សៀមរាប ៖ នគរបាលជាន់ខ្ពស់ នៃស្នងការដ្ឋានខេត្តសៀមរាបបានឲ្យដឹង នៅរសៀលថ្ងៃទី១៩មករា នេះថា ជនជាតិចិនចំនួន២០នាក់ ស្រី៥នាក់ ត្រូវបានកម្លាំងនគរបាលជំនាញឃាត់ខ្លួន ករណីបើកល្បែងស៊ីសងខុសច្បាប់តាមប្រព័ន្ធអ៊ីនធឺណិត។
ប្រតិបត្តិការនេះ ធ្វើឡើងនៅវេលាម៉ោង១៤និង៣០នាទី ថ្ងៃទី១៨ ខែមករា ឆ្នាំ២០១៩ ក្នុងទីតាំងផ្ទះជួលចំនួន២ទីតាំង ស្ថិតនៅភូមិភ្ញារជ័យ និងភូមិតាភុល សង្កាត់ស្វាយដង្គំ ក្រុងសៀមរាប។
ប្រភពពីមន្ត្រីនគរបាលខេត្តសៀមរាបបានឲ្យដឹងថា ប្រតិបត្តិការនេះ បានចុះអនុវត្តន៍ ដោយកម្លាំងការិយាល័យស៊ើបអង្កេតនិងអនុវត្តនីតិវិធីសហការជាមួយកម្លាំងការិយាល័យអន្តរាគមន៍ និងតម្រួតបទបញ្ជា កម្លាំងអធិការដ្ឋាននគរបាលក្រុងសៀមរាប-ប៉ុស្តិ៍នគរបាលរដ្ឋបាលសង្កាត់ស្វាយដង្គំ ក្រោមការដឹកនាំបញ្ជាដោយរៀម ច័ន្ទម្នី និង លោក ថេង សំណាង ព្រះរាជអាជ្ញារងអមសាលាដំបូងខេត្តសៀមរាប។
ប្រភពបន្តថា ក្នុងហេតុការណ៍នេះ សមត្ថកិច្ចបានឃាត់ខ្លួនមនុស្សចំនួន២០នាក់ ស្រី០៥នាក់ សញ្ជាតិ ចិន រួមនឹងវត្ថុតាងមួយចំនួនបញ្ជូនមកសាកសួរនៅការិយាល័យស៊ើបអង្កេត និងអនុវត្តនីតិវិធី នៃស្នងការដ្ឋាននគរបាលខេត្តសៀមរាប។
បច្ចុប្បន្ន កម្លាំងនគរបាលជំនាញ កំពុងសួរនាំ ជនសង្ស័យ ទាំងនេះនៅស្នងការដ្ឋានខេត្តសៀមរាប ហើយនឹងត្រូវបញ្ជូនទៅកាន់តុលាការខេត្តសៀមរាប នៅថ្ងៃទី២០ ខែមករា ឆ្នាំ២០១៩ខាងមុខនេះ៕
Source: Kampuchea Thmey Daily
0 Comments