កំពង់ឆ្នាំង ៖ ត្រាក់ទ័រថ្មីៗ ចំនួន៤គ្រឿង ត្រូវបានសមត្ថកិច្ចខណ្ឌរដ្ឋបាលព្រៃឈើកំពង់ត្រឡាចសហការគ្នាជាមួយខណ្ឌរដ្ឋបាលព្រៃឈើកំពង់ឆ្នាំង និងលោកប្រធានមន្ទីរកសិកម្មខេត្ត ចាប់បានកាលពីម៉ោង១០ព្រឹក ថ្ងៃទី១៦ ខែមករា ឆ្នាំ២០១៩ ខណៈដែលពួកគេកំពុងធ្វើសកម្មភាពឈូសឆាយដីគម្របព្រៃឈើរបស់រដ្ឋ នៅក្នុងចំណុចបែងកង ក្នុងភូមិខ្សាច់ស ឃុំក្រាំងល្វា ស្រុកសាមគ្គីមានជ័យ។
វត្ថុតាងខាងលើនេះ ត្រូវបានសមត្ថកិច្ច អូសយកមករក្សាទុកនៅក្នុងផ្នែករដ្ឋបាលព្រៃឈើកំពង់ត្រឡាច កសាងសំណុំរឿងតាមនីតិវិធី ដើម្បីចាត់ការតាមផ្លូវច្បាប់។
លោក ឯម វិចិត្រ នាយផ្នែករដ្ឋបាលព្រៃឈើកំពង់ត្រឡាចបានឲ្យដឹងថា នៅថ្ងៃទី១៦មករានេះ លោក ងិន ហ៊ុន ប្រធានមន្ទីរកសិកម្ម រុក្ខាប្រមាញ់ និងនេសាទខេត្ត និង លោក ថោង វីរ៉ាវឌ្ឍី នាយខណ្ឌរដ្ឋបាលព្រៃឈើកំពង់ឆ្នាំង បានដឹកនាំក្រុមការងារចុះទៅពិនិត្យដីគម្របព្រៃ ឈើនៅចំណុចខាងលើដើម្បីធ្វើអត្តសញ្ញាណកម្ម រាយការណ៍ជូនថ្នាក់លើ។
ខណៈនោះដែរ ក្រុមការងារ ក៏បានប្រទះឃើញត្រាក់ទ័រថ្មីៗចំនួន៤គ្រឿង កំពុងធ្វើសកម្មភាពឈូសដីគម្របព្រៃឈើរបស់រដ្ឋអស់ប្រមាណជិត១ហិកតា។ ក្នុងពេលនោះ សមត្ថកិច្ច ក៏បានសហការគ្នាចាប់បានត្រាក់ទ័រទាំង៤គ្រឿងនេះ តែអ្នកបើកបរបានគេចខ្លួនបាត់អស់។
ចំណែកវត្ថុតាងនេះ ត្រូវបានសមត្ថកិច្ចនាំយកមករក្សាទុកនៅផ្នែករដ្ឋបាលព្រៃឈើកំពង់ត្រឡាច ដើម្បីចាត់ការតាមផ្លូវច្បាប់។
លោក ងិន ហ៊ុន ប្រធានមន្ទីរកសិកម្ម រុក្ខាប្រមាញ់ និងនេសាទខេត្ត បានបញ្ជាក់ឲ្យដឹងថា តាមនីតិវិធីច្បាប់ ខណ្ឌរដ្ឋបាលព្រៃឈើ នឹងត្រូវធ្វើសេចក្ដីជូនដំណឹង ប្រកាសជាសាធារណៈរយៈពេលមួយខែ ដើម្បីឲ្យម្ចាស់ត្រាក់ទ័រចូលខ្លួនមកដោះស្រាយ ដោយត្រូវធ្វើការផាកពិន័យតាមផ្លូវច្បាប់។ ប៉ុន្តែប្រសិនបើម្ចាស់ត្រាក់ទ័រ មិនចូលខ្លួនមកទទួលការផាកពិន័យទេនោះ សមត្ថកិច្ចជំនាញបានកសាងសំណុំរឿងបញ្ជូនទៅតុលាការចាត់ការតាមផ្លូវច្បាប់ ដោយតុលាការនឹងចេញសាលក្រម ដកហូតវត្ថុតាងទាំងអស់នេះទុកជាសម្បត្តិរដ្ឋតែម្ដង។
សមត្ថកិច្ចរដ្ឋបាលព្រៃឈើ សូមអំពាវនាវដល់ប្រជាពលរដ្ឋនៅគ្រប់មូលដ្ឋាន សូមចូលរួមសហការរាយការណ៍ជូនសមត្ថកិច្ចឲ្យបានទាន់ពេលវេលា នៅពេលឃើញការឈូសឆាយដីព្រៃឈើខុសច្បាប់ ដើម្បីឲ្យសមត្ថកិច្ចចុះបង្ក្រាបបទល្មើសព្រៃឈើមានប្រសិទ្ធភាព៕
Source: Kampuchea Thmey Daily
0 Comments