ភ្នំពេញ ៖ កីឡាករសុខ សាវិន អ្នកប្រដាល់ នៃក្លិបឆ្មាសរសែនសុខគុនខ្មែរ កៀកស្មាជាមួយកីឡាករជើងខ្លាំង ពេជ្រ ម្ទេសខ្មាំង អ្នកប្រដាល់របស់ក្លិបអារុណរះកីឡា ឡើងដណ្តើមប្រាក់លានជាមួយកីឡាករថៃ វ៉ាត់ឆារ៉ាក់ដេត ស.ដានឆ័យ និងកីឡាករភីតប៉ែតស៊ែន ស៊ីត.លួងពូឧដុម នៅលើសង្វៀនស៊ីអិនស៊ី នាថ្ងៃទី១៩ ខែមករា ឆ្នាំ២០១៩នេះ។
កីឡាករសុខ សាវិន ជួបកីឡាករថៃ វ៉ាត់ឆារ៉ាក់ដេត ស.ដានឆ័យ នេះ ក្នុងប្រភេទទម្ងន់៦០គីឡូក្រាម អ្នកទាំងពីរមិនធ្លាប់ជួបគ្នាទេនៅសង្វៀននេះ តែយ៉ាងណា កីឡាករថៃរូបនេះ ធ្លាប់មកប្រកួតនៅតាមសង្វៀនស្រុកខ្មែរច្រើនលើកមកហើយ មានឈ្នះ មានចាញ់ជាមួយកីឡាករលំដាប់ៗរបស់កម្ពុជា ស្នៀតខ្លាំងរបស់គេ គឺជើងទាត់ ជង្គង់ និងស្នៀតកាច់ផ្តួលឲ្យគូប្រកួតដួលទាំងជំហរ។
ចំណែកសុខ សាវិន បច្ចុប្បន្នកំពុងទទួលបានការគាំទ្រយ៉ាងច្រើនពីអ្នកគាំទ្រ ស្នៀតខ្លាំងរបស់គេ គឺជង្គង់ និងកែង ដែលអាចប្រើប្រយោលក៏បាន ចូលកៀកក៏បាន ហើយមានភាពប៉ិនប្រសព្វក្នុងការប្រើបានល្អទៀតផង។ ក្នុងការប្រកួតនេះ ត្រូវបានអ្នកតាមដានកីឡាប្រដាល់លើកឡើងថា សុខ សាវិន មានភាគរយខ្ពស់បំផុត ក្នុងការយកឈ្នះថៃរូបនេះ ព្រោះគេកំពុងឡើងកូដខ្លាំង។ ចាំមើលរវាងសុខ សាវិន និងកីឡាករថៃ វ៉ាត់ឆារ៉ាក់ដេត ស.ដានឆ័យ នរណាជាអ្នកឈ្នះទទួលបានប្រាក់លាននេះ?។
ដោយឡែក កីឡាករ ពេជ្រ ម្ទេសខ្មាំង ត្រូវឡើងដណ្តើមប្រាក់លានពី អ្នកលេងឆ្លងដែនមកពីថៃផងដែរ គឺកីឡាករភីតប៉ែតស៊ែន ស៊ីត.លួងពូឧដុម ក្នុងប្រភេទទម្ងន់៥៧គីឡូក្រាម អ្នកទាំងពីរមិនធ្លាប់ជួបគ្នាទេនាពេលកន្លងមក ដោយកីឡាករថៃម្នាក់នេះទើបចូលប្រឡូកមកសង្វៀនស្រុកខ្មែរ ហើយមិនទាន់ដឹងថា គេមានវិជ្ជាគុនខ្លាំងប៉ុណ្ណានោះដែរ។
រីឯកីឡាករពេជ្រ ម្ទេសខ្មាំង គេជាកីឡាករជើងខ្លាំងក្នុងប្រភេទទម្ងន់នេះ ការប្រកួតជាមួយកីឡាករបរទេស គឺគេវាយកម្រចាញ់ណាស់ ហើយភាគច្រើន គឺផ្ដួលគូប្រកួតឲ្យសន្លប់ថែមទៀតផង។
សម្រាប់ការមកប៉ះ កីឡាករ ភីតប៉ែតស៊ែន ស៊ីត.លួងពូឧដុម នេះមិនដឹងថា កីឡាករម្ចាស់ផ្ទះ ពេជ្រ ម្ទេសខ្មាំង គេអាចបំបាក់កីឡាករថៃ ដែលជាភ្ញៀវឲ្យសន្លប់បានឬអត់នោះទេ តែតាមក្រុមអ្នកតាមដានប្រដាល់មួយចំនួនអះអាងថា ប្រហែលជាអាចទៅរួចព្រោះការប្រកួតក្នុងទឹកដីខ្លួនឯង បើមិនឈ្នះពិន្ទុក៏ឈ្នះដោយសន្លប់ដែរ។ ចាំមើលកីឡាករពេជ្រ ម្ទេសខ្មាំង ឬ កីឡាករភីតប៉ែតស៊ែន ស៊ីត.លួងពូឧដុម នណាជាអ្នកឈ្នះដណ្តើមបានប្រាក់លាននេះ?៕
Source: Kampuchea Thmey Daily
0 Comments