ឧត្តរមានជ័យ ៖ នៅថ្ងៃទី១០ ខែមករា ឆ្នាំ២០១៩ វេលាម៉ោង៩និង៣០នាទី កម្លាំងជំនាញរបស់ការិយាល័យព្រហ្មទណ្ឌកម្រិតធ្ងន់ បានទទួលពាក្យបណ្ដឹងពីជនរងគ្រោះ ឈ្មោះ លឹម សុភ័ក្រ ភេទប្រុស អាយុ១៨ឆ្នាំ មានទីលំនៅបច្ចុប្បន្ន ភូមិបុរីរដ្ឋបាល សង្កាត់សំរោង ក្រុងសំរោង ខេត្តឧត្ដរមានជ័យថា មានករណី ហិង្សាដោយចេតនា មានស្ថានទម្ងន់ទោស ដោយប្រើប្រាស់អាវុធ (កាំបិត) ដែលបង្ក ឡើងដោយជនសង្ស័យ ឈ្មោះ តុន ភេទប្រុស អាយុប្រហែល២២ឆ្នាំ មានទីលំនៅបច្ចុប្បន្នភូមិកំណប់ សង្កាត់បន្សាយរាក់ ក្រុងសំរោង ខេត្តឧត្ដរមានជ័យ ។
ក្នុងនោះដែរ ជនសង្ស័យ បានធ្វើសកម្មភាពយកកាំបិតកាប់ទៅលើជនរងគ្រោះចំកែងដៃឆ្វេង និងខ្នងផ្នែកខាងក្រោយ បណ្ដាលឲ្យរងរបួស ដាច់សរសៃពួរកែងដៃ។ មូលហេតុ ដោយសារតែជនរងគ្រោះ បានលួចទាក់ទងផ្ញើសារតាមទូរស័ព្ទដៃជាមួយស្រីផ្សេង ដែលធ្វើឲ្យនារីជាសង្សារ (ត្រូវជាប្អូនជនសង្ស័យ) ខូចចិត្តបានអារ ក ដៃខ្លួន ធ្វើឲ្យជនសង្ស័យខឹង ហើយបានមកកាប់ទៅលើជនរងគ្រោះចំនួនមួយកាំបិត នៅនឹងមុខផ្ទះតែម្ដង។ នៅថ្ងៃទី១០ ខែមករា ឆ្នាំ២០១៩ វេលាម៉ោង២និង០០នាទី រំលងអធ្រាត្រ នៅចំណុចមុខផ្ទះជនរងគ្រោះ ស្ថិតនៅភូមិបុរីរដ្ឋបាល សង្កាត់សំរោង ក្រុងសំរោង ខេត្តឧត្ដរមានជ័យ។
ករណីខាងលើនេះ ការិយាល័យជំនាញ បានស្រាវជ្រាវស្វែងរកឃាត់ខ្លួនជនសង្ស័យ ដើម្បីកសាងសំណុំរឿងចាត់ការតាមនីតិវិធីច្បាប់៕
Source: Kampuchea Thmey Daily
0 Comments