ប្រទេសរុស្ស៊ីកាលពីថ្ងៃពុធបានចោទប្រកាន់ប្រទេសជប៉ុនថាបានបញ្ឆេះភាពតានតឹងមុនដំណើរទស្សនកិច្ចតាមការគ្រោងទុករបស់នាយករដ្ឋមន្ត្រីជប៉ុនលោកស៊ីនហ្សូអាបេសម្រាប់កិច្ចពិភាក្សាជាមួយលោកប្រធានាធិបតីវ្ល៉ាឌីមៀរពូទីនដើម្បីបញ្ចប់អរិភាពសង្គ្រាមលោកលើកទីពីរជាផ្លូវការ។
ប្រទេសរុស្ស៊ីនិងជប៉ុនមិនដែលបានចុះហត្ថលេខាលើសន្ធិសញ្ញាសន្តិភាពមួយទេដោយសារតែជម្លោះទឹកដីរបស់ខ្លួនលើកោះចំនួន៤ដែលត្រូវបានឈ្លានពានដោយសហភាពសូវៀតនៅថ្ងៃចុងក្រោយនៃសង្គ្រាម។
ប្រទេសរុស្ស៊ីហៅប្រជុំកោះនោះថា Kurils ហើយជប៉ុនហៅពួកគេថា Northern Territories។
ក្រសួងការបរទេសរុស្ស៊ីនិយាយថា ខ្លួនបានអញ្ជើញឯកអគ្គរាជទូតជប៉ុនលោក Toyohisa Kozuki និងបានប្រាប់គាត់ថា ខ្លួនចាត់ទុកសេចក្តីថ្លែងការណ៍របស់ក្រុងតូក្យូនាពេលថ្មីៗនេះថាជា “ការប៉ុនប៉ងជំរុញបរិយាកាស” លើបញ្ហានៃសន្ធិសញ្ញាសន្តិភាព។
ក្រសួងបានលើកឡើងពីសេចក្តីថ្លែងការណ៍ស្តីពីភាពចាំបាច់ក្នុងការរៀបចំពលរដ្ឋសម្រាប់ការប្រគល់ប្រជុំកោះនេះទៅឲ្យប្រទេសជប៉ុននិងអំពីការច្រនចោលតម្រូវការដែលឲ្យប្រទេសរុស្ស៊ីត្រូវទូទាត់សំណងដល់អតីតពលរដ្ឋជប៉ុនរបស់កោះនេះព្រមទាំងលោកអាបេផងដែរដែលនិយាយថា ឆ្នាំ២០១៩នេះនឹងនាំមកនូវការទម្លាយភាពទាល់ច្រកលើសន្ធិសញ្ញាសន្តិភាព។
ក្រសួងនេះបាននិយាយថា “សេចក្តីថ្លែងការណ៍បែបនេះបានធ្វើឲ្យប៉ះពាល់ដល់សារៈសំខាន់នៃកិច្ចព្រមព្រៀងរវាងថ្នាក់ដឹកនាំជប៉ុននិងរុស្ស៊ីក្នុងការពន្លឿនវឌ្ឍនភាពនៃការចរចានិងប្រជាជនរបស់ប្រទេសទាំងពីរ”។
ក្រសួងបានសង្កត់ធ្ងន់ថា ជំហររបស់ប្រទេសរុស្ស៊ីលើប្រជុំកោះ Kurils មិនផ្លាស់ប្តូរទេហើយជប៉ុនត្រូវតែទទួលយកនូវលទ្ធផលនៃសង្គ្រាមលោកលើកទី២រួមទាំងអធិបតេយ្យភាពរបស់រុស្ស៊ីលើប្រជុំកោះជម្លោះនេះផងដែរ។
យោងតាមភ្នាក់ងារព័ត៌មានរុស្ស៊ីបានឲ្យដឹងថា សេចក្តីថ្លែងការណ៍ខឹងសម្បានេះបានកើតឡើងខណៈលោកអាបេគ្រោងនឹងធ្វើទស្សនកិច្ចប្រទេសរុស្ស៊ីនៅថ្ងៃទី២១ខែមករាដើម្បីពិភាក្សាជាមួយលោកពូទីនអំពីសន្ធិសញ្ញាសន្តិភាព៕ AFP
Source: Kampuchea Thmey Daily
0 Comments