ភ្នំពេញ ៖ នៅក្នុងកិច្ចប្រជុំបូកសរុបការងារប្រតិបត្តិការបង្ក្រាបគ្រឿងញៀន របស់កងកម្លាំងនគរបាលជាតិនៅទូទាំងប្រទេសក្នុងឆ្នាំ២០១៨ បានបង្ក្រាបចំនួន៦.៧៩២ករណី ក្នុងនោះឃាត់ខ្លួនជនល្មើស ចំនួន១៣,៣៨៧នាក់ ( ស្រី១,០១១នាក់ ) និងអនុវត្តតាមដីកាឃាត់ខ្លួន២១៧នាក់ ( ស្រី៩នាក់ )។
កិច្ចប្រជុំនេះបានធ្វើឡើងក្រោមអធិបតីភាពនាយឧត្ដមសេនីយ៍ ម៉ក់ ជីតូ អគ្គស្នងការរងនគរបាលជាតិ ទទួលបន្ទុកការងារប្រយុទ្ធប្រឆាំងគ្រឿងញៀន។
បើយោងតាមរបាយការណ៍ដែលបានបង្ហាញ ក្នុងកិច្ចប្រជុំបូកសរុបលទ្ធផលការងារប្រយុទ្ធប្រឆាំងបទល្មើសគ្រឿងញៀន ក្នុងឆ្នាំ២០១៨ និងលើកទិសដៅបន្ដ ឆ្នាំ២០១៩ របស់មន្ទីរប្រឆាំងគ្រឿងញៀន នៃអគ្គស្នងការដ្ឋាននគរបាលជាតិ នៅព្រឹកថ្ងៃទី១០ ខែមករា ឆ្នាំ២០១៩នេះ ក្រោមអធិបតីភាពនាយឧត្ដមសេនីយ៍ ម៉ក់ ជីតូ អគ្គស្នងការរងនគរបាលជាតិទទួលផែនប្រឆាំងគ្រឿងញៀន។
របាយការណ៍ដដែលបញ្ជាក់ថា ក្នុងប្រតិបត្តិការពេញមួយឆ្នាំនេះ កម្លាំងនគរបាលទូទាំងប្រទេសរឹបអូសគ្រឿងញៀនសរុបទម្ងន់៥០៨គីឡូក្រាម ក្នុងនោះមន្ទីរប្រឆាំងគ្រឿងញៀន បង្ក្រាបបានចំនួន១,០១៧ករណី ឃាត់ខ្លួនជនល្មើស១,៧២៥នាក់ ស្រី២១៨នាក់ ដោយរឹបអូសថ្នាំញៀន បានចំនួន១៥៨គីឡូក្រាម។
ជាមួយគ្នានេះ ក្នុងឆ្នាំ២០១៨មន្ទីរប្រឆាំងគ្រឿងញៀន បានសហការជាមួយស្នងការដ្ឋាននគរបាលរាជធានីភ្នំពេញ ខេត្តព្រះសីហនុ និងខេត្តសៀមរាប ដើម្បីរួមគ្នាបង្ការ គ្រប់គ្រង និងបង្ក្រាបបទល្មើសគ្រឿងញៀន នៅតាមបណ្ដាទីតាំងកម្សាន្តផ្សេងផងដែរ។
បន្ថែមពីនេះ មន្ត្រីជំនាញ ក៏បានចុះស្រង់តាមបណ្ដាគោលដៅងាយរងគ្រោះ បទល្មើសគ្រឿងញៀន សរុបចំនួន២៩៩៧ទីតាំង ក្នុងបានធ្វើកិច្ចសន្យារួមចំនួន៩៧២ទីតាំង មិនទាន់ធ្វើកិច្ចសន្យា២០២៥ទីតាំង។ ចំពោះម្ចាស់ទីតាំងណាដែលមិនសហការជាមួយសមត្ថកិច្ចដើម្បីបង្ក្រាប ឬបង្ការមិនឲ្យមានបទល្មើសគ្រឿងញៀន នឹងត្រូវបញ្ជូនសំណុំរឿងទៅឲ្យតុលាការសម្រេចតាមច្បាប់។
ខាងលើនេះ គ្រាន់តែជាការបូកសរុបរបស់សមត្ថកិច្ចនគរបាល តែលើបទល្មើសគ្រឿងញៀនប៉ុណ្ណោះ នៅមិនទាន់រាប់បញ្ចូលការបង្ក្រាបរបស់សមត្ថកិច្ចអាវុធហត្ថនៅទូទាំងប្រទេសទេ៕
Source: Kampuchea Thmey Daily
0 Comments