មនុស្ស៣នាក់ ត្រូវបានចាប់ខ្លួន ខណៈសាលាដំបូងខេត្តព្រះសីហនុ ដឹកនាំសមត្ថកិច្ចចម្រុះចុះ អនុវត្តដីការក្សាការពារលើដីទំនាស់ ក្នុងឃុំរាម ស្រុកព្រៃនប់

ព្រះសីហនុ ៖ មនុស្សចំនួន០៣នាក់ ត្រូវសមត្ថកិច្ចកងរាជអាវុធហត្ថ ធ្វើការចាប់ខ្លួនភ្លាមៗ ខណៈ ពេលជនទាំង០៣នាក់នោះ បានព្យាយាមម្តងហើយ ម្តងទៀត មកធ្វើការរារាំងដល់សមត្ថកិច្ចចម្រុះរបស់អាជ្ញាធរខេត្តក្នុងពេលចុះអនុវត្តដីការក្សាការពារលើដីទំនាស់មួយកន្លែងស្ថិតក្នុងតំបន់ភូមិស្មាចដែង ស្រុកព្រៃនប់កាលពីព្រឹក ថ្ងៃទី០៤ ខែមករា ឆ្នាំ២០១៩។ ជនទាំង០៣នាក់នោះ បានធ្វើការអះអាងថា ខ្លួនជាកូនចៅយាមដីឲ្យលោកជំទាវ និងលោកឧត្ដមសេនីយ៍ផ្កាយ៣ ដ៏មានឥទ្ធិពលម្នាក់នៅទីក្រុង ភ្នំពេញ។

មនុស្សចំនួន០៣នាក់ខាងលើ មានឈ្មោះ ទី១. ហួន បញ្ញា ភេទប្រុស ទី២.ហេង ស៊ី ថា ភេទប្រុស ទី៣.ឈ្មោះភ័ក្រស៊ីម៉ា ភេទប្រុស។ ជុំវិញការចាប់ខ្លួនមនុស្ស សមត្ថកិច្ចកងរាជអាវុធហត្ថ បានបញ្ជាក់ថា ជនទាំង៣នាក់ខាងលើនេះ ក្នុងពេលគណៈកម្មការចម្រុះ ចុះអនុវត្តដីកា រក្សា ការពារ របស់ សាលាដំបូងខេត្តព្រះសីហនុលេខ១០៨៣ ចុះថ្ងៃទី០៩ ខែសីហា ឆ្នាំ២០១៨ ដឹកនាំដោយ លោក ផៃប៊ុន វណ្ណៈ នឹង លោក សុខ កល្យាណ ចៅក្រម ទទួលបន្ទុក សំណុំ រឿង នោះ ពួកគេទាំង០៣នាក់ បានមកធ្វើការរារាំង ម្តង ហើយម្តងទៀត រំខានដល់កម្លាំង សមត្ថកិច្ច ដែលកំពុងចុះអនុវត្តការងារ ព្រមទាំងបានយកឈ្មោះ លោកជំទាវម្នាក់ ឈ្មោះ ធឿន ដែលមានប្តីមានឋានៈជាឧត្ដមសេនីយ៍ផ្កាយ០៣ ផងនោះ មកធ្វើការគំរាម ដល់សមត្ថ កិច្ច។

សម្រាប់ សមត្ថកិច្ចក្នុងពេលនោះ បានព្យាយាមធ្វើការពន្យល់ណែនាំផងដែរ ទៅដល់ជនទាំង០៣នាក់ឲ្យបញ្ឈប់សកម្មភាពរារាំង ព្រោះទង្វើនេះ ជាអំពើខុសច្បាប់ ប៉ុន្តែពួកគេ មិនព្រម ទើបសមត្ថកិច្ចបង្ខំចាប់នាំខ្លួនយក ទៅធ្វើការសាកសួរតែម្តង។ ជនទាំង០៣នាក់ នៅ ចំពោះមុខ លោក សុខ កល្យាណ ចៅក្រមស៊ើបសួរ អមសាលាដំបូងខេត្តព្រះសីហនុ ពួកគេ បាន បញ្ជាក់ថា ជាអ្នកចាំដីឲ្យគេ ហើយចំពោះឯកសារពាក់ព័ន្ធរឿងដីខាងលើនេះ ពួកគេគ្មានទេ គឺមានតែ អត្តសញ្ញាណប័ណ្ណ ស៊េរីចាស់ របស់ លោក ស្រី ឈ្មោះ ចាន់ធឿន និង ប្តីរបស់គាត់តែប៉ុណ្ណោះ។

