ភ្នំពេញ ៖ តាមព័ត៌មានបានឲ្យដឹងថា តំណាងមន្ត្រីគណបក្សប្រឆាំងប្រចាំខេត្តបាត់ដំបងចំនួន ៣នាក់ ដែលជាប់បណ្ដឹងក្នុងសំណុំរឿងធ្វើយុទ្ធនាការម្រាមដៃស្អាតនោះ បានសុខចិត្តទៅបង់ផាកពិន័យហើយ ក្រោយពីមានការព្រមានចាត់វិធានការផ្លូវច្បាប់។
កាលពីថ្ងៃទី១៣ ខែធ្នូ ឆ្នាំ២០១៨ កន្លងទៅ លោក ស៊ិក ប៊ុកហុក ប្រធាន គ.ជ.ប បានចេញលិខិតបង្គាប់ឲ្យមន្ត្រីគណបក្សប្រឆាំងចំនួន ៣រូប ដែលជាប់ក្នុងសំណុំរឿងធ្វើយុទ្ធការម្រាមដៃស្អាតនៅបាត់ដំបង ប្រញាប់ទៅបង់ប្រាក់ផាកពិន័យនៅគណៈកម្មការរៀបចំការបោះឆ្នោតខេត្តបាត់ដំបង ឬនៅទីស្ដីការគ.ជ.ប យ៉ាងយូរ៣០ថ្ងៃ។ ក្នុងករណីមិនបានបង់ប្រាក់ផាកពិន័យតាមការកំណត់ គ.ជ.ប នឹងអនុវត្តការផាកពិន័យនេះទៅតាមច្បាប់។
គ.ជ.ប បានផាកពិន័យលោក ជា ជីវ ជាប្រាក់ ១០លានរៀល ចំណែកមន្ត្រីបក្សប្រឆាំងពីររូបទៀត គឺលោក ថោង សារឿន និងលោក គ្រុយ គឹមសាំង ពិន័យ ប្រាក់ ៥លានរៀល។
ទាក់ទងបញ្ហានេះ តំណាងតំណាងសកម្មជនអតីតគណបក្សសង្គ្រោះជាតិទាំង៣រូប ប្រចាំខេត្តបាត់ដំបង លោក សួន ចំរើន ថ្លែងប្រាប់អ្នកសារព័ត៌មានថា លោកបានប្រគល់ប្រាក់ផាកពិន័យចំនួន២០លានរៀល ជូនទៅគណៈកម្មការរៀបចំការបោះឆ្នោតខេត្តបាត់ដំបងគ្រប់ចំនួនអស់ហើយ។
សូមបញ្ជាក់ថា គណៈកម្មាធិការជាតិរៀបចំការបោះឆ្នោត (គ.ជ.ប) បានសម្រេចផាកពិន័យមន្ត្រីបក្សទាំង៣នាក់ បន្ទាប់ពីពួកគេបានបង្ហោះរូបភាពលើកម្រាមចង្អុលដៃ ជានិមិត្តរូបនៃការធ្វើពហិការមិនទៅបោះឆ្នោត នៅតាមបណ្ដាញសង្គម Facebook និងអំពាវនាវមិនឲ្យទៅបោះឆ្នោត៕
Source: Kampuchea Thmey Daily
0 Comments