ភ្នំពេញ ៖ លោក ពេជ្រ កែវមុនី អភិបាលខណ្ឌមានជ័យ កាលពីនៅវេលាម៉ោង៩និង៣០នាទី ថ្ងៃព្រហស្បតិ៍ ១២កើត ខែបុស្ស ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី១៧ ខែមករា ឆ្នាំ ២០១៩ បានអញ្ជើញចុះទៅអង្គការមូលនិធិកុមារកម្ពុជា (ស្កុត) ស្ថិតនៅភូមិដំណាក់ធំ សង្កាត់ស្ទឹងមានជ័យទី២ ខណ្ឌមានជ័យ រាជធានីភ្នំពេញ ក្នុងពិធីប្រគល់ទទួលកូនភ្លោះស្រីចំនួន២នាក់ប្អូន ឲ្យទៅអង្គការចិញ្ចឹមបីបាច់ និងផ្តល់ការរៀនសូត្របានដូចកុមារដ៏ផ្សេងៗទៀត។
កូនភ្លោះស្រីពីរនាក់បងប្អូននោះមានឈ្មោះ (១) ឈ្មោះ វ៉ា យូរី អាយុ៦ឆ្នាំ (២) ឈ្មោះ វ៉ា យូរ៉ា អាយុ៦ឆ្នាំ ដែលមានអាសយដ្ឋាន នៅភូមិមានជ័យ១ សង្កាត់ស្ទឹងមានជ័យទី១ ខណ្ឌមានជ័យ រាជធានីភ្នំពេញ។
លោក ពេជ្រ កែវមុនី អភិបាលខណ្ឌមានជ័យ បានបញ្ជាក់ជូនថា លោកបានទទួលដំណឹងនេះតាមរយៈពលរដ្ឋដែលបានទៅចូលរួមក្នុងកម្មវិធីសម្ពោធវិមានអនុស្សាវរីយ៍នយោបាយ ឈ្នះ ឈ្នះ កាលពីថ្ងៃទី២៩ ខែធ្នូ ឆ្នាំ២០១៨ ដែលបានរាយការណ៍ជូនលោកថា កុមារីកូនភ្លោះពីរនាក់បងប្អូនខាងលើនេះ គឺជាក្មេងគួរឲ្យអាណិត និងប្រឈមហានិភ័យខ្ពស់បំផុតទៅនឹងអនាគតរបស់ពួកគេ ដោយសារតែឪពុកម្ដាយលែងលះគ្នា ហើយឪពុកក្មេងនេះក៏កំពុងស្ថិតនៅមណ្ឌលអប់រំកែប្រែគ្រឿងញៀនទៀតផង សព្វថ្ងៃពួកគេរស់នៅជាមួយម្តាយអ៊ំបង្កើត តែគាត់គ្មានលទ្ធភាពចិញ្ចឹមបីបាច់ ព្រោះជីវភាពខ្វះខាត ។ ពេលទទួលបានសេចក្តីរាយការណ៍ភ្លាម លោកអភិបាលខណ្ឌក៏បានដឹកនាំអោយមន្ត្រីរបស់លោកចុះទៅវាយតម្លៃស្ថានភាពរស់នៅរបស់កុមារទាំងពីរនេះភ្លាម។
ក្រោយពីបានរបាយការណ៍ពីមន្ត្រីរបស់លោករួចហើយ លោកក៏បានដឹកនាំឲ្យមន្ត្រីរបស់លោកធ្វើការទំនាក់ទំនងជាមួយនឹងអង្គការមូលនិធិកុមារកម្ពុជា ខាងលើឲ្យអស់លទ្ធភាព។ អង្គការមូលនិធិកុមារកម្ពុជា ក៏បានយល់ព្រមទទួលយកក្មេងនោះ ឲ្យរស់នៅក្នុងអង្គការ ចិញ្ចឹមបីបាច់ថែរក្សាឲ្យរៀនសូត្រដូចក្មេងដទៃទៀតដែរ ក្រោយដែលអង្គការបានទទួលរបាយការណ៍ និងការអន្តរាគមន៍ពីលោកអភិបាលខណ្ឌមានជ័យដោយផ្ទាល់។
ម្តាយអ៊ំរបស់កុមារីទាំងពីរនាក់ខាងលើនេះ ក៏បានឲ្យដឹងដែរថា រូបគាត់ពិតជាយល់ព្រមឲ្យកុមារីទាំងពីរទៅរស់នៅជាមួយអង្គការមូលនិធិកុមារកម្ពុជា ក្នុងអារម្មណ៍រំភើបរីករាយជាទីបំផុត ក្នុងនោះលោកស្រីក៏បានថ្លែងអំណរគុណដល់អាជ្ញាធរខណ្ឌ សង្កាត់ មន្ត្រីពាក់ព័ន្ធ ពិសេស លោកអភិបាលខណ្ឌមានជ័យ ដែលបានខិតខំប្រឹងប្រែង និងជួយអន្តរាគមន៍ផ្ទាល់អំពីករណីនេះ៕
Source: Kampuchea Thmey Daily
0 Comments