បន្ទាយមានជ័យ ៖ រដ្ឋបាលខេត្តបន្ទាយមានជ័យ បានឆ្លៀតបង្ហាញលទ្ធផលសង្ខេបការងារ ក្នុងឱកាសជូនពរ និងអបអរក្នុងពិធីឆ្លងឆ្នាំសាកលឆ្នាំ២០១៨ ឈានចូលឆ្នាំ២០១៩ ដែលបានធ្វើនៅសួនមានជ័យឬវេទិកាខេត្តភូមិ៣ សង្កាត់ព្រះពន្លាកណ្តាល ក្រុងសិរីសោភ័ណ នារាត្រីថ្ងៃទី៣១ ខែធ្នូ ឆ្នាំ២០១៨ ដល់រំលងអធ្រាត្រចូលថ្ងៃទី១ ខែមករា ឆ្នាំ២០១៩។
លោកអោម ចន្ថា អភិបាលស្ដីទីខេត្តបន្ទាយមានជ័យ លោក ខេង ស៊ុម សមាជិកក្រុមប្រឹក្សាខេត្តបានចូលរួមជាគណៈអធិបតី។
លោក អោម ចន្ថា មានប្រសាសន៍ថា ក្នុងឱកាសនេះ ក្នុងនាមរដ្ឋបាលខេត្ត និងលោកផ្ទាល់ សូមចូលរួមជាមួយឯកឧត្ដម លោកជំទាវ លោក លោកស្រី មន្ត្រីរាជការ កងកម្លាំងប្រដាប់អាវុធ អង្គការសង្គមស៊ីវិល ក្រុមហ៊ុន អាជីវករ ពាណិជ្ជករ និវត្តន៍ជន បងប្អូនប្រជា ពលរដ្ឋ មហាជនរាប់ពាន់ម៉ឺននាក់ ព្រមទាំងភ្ញៀវអន្តរជាតិមានកូរ៉េ ចិន អឺរ៉ុប ជាច្រើននាក់ចូលរួមក្នុងពិធីឆ្លង ស្វាគមន៍ ជូនពរឆ្នាំសាកលនារាត្រីនេះ និងសូមសំដែងនូវការកោតសរសើរចំពោះកិច្ចខិតខំ និងការលះបង់ដ៏ធំធេងក្នុងការបំពេញភារកិច្ចប្រកបដោយការទទួលខុសត្រូវចំពោះជាតិ និងប្រជាពលរដ្ឋ ក៏ដូចជាចូលរួមគាំទ្ររាល់សកម្មភាពនានាសម្រាប់អភិវឌ្ឍន៍ខេត្ត ព្រមទាំងនាំមកនូវជោគជ័យនិងសមិទ្ធផលជាច្រើនក្នុងរយៈពេលពេញ១ឆ្នាំ២០១៨នេះ។
លោកបានបន្តថា ទាំងនេះ មានគោលដៅលើកស្ទួយជីវភាព សុខុមាលភាពប្រជាពលរដ្ឋឲ្យកាន់តែសម្បូរសប្បាយ និងរស់នៅមានសុភមង្គល។
លោក អោម ចន្ថា និយាយបន្តថា ឆ្នាំ២០១៨កន្លងមកនេះ ក្នុងខេត្ត បង្កបង្កើនផលបាន២៥០.០០០ហិចតា ហើយបានទិន្នផលខ្ពស់ដំឡូងមីធ្វើបានជិត១០ម៉ឺនហិកតា ..។ល..។ ហើយបានទិន្នផលរាជរដ្ឋាភិបាលបានខិតខំរកទីផ្សារមានតម្លៃសមស្រប។ រីឯលើសេវាសាធារណៈ ខេត្តបានលើកកម្ពស់ការយកចិត្តទុកដាក់ និងជំរុញការកសាងហេដ្ឋារចនាសម្ព័ន្ធរូបវន្តនានា មានផ្លូវស្ពាន ទំនប់ ប្រឡាយធារាសាស្ត្រ ស្រះ ប្រព័ន្ធទឹកស្អាត មណ្ឌលសុខភាព សាលារៀន អគ្គិសនី រួមទាំងវិស័យ អនុវិស័យទាំងឡាយទៀតយ៉ាងច្រើន។ ក្នុងឱកាសនោះ មន្ត្រីថ្នាក់ដឹកនាំ មន្ត្រី ពលរដ្ឋ ភ្ញៀវជាតិ អន្តរជាតិបានជូនពរគ្នា បានជូនកន្ត្រកផ្កាជូន លោកជំទាវ សុង ផល្លីន តំណាងរបស់ លោក សួន បវរ អភិបាលខេត្តបន្ទាយមានជ័យ ហើយក្នុងឱកាសចូលឆ្នាំថ្មី ឆ្នាំសាកល២០១៩នេះ រដ្ឋបាលខេត្តនិងលោកផ្ទាល់ សូមបួងសួងដល់គុណបុណ្យព្រះរតនត្រ័យ វត្ថុសក្ដិសិទ្ធិក្នុងលោក សូមប្រោសព្រំសព្ទសាធុការពរ បរមមហាប្រសើរជូនថ្នាក់ដឹកនាំ ឯកឧត្ដម លោកជំទាវលោកលោកស្រីអ្នកនាងកញ្ញា និងអ្នកគ្រប់គ្នា។
សូមបញ្ជាក់ថា បើតាម លោក ស្រេង សុផល ជាអនុប្រធានសហភាពសហព័ន្ធយុវជនកម្ពុជាខេត្តបន្ទាយមានជ័យបានប្រាប់សារព័ត៌មានថា ក្នុងឱកាសបុណ្យចូលឆ្នាំសាកលឆ្លងឆ្នាំ២០១៨ ឈានឆ្នាំ២០១៩ នេះ នៅខេត្តបន្ទាយមានជ័យមានរៀបចំពិធីដ៏អធិកអធម ឱឡារិក និងរីករាយ និងរាប់ថយក្រោយ(Countdown) ដ៏ធំមួយនៅសួនមានជ័យ ឬវេទិកាខេត្តនារាត្រីថ្ងៃទី៣១ ខែធ្នូ ឆ្នាំ២០១៨ និងរំលងអធ្រាត្រ ឈានចូលថ្ងៃទី១ ខែមករា ឆ្នាំ២០១៩។
នារាត្រីសមោសរនោះ ក៏មានអាហារសាមគ្គីជាច្រើនតុសម្រាប់មន្ត្រីមាននំបញ្ចុកយ៉ាងច្រើន ផ្តល់ជូនឥតគិតថ្លៃជូនពលរដ្ឋទាំងឡាយផងដែរ ជាងនេះទៅទៀត កម្មវិធីសប្បាយ សប្បាយនោះ ក៏មាន រាំច្រៀង សម្ដែងសិល្បៈ និងទស្សនីយភាពលម្អ ភ្លើងមួយចំនួនទៀតផង៕
Source: Kampuchea Thmey Daily
0 Comments