កំពង់ចាម ៖ ឥទ្ធិពលប្រាក់ និងស្រាថ្លៃ បានប្ដូរនិស្ស័យ ធ្វើអោយដៃឧកញ៉ាម្នាក់ទៅជារស់រវើកដូចដៃមឹក ហើយបានលូកលាន់ និងប្រើហិង្សាបង្កភាពខ្លោចផ្សាដល់នារីៗបម្រើខារ៉ាអូខេនៅផ្ទះសំណាក់មួយកន្លែងមានយីហោ( វីឡា) ស្ថិតនៅក្នុងសង្កាត់វាលវង់ ក្រុងកំពង់ចាម ខេត្តកំពង់ចាម កើតឡើងនៅវេលាម៉ោង២០ ថ្ងៃទី៥ ខែមករាឆ្នាំ២០១៩។
ឧកញ៉ាខាងលើមានឈ្មោះ វ៉ន ប៊ុនថៃ ហៅ ឧកញ៉ា ថៃ ជា អតីតឈ្មួញអ្នករកស៊ីជួញដូរឈើដ៏ល្បីនៅខេត្តក្រចេះ ត្បូងឃ្មុំ មានលំនៅឋាន ស្រុកអូររាំងឪ ខេត្តត្បូងឃ្មុំ បានបង្កហិង្សាលើ នារីរងគ្រោះឈ្មោះ( ច ហ) ជានារីបម្រើខារ៉ាអូខេក្នុងបន្ទប់លេខ ៦៦៦៦ផ្ទះសំណាក់វីឡា ក្រុងកំពង់ចាម។
ប្រភពព័ត៌មានពីអ្នកឃើញហេតុការណ៍នៅកន្លែងកើតហេតុ បានបញ្ជាក់ថា មុនពេលកើតហេតុ មានឧកញ៉ា វ៉ន ប៊ុនថៃ បានចូលច្រៀងខារ៉ាអូខេ នៅផ្ទះសំណាក់ វីឡា ក្នុងបន្ទប់លេខ៦៦៦៦។ ប្រភពដដែលបានបន្តថា ក្រោយពីសុរា ដែលមានតម្លៃថ្លៃចូលក្នុងពោះជាច្រើនរួចមក ទឹកសុរាបានប្តូរនិស្ស័យ ឧកញ៉ា ថៃប្រែក្លាយជារស់រវើក ប្រៀបដូចជាដៃមឹក រួចក៏លូកលាន់បេះបោច ច្របាច់ខ្ញាំបង្កភាពឈឺចាប់ដល់នារីរងគ្រោះ ធ្វើអោយនាងទ្រាំមិនបានរត់ចេញពីបន្ទប់ខារ៉ាអូខេ ទាំងទឹកភ្នែកលែងចង់បានលុយ តទៅទៀត។
ប្រភពបានបន្តថា បន្ទាប់មក ឧកញ៉ា ថៃ បានហៅនារីបម្រើខារ៉ាអូខេម្នាក់ទៀត រួចក៏ខោកក្បាលលេងជាល្បែង ធ្វើអោយនារីរងគ្រោះ ទី២ម្នាក់នេះក៏ដូចនារីមុនទ្រាំលែងបាន រត់មកខាងក្រៅទាំងទឹកភ្នែករហាម។ ក្រោយពីបង្កចលាចល លើនារីខារ៉ាអូខេ បានបន្តិចមក គេឃើញនគរបាលខេត្តកំពង់ចាម និងកងរាជអាវុធហត្ថខេត្តកំពង់ចាម ទៅដល់កន្លែងកើតហេតុ ហើយនាំខ្លួនលោកឧកញ៉ា ថៃ មកស្នងការដ្ឋាននគរបាលខេត្តកំពង់ចាម ដើម្បីធ្វើការសាកសួរ និងបំពេញសំណុំបែបបទតាមនីតិវិធី។
ប៉ូលិសបានអោយដឹងថា នៅព្រឹកថ្ងៃទី៦ ខែមករា ឆ្នាំ២០១៩ សមត្ថកិច្ចជំនាញការិយាល័យនគរបាលព្រហ្មទណ្ឌកម្រិតស្រាលខេត្តកំពង់ចាម បានអញ្ជើញម្ចាស់ផ្ទះសំណាក់វីឡា មកបំភ្លឺនិងភាគីសងខាងមកសាកសួរ។
លោក ឧត្តមសេនីយ៍ត្រី ហេង វុទ្ធី ស្នងការរងនគរបាលខេត្តកំពង់ចាមបានអោយដឹងថា ដំណោះស្រាយចុងក្រោយគឺភាគីរងគ្រោះមិនធ្វើការប្តឹងផ្តល់អ្វីឡើយ គឺភាគីចុងចោទអោយ ឧកញ៉ាថៃបានសុំទោស ជនរងគ្រោះ ហើយសមត្ថកិច្ចបានអោយលោកឧកញ៉ាថៃ វិលត្រឡប់ទៅគេហដ្ឋានរបស់លោកវិញ។
ប្រជាពលរដ្ឋដែលដឹងហេតុការណ៍ដ៏អាក្រក់នេះ បានខឹងនឹងទង្វើអសីលធម៌ របស់ឧកញ៉ា ថៃ ដែលមើលងាយជាន់ឈ្លីលើកិត្តិយសរបស់នារីខ្មែរដោយសារអំណាចទឹកប្រាក់ តើក្នុងនោះវាមានអ្វីនៅពីក្រោយខ្នងរឿងនេះ។ ប្រជាជនបានបន្តថាពងមាន់ទៅជល់ដុំថ្ម មិនអាចទៅរួចទេ៕
Source: Kampuchea Thmey Daily
0 Comments