ជាមួយនឹងបញ្ហានេះ លោកចៅក្រម សុខ កល្យាណ បានធ្វើការណែនាំថា ពេលនេះ គឺជាពេលមន្ត្រីមានសមត្ថកិច្ចចុះអនុវត្តច្បាប់ ដូចនេះ ប្រសិនបើ ភាគីណាមួយ មិនសុខចិត្ត នឹងការចុះអនុវត្តសេចក្តីសម្រេច ដីការក្សាការពាររបស់សាលាដំបូងខេត្តព្រះសីហនុ ខាងលើនេះទេ អាចដាក់ពាក្យបណ្តឹង តវ៉ា បាន តាមមាត្រា ៥៥០ នៃក្រម រដ្ឋប្បវេណី។ ប៉ុន្តែ ក្រោយ មក ជនទាំងបីនាក់ខាងលើ ត្រូវបាន លោក ចៅក្រម ធ្វើការដោះលែងវិញដោយយល់ ថាពួក អ្នកទាំង០៣នាក់នេះមិនសូវមានការយល់ដឹង ប៉ុន្តែ បើសិនជាមានលើកក្រោយទៀត ឈប់ យោគយល់បែបនេះទៀតហើយ។

គួរបញ្ជាក់ផងដែរ ដីការក្សាការពារ លេខ ១០៨៣ ចុះថ្ងៃទី០៩ ខែសីហា ឆ្នាំ២០១៨ របស់សាលាដំបូងខេត្តព្រះសីហនុ ខាងលើនេះ ម្ចាស់ដើមបណ្តឹង ឈ្មោះ ស ស៊ឹង ចំណែក ឯ កូនបំណុល ឈ្មោះ តាន់ ឬទ្ធី លើទីតាំងដីទំហំប្រមាណ ២៦៨.៥៧៥០ហិកតាក្នុងតំបន់សុបិន ស្ថិតក្នុងភូមិស្មាចដែង ឃុំរាម ស្រុកព្រៃនប់ ខេត្តព្រះសីហនុ ហើយចំណាត់ការចុះរុះរើ តាម តាមខ្លឹមសារ ដីរក្សាការពារខាងលើ ជាលទ្ធផលសមត្ថកិច្ចចម្រុះបានរុះរើ ខ្ទមធ្វើពីឈើ ប្រក់ ស័ង្កសី ចំនួន២២ខ្ទម និងតង់ប្រក់កៅស៊ូចំនួន០៣។

ពាក់ព័ន្ធទីតាំងដីទំនាស់នេះ លោកស ស៊ឹង បានអះអាងថា ដីនេះគាត់បានទិញ ជាច្រើនឆ្នាំមកហើយ និងមានការទទួល ស្គាល់ ពីអាជ្ញាធរដែនដី និងជំនាញគ្រប់លំដាប់ថា ចំណែក ឈ្មោះ តាន់ ឬទ្ធី មិនមានអ្វីទាំង អស់ គឺចូលមករំលោភ បំពានឆៅៗតែម្តង តាមគ្រប់រូបភាព ដូចជាកាប់ឆ្ការព្រៃ សាងសង់ ផ្ទះ និងខ្ទម ជាដើម ជាហេតុ ឲ្យ រូបគាត់ជាម្ចាស់ដីស្រប់ច្បាប់ រងទុកលំបាកគ្រប់ពេលវេលា ហើយអ្វីដែលគួរឲ្យកត់សម្គាល់ផងនោះគឺអ្នកមកចាំដី ឲ្យឈ្មោះ តាន់ ឬទ្ធី ភាគច្រើនជា ជាយោធា ដោយមិនដឹងថា ក្រុមទាហានទាំងនោះមកពីណានោះទេ ហើយជារៀងរាល់យប់ ពួកគេតែង ធ្វើការបាញ់បោះ យ៉ាងអនាធិបតេយ្យ បង្កភាពភ័យខ្លាច ដល់ ប្រជាពលរដ្ឋ រស់នៅក្បែរៗនោះគ្រប់ពេល៕