករា នេះ ខ្ញុំនឹងជួបបងប្អូននិងក្មួយៗអ្នកកាសែតនៅក្នុងកម្មវិធីបាយសាមគ្គីនៅកោះពេជ្រ។ ពិតប្រាកដណាស់ ការរីកចម្រើនរបស់ប្រទេសជាតិ គឺមិនអាចកាត់ផ្តាច់ពីការចូលរួមរបស់បងប្អូននិងក្មួយៗអ្នកសារព័ត៌មានបានឡើយ»។
សម្តេចតេជោនាយករដ្ឋមន្ត្រីបានបន្តទៀតថា «យើងបានបាត់បង់ឱកាសកសាងប្រទេសជាច្រើនឆ្នាំមកហើយដោយសារសង្គ្រាម។ ក្រោយពីប្រទេសជាតិមានសុខសន្តិភាពពេញលេញគឺយើងត្រូវការទេសចរ ពាណិជ្ជករ និងអ្នកវិនិយោគទុនបរទេសជាច្រើនមកវិនិយោគនៅកម្ពុជា។ ដូច្នេះការចូលរួមផ្សព្វផ្សាយព័ត៌មានវិជ្ជមានពិតប្រាកគឺកាន់តែផ្តល់នូវទំនុកចិត្តដល់ទេសចរបរទេសនិងវិនិយោគិនបរទេស»។
សម្តេចតេជោនាយករដ្ឋមន្ត្រីក៏បានអរគុណអ្នកសារព័ត៌មានជាតិនិងអន្តរជាតិទាំងអស់រួមទាំងបណ្តាញព័ត៌មានអនឡាញ( Online News )និងអ្នកប្រើប្រាស់បណ្តាញសង្គមទាំងអស់ (Social Networks) ដែលបានចូលរួមផ្សព្វផ្សាយអំពីកម្ពុជាទៅកាន់ពិភពលោកក្នុងផ្លូវវិជ្ជមាន ដើម្បីប្រទេសជាតិយើងកាន់តែរីកចម្រើនលឿនទៅមុខ។
នៅក្នុងឆ្នាំសកលថ្មី ២០១៩ នេះខ្ញុំ និងភរិយា សូមជូនពរដល់បងប្អូន និងកូនក្មួយអ្នកសារព័ត៌មានជាតិ និងអន្តរជាតិទូទាំងប្រទេសទទួលបានជោគជ័យក្នុងភារកិច្ចការងារ និងមានសុខសុភមង្គលក្នុងក្រុមគ្រួសារគ្រប់ៗគ្នា។
លោកផុស សុវណ្ណ ប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានព័ត៌មាន និងសោតទស្សន៍ ក្រសួងព័ត៌មាន បានប្រាប់អ្នកសារព័ត៌មាននៅថ្ងៃនេះថា ជំនួបរវាងសម្តេចតេជោនាយករដ្ឋមន្ត្រីនិងអ្នកសារព័ត៌មាននៅឆ្នាំនេះមានអ្នកសារព័ត៌មាន ៤.៦០០នាក់ហើយបានចុះបញ្ជីសុំកាតចូលរួម។ ចំនួននេះអាចមានការកើនឡើង ព្រោះនៅមានអ្នកសារព័ត៌មានមួយចំនួនទៀតកំពុងធ្វើការស្នើសុំជាបន្ដបន្ទាប់ប៉ុន្ដែចំនួនដែលក្រសួងកំណត់នោះគឺក្នុងរង្វង់ត្រឹម ៥.០០០នាក់ដោយហេតុថាទីតាំងប្រារព្ធពិធីអាចដាក់អ្នកចូលរួមបានត្រឹម ៥.០០០នាក់ប៉ុណ្ណោះ។
លោក ផុស សុវណ្ណ បានឲ្យដឹងទៀតថា លោក ខៀវ កាញារីទ្ធ រដ្ឋមន្ត្រីក្រសួងព័ត៌មានបានធ្វើសំណើមួយដាក់ទៅខុទ្ទកាល័យសម្ដេចតេជោ ហ៊ុន សែន ដើម្បីសុំឲ្យអ្នកព័ត៌មានបានបញ្ចេញមតិយោបល់ក្នុងជំនួបជាមួយសម្ដេចតេជោផងដែរ។ ប៉ុន្តែសំណើរបស់លោករដ្ឋមន្ដ្រីរហូតមកដល់ពេលនេះមិនទាន់ ទទួលបានការឆ្លើយតបពីខាងខុទ្ទកាល័យរបស់សម្ដេចតេជោនាយករដ្ឋមន្ត្រីនៅឡើយទេ។
