នៅក្នុងពិធីដ៏អ៊ឹកធឹកមួយនៅទីក្រុងព្រែកជីក Ismailia លោកស៊ីស៊ី បានថ្លែងសុន្ទរកថាអំពីការគំរាមរបស់ភេរវជន ជុំវិញគម្រោងនេះ។ លោកស៊ីស៊ី បាននិយាយបន្ទាប់ពីការចុះហត្ថលេខាលើបញ្ជាមួយ អនុញ្ញាតឲ្យនាវាឆ្លងកាត់តាមការពង្រីកថ្មីនៃផ្លូវទឹកនេះ។
យោងទៅតាម AP បានឲ្យដឹងថា ការពង្រីកដែលមានតម្លៃ៨.៥ពាន់លានដុល្លារនេះ មានជាប់ពាក់ព័ន្ធទៅនឹងការជីក និងការបូមយកភក់ចេញក្នុងចម្ងាយ៧២គីឡូម៉ែត្រនៃព្រែកជីកប្រវែង១៩៣គីឡូម៉ែត្រ និងធ្វើស្របគ្នាជាមួយផ្លូវទឹកនេះ ដើម្បីសម្រួលដល់ការធ្វើចរាចរណ៍ទៅមក។ រដ្ឋាភិបាលបាននិយាយថា ខ្លួននឹងទទួលបានប្រាក់ចំណូលប្រចាំឆ្នាំរបស់ព្រែកជីកនេះចំនួនទ្វេដងទៅដល់១៣.២ពាន់លានដុល្លារនៅក្នុងឆ្នាំ២០២៣។
ប៉ុន្ដែអ្នកសេដ្ឋកិច្ច និងអ្នកវិភាគអំពីការដឹកជញ្ជូនមួយចំនួនតាមនាវាសង្ស័យអំពីថា តើមានការធ្វើចរាចរណ៍ និងការធ្វើពាណិជ្ជកម្មខាងកើត ខាងលិចគ្រប់គ្រាន់ដែរឬទេ ដើម្បីឆ្លើយតបទៅនឹងគោលដៅប្រាក់ចំណូលប្រកបដោយមហិច្ឆតានេះនោះ។ ស្លៀកពាក់ក្នុងឯកសណ្ឋានយោធា និងពាក់វ៉ែនតាផងនោះ លោកប្រធានាធិបតីបានអញ្ជើញមកដល់កន្លែងប្រារព្ធពិធីដោយជិះឧទ្ធម្ភាគចក្រយោធាមួយគ្រឿង។
នៅក្នុងចំណោមពួកអ្នកមកចូលរួមពិធីនេះរួមមានលោកហ្វ្រង់ស័រ ហូឡង់ ប្រធានាធិបតី បារាំង សេ្ដចអាប់ឌុលឡា នៃប្រទេសហ្សកដានី និងស្ដេចហាម៉េត ប៊ីន អីុសា អាល់កាលីហ្វា នៃប្រទេសបារ៉ែន លោកម៉ាមូត អាបាស់ ប្រធានាធិបតីប៉ាឡេស្ទីន លោកអេមៀរ សេកសាបា អាល់អាម៉េត អាល់សាបា នៃប្រទេសគុយវ៉ែត និងលោកអាឡិចស៊ីស ស៊ីប្រាស នាយករដ្ឋមន្ត្រីប្រទេសក្រិក ក៏បានចូលរួមនៅក្នុងពិធីនេះដែរ។
ការពង្រីកព្រែកជីកនេះ គឺជាចំណុចស្នូលនៃរបៀបវារៈដ៏ធំមួយដើម្បីលើកប្រទេសដែលមានប្រជាជនច្រើនបំផុតនៅក្នុងពិភពអារ៉ាប់ចេញពីភាពក្រីក្រ និងធានាក្រញាំអំណាចរបស់លោកស៊ីស៊ី បន្ទាប់ពីបានបណ្ដេញប្រធានាធិបតីស៊ីវិល ដែលបានជាប់ឆ្នោតនៅក្នុងការបោះឆ្នោតដោយសេរីលើកដំបូងរបស់ប្រទេសអេហ្ស៊ីប លោកមូហាម៉េត ម័រស៊ី របស់ចលនាបងប្អូនមូស្លីមនៅក្នុងឆ្នាំ២០១៣ បន្ទាប់ពីការធ្វើបាតុកម្មរបស់មហាជននោះមក៕
VOA
អេហ្ស៊ីបចាប់ផ្ដើមពង្រីកព្រែកជីកស៊ុយអេស ក្នុងតម្លៃ៨.៥ពាន់លានដុល្លារ
0 Comments