ភ្នំពេញ ៖ មន្ត្រីជាន់ខ្ពស់ក្រសួងផែនការ បានធ្វើការអំពាវនាវឲ្យប្រជាពលរដ្ឋទូទាំងប្រទេសផ្អាកធ្វើសកម្មភាពបម្លាស់ទីលំនៅដ្ឋានរយៈពេលកន្លះខែ ដើម្បីបង្កលក្ខណៈងាយស្រួលដល់មន្ត្រីជំរឿនបានចុះទៅជួបប្រមូលព័ត៌មានឲ្យបានគ្រប់ជ្រុងជ្រោយ។
លោកស្រី ហង់ លីណា អគ្គនាយកវិទ្យាស្ថានជាតិស្ថិតិ នៃក្រសួងផែនការបានមានប្រសាសន៍ថានៅក្នុងអំឡុងពេលធ្វើជំរឿងនេះសូមឲ្យប្រជាពលរដ្ឋផ្អាកធ្វើសកម្មភាពបម្លាស់ទីលំនៅដ្ឋានក្នុងរយៈពេលកន្លះខែ ចាប់ពីថ្ងៃទី២៨ ខែកុម្ភៈ ដល់ថ្ងៃទី១៣ ខែមីនា ឆ្នាំ២០១៩ខាងមុខនេះ ដើម្បីបង្កលក្ខណៈងាយស្រួលដល់មន្ត្រីជំរឿនទាំង ជាង៥ម៉ឺននាក់ បានចុះទៅជួបជាមួយប្រជាពលរដ្ឋប្រមូលព័ត៌មានឲ្យបានគ្រប់ជ្រុងជ្រោយតាមការកំណត់។ ពិសេសកាត់បន្ថយការខ្ជះខ្ជាយពេលវេលា និងថវិកាខណៈការធ្វើជំរឿនលើកនេះ ត្រូវចំណាយថវិការបស់ជាតិទាំងស្រុងរហូតដល់ជាង៨លាន៣សែនដុល្លារអាមេរិក។
លោកស្រីបានបន្តទៀតថា ជាងនេះទៅទៀត គឺដើម្បីឲ្យការធ្វើជំរឿនប្រជាសាស្ត្រនៅឆ្នាំ២០១៩នេះមានលក្ខណៈសុក្រឹត្យត្រឹមត្រូវ បម្រើដល់ការអភិវឌ្ឍន៍ជាតិ ព្រោះថាក្នុងជំរឿនប្រជាសាស្ត្រឆ្នាំ២០១៩នេះ ប្រជាពលរដ្ឋត្រូវឆ្លើយសំនួរសំខាន់រហូតដល់៥៩សំណួរ ដើម្បីធ្វើជាធាតុចូលដ៏សំខាន់ក្នុងការអង្កេតវាយតម្លៃពីស្ថានភាពទាំងអស់របស់ប្រជាពលរដ្ឋ នាយម៉ឺនសព្វមុខមន្ត្រី នាយករដ្ឋមន្ត្រី និងព្រះមហាក្សត្រ។
លោកស្រីបានបន្ថែមទៀតថា ក្នុងចំណោមសំណួរទាំង៥៩សំនួរនេះ ត្រូវបានបែងចែកជា៥ផ្នែកធំៗ ក្នុងនោះផ្នែកទី១ ព័ត៌មានសម្គាល់ ទី២ ព័ត៌មានផ្ទាល់ខ្លួន ពាក់ព័ន្ធចំណេះដឹង ពិការភាព ជំនឿសាសនា ការងារប្រចាំថ្ងៃ ទី៣ គឺព័ត៌មានពាក់ព័ន្ធនឹងការបង្កកំណើត ទី៤ ព័ត៌មានអំពី សម្ភារៈ ប្រើប្រាស់ របស់គ្រួសារនីមួយៗ និងទី៥ អត្រាមរណភាព។
លោកស្រីបានបញ្ជាក់ថា កម្រងសំណួរទាំងអស់ នេះ គឺមានសារះសំខាន់ណាស់ដើម្បីវិភាគពីការវិវឌ្ឍ នៃកម្រិតជីវភាពរបស់ប្រជាពលរដ្ឋក្នុងរយៈពេល១០ឆ្នាំកន្លងមក ក្រោយជំរឿនកាលឆ្នាំ២០០៨ ។ ហើយលទ្ធផលដែលទទួលបាននេះ នឹងត្រូវយកទៅកសាងជាគោលនយោបាយនានាសម្រាប់ការអភិវឌ្ឍន៍ជាតិបន្តទៀត។
ការធ្វើជំរឿនឆ្នាំ២០១៩នេះ មានរយៈពេល១០ថ្ងៃ ដោយនឹងចាប់ផ្តើមពីថ្ងៃទី៣មីនា រហូតដល់ថ្ងៃទី១៣ ខែមីនា ឆ្នាំ២០១៩ខាងមុខនេះ ដោយពាក់ព័ន្ធដល់ការចុះបញ្ជី មនុស្ស និងការកត់ត្រាលក្ខណៈរបស់មនុស្សម្នាក់ៗ ក្នុងចំណោមមនុស្សទាំងអស់ តាមកាលបរិច្ឆេទកំណត់ និងធ្វើការកត់ត្រាប្រមូលយកព័ត៌មានអំពីប្រជាសាស្ត្រ សេដ្ឋកិច្ច សង្គម និងវប្បធម៌របស់មនុស្សម្នាក់ៗ ព្រមទាំងព័ត៌មានអំពីអគារដែលកាន់កាប់ដោយគ្រួសារ ស្ថានភាពលំនៅដ្ឋាន និងសម្ភារៈប្រើប្រាស់នៅក្នុងគ្រួសារ។
គួរបញ្ជាក់ថា ការធ្វើជំរឿនប្រជាសាស្ត្រកម្ពុជាកាលពីឆ្នាំ២០០៨ កម្ពុជាមានចំនួនប្រជាជន ជាង១៣លាននាក់ ហើយក្រោយរយៈពេល១០ឆ្នាំនេះ ក្រសួងផែនការប៉ាន់ស្មានថា ចំនួននេះអាចនឹងកើនឡើងរហូតដល់ ពី១៧ ទៅ១៨លាននាក់៕
Source: Kampuchea Thmey Daily
0 Comments