លោក ផុស សុវណ្ណ បានអះអាងថាបើមានការអនុញ្ញាតពីសម្តេចតេជោ ហ៊ុន សែន នឹងរៀបចំតំណាងអ្នកសារព័ត៌មាន ២ ឬ៣នាក់ឲ្យឡើងសម្តែងមតិយោបល់។
លោក ផុស សុវណ្ណ បានបង្ហាញចំណាប់អារម្មណ៍ថា ជំនួបរវាងសម្តេចនាយករដ្ឋមន្ត្រី និងអ្នកសារព័ត៌មានជាការបើកចំហនូវលទ្ធិប្រជាធិបតេយ្យនិងសេរីភាពសារព័ត៌មាននៅកម្ពុជាពីសំណាក់ប្រមុខនៃរាជរដ្ឋាភិបាលកម្ពុជាដោយមិនប្រកាន់និន្នាការអ្វីនោះឡើយ។ លោកបន្តថា វិស័យព័ត៌មានកាន់តែរីកចម្រើន និងប្រសើរឡើងដោយសារតែអ្នកសារព័ត៌មានទទួលបានការណែនាំ និងកែលម្អមួយចំនួនពីប្រមុខដឹកនាំកំពូលរបស់ប្រទេសផ្ទាល់តែម្ដង។
ស្ថិតិផ្លូវការនៃអង្គភាពសារព័ត៌មានជាតិនិងអង្គភាពសារព័ត៌មានបរទេសដែលកំពុងធ្វើការផ្សព្វផ្សាយនៅកម្ពុជាមានជាង ៥០០ ស្ថាប័នវិទ្យុមាន ២២១ ស្ថានីយនិងទូរទស្សន៍មាន ២២ ស្ថានីយ។ នេះបើយោងតាមរបាយការណ៍ក្រសួងព័ត៌មានឆ្នាំ២០១៨។
របាយការណ៍បានបង្ហាញថា រហូតដល់ឆ្នាំ ២០១៨ កម្ពុជាមានអង្គភាពសារព័ត៌មានជាតិ និងអង្គភាពសារព័ត៌មានបរទេសដែលកំពុងធ្វើការផ្សព្វផ្សាយនៅកម្ពុជាមានចំនួន ៥៣០ អង្គភាព ក្នុងនោះមានកាសែតផ្សាយជាភាសាបរទេសចំនួន ៤៣ អង្គភាព ,ទស្សនាវដ្តីចំនួន ៣០៦ អង្គភាព, ព្រឹត្តិបត្រព័ត៌មានចំនួន ៤២ អង្គភាព, ការិយាល័យតំណាងទីភ្នាក់ងារសារព័ត៌មានបរទេសនិងការិយាល័យតំណាងវិទ្យុ ទូរទស្សន៍បរទេសប្រចាំការអចិន្ត្រៃយ៍នៅកម្ពុជាមានចំនួន២១អង្គភាព,ស្ថានីយវិទ្យុចំនួន២២១ ស្ថានីយទូរទស្សន៍ចំនួន ២២ និងទូរទស្សន៍ផ្សាយបន្តមានចំនួន ១១២ ស្ថានីយ ,ទូរទស្សន៍ផ្កាយរណបតេជោ ធីវី មាន ០១ ស្ថានីយ ,ទូរទស្សន៍ឌីជីថល (digital Pay-TV) មានចំនួន ០៤ ស្ថានីយ និងទូរទស្សន៍អនឡាញ Online TVs មានចំនួន ៥៨ អង្គភាពកំពុងធ្វើអាជីវកម្មនៅកម្ពុជា។
សូមរំលឹកជូនថា សម្តេចតេជោ ហ៊ុន សែន នាយករដ្ឋមន្ត្រីកម្ពុជានិងសម្តេចកិត្តិព្រឹទ្ធបណ្ឌិតបានជួបសំណេះសំណាលជាមួយអ្នកសារព័ត៌មានលើកទី១ កាលពីថ្ងៃទី១៤ ខែមករា ឆ្នាំ២០១៧ នៅសណ្ឋាគារសុខារាជធានីភ្នំពេញនិងជំនួបលើកទី២បានធ្វើឡើងកាលពីថ្ងៃទី២១ ខែមករា ឆ្នាំ២០១៨ នៅមជ្ឈមណ្ឌលសន្និបាតកោះពេជ្រ៕
Source: Kampuchea Thmey Daily
0 Comments