តាកែវ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីកម្ពុជាបានអំពាវនាវឲ្យមេសហជីពទាំងអស់បញ្ឈប់ជាបន្ទាន់នូវការញុះញង់ឲ្យកម្មករទាមទារឲ្យថៅកែបើកផ្តាច់ប្រាក់អតីតភាពផ្តាច់ត្រឹមឆ្នាំ២០១៨ ដោយសម្តេចលើកហេតុផលថា ការទាមទារនេះនឹង ជំរុញឲ្យរោងចក្រប្រមាណជា២ភាគ៣ ឬស្មើនឹងប្រមាណ៨០០ ត្រូវបង្ខំចិត្តបិទទ្វារឈប់ដំណើរការ។
គួរកត់សំគាល់ថា ក្នុងប៉ុន្មានសប្តាហ៍កន្លងមកនេះ កម្មកររោងចក្រកាត់ដេរនៅរាជធានីភ្នំពេញ ខេត្តតាកែវ ខេត្តកំពង់ស្ពឺ បានផ្ទុះការតវ៉ាជាបន្តបន្ទាប់ទាមទារទៅថៅកែរបស់ខ្លួនឲ្យទូទាត់ប្រាក់ទាំងអស់សម្រាប់ឆ្នាំចាស់ជូនពួកគេទាំងប្រាក់អតីតភាពការងារនិងអត្ថប្រយោជន៍ផ្សេងៗ ដោយថាពួកគេបារម្ភខ្លាចថៅកែគេចវេសមិនទូទាត់ឲ្យពេលអនុវត្តច្បាប់ថ្មី ចាប់ពីឆ្នាំ២០១៩នេះទៅ។
សម្តេចតេជោនាយករដ្ឋមន្ត្រីកម្ពុជា បានមានប្រសាសន៍ថា «ពូអត់នឹកដល់ថាស្រាប់តែមានរោងចក្រប្រហែលជា ៦រោងចក្រ នៅទីក្រុងភ្នំពេញ ៣ នៅតាកែវ២ និង កំពង់ស្ពឺ១ បែរជាសុំទូទាត់នៅខែមករាហ្នឹងផ្តាច់តែម្តង »។
សម្តេចតេជោ ហ៊ុន សែន បានចោទជាសំណួរសួរបញ្ជាក់ត្រឡប់ទៅវិញថា តើទុកឲ្យរោងចក្រនេះក្ស័យធនតាមរយៈការប្រមូលទុនទាំងអស់យកមកបើកឲ្យកម្មករ កម្មការិនី តែក្នុងមួយពេល រួចហើយបិទរោងចក្រឬយ៉ាងណា? សូមក្មួយៗពិចារណាមើលទៅព្រោះរោងចក្រទាំងអស់នោះនឹងចូលដល់កម្រិតក្ស័យធន ដូច្នេះអ្នកដែលខាតបង់គឺកម្មករ-កម្មការិនីយើងទាំងអស់គ្នាតែប៉ុណ្ណោះ។
សម្តេចតេជោនាយករដ្ឋមន្ត្រីបានមានប្រសាសន៍ថា «ពីមុននេះ បីបួនឆ្នាំមិនទាន់នឹងទូទាត់ផង បីបួនឆ្នាំទាល់តែគេបញ្ឈប់បានគេទូទាត់ឲ្យ អីឡូវនេះតើមានក្រុមញុះញង់មកពីណាទៅ ដែលបង្កើតឲ្យមានស្ថានភាពបើកផ្តាច់នៅក្នុងខែមករាឆ្នាំ២០១៩»។
សម្តេចតេជោនាយករដ្ឋមន្ត្រីបន្តថា ប្រសិនបើធ្វើតាមការទាមទាររបស់កម្មករ កម្មការិនីនេះ នឹងធ្វើឲ្យរោងចក្រប្រមាណ២ភាគ៣នឹងត្រូវបិទទ្វារ ព្រោះផែនការបង្វិលទុនរបស់ម្ចាស់រោងចក្រ កាលពីពេលមុនគឺអនុវត្តតាមច្បាប់ចាស់មិនមែនអនុវត្តតាមច្បាប់ថ្មីនោះទេ ដូច្នេះផែនការបង្វិលទុនរបស់ថៅកែរោងចក្រ គឺធ្វើតាមផែនការបង្វិលរបស់ពួកគេផងដែរ។
សម្តេចនាយករដ្ឋមន្ត្រីបានបញ្ជាក់ថា រាជរដ្ឋាភិបាលបានខិតខំរិះរកដំណោះស្រាយ ឈ្នះ ឈ្នះ ដោយមិនទុកឲ្យកម្មករ-កម្មការិនីចាញ់ មិនទុកឲ្យថៅកែចាញ់ ហើយក៏មិនទុកឲ្យរាជរដ្ឋាភិបាលចាញ់នោះដែរ។ ដោយសារតែកន្លងមករាជរដ្ឋាភិបាលបានចំណាយថវិកាអស់ ២២ លានដុល្លារ ដើម្បីសងចំពោះកម្មករ-កម្មការិនីដែលថៅកែរត់ចោល។
សម្តេចបន្តថា មេសហជីពម្នាក់ដែលដឹកនាំធ្វើបាតុកម្មនេះក៏ជាមេសហជីពគាំទ្រគណបក្សប្រជាជនកម្ពុជា ប៉ុន្តែបែរជាមិនយល់គោលការណ៍របស់គណបក្សក្នុងការជួយកម្មករទៅវិញ។ សម្តេចបញ្ជាក់ថា «នេះហើយជាចំណុចដែលខ្ញុំចង់អំពាវនាវ ព្រោះខ្ញុំឮសូររឿងនេះប៉ុន្មានថ្ងៃមកហើយធ្វើបាតុកម្ម ហើយអ្នកដឹកនាំធ្វើបាតុកម្មនោះ គឺជាសហជីពគាំទ្រគណបក្សប្រជាជនកម្ពុជាទៅទៀតអីចឹង»។
សម្តេចនាយករដ្ឋមន្ត្រីបន្តថា «យើងជាអ្នកបំផ្លាញការងារដោយខ្លួនឯង ដែលមិនគូរឲ្យមានទេ។ រឿងនេះវានឹងរីករាលដាលហើយៗ បើធ្វើទៅលើរោងចក្រមួយ រោងចក្រដទៃនឹងធ្វើទាំងអស់។ នេះជាការពន្យល់ហេតុផលដែលមុននេះទាល់តែគេបញ្ឈប់យើង ទើបគេបើប្រាក់អត្ថប្រយោជន៍។
ប៉ុន្តែឥឡូវនេះ ច្បាប់បានកែសម្រួលហើយ ៦ខែម្តងបានបើក គេហៅថា ដោះស្រាយម្តងតាមដំណាក់ៗ របស់វា»។ សម្តេចតេជោបន្តថា ការទាមទារបែបនេះវាក៏ផ្ទុយទៅនឹងច្បាប់ផងដែរ។
សម្តេចនាយករដ្ឋមន្ត្រី ក៏បានមានប្រសាសន៍អំពាវនាវទៅដល់កម្មករ-កម្មការិនីថា បើមានសហជីពណាដឹកនាំទៅរកស្ថានភាពអាក្រក់ កុំជឿតាមការអូសទាញរបស់សហជីពនោះ និងសុំអំពាវនាវដល់សហជីពដែលដឹកនាំកម្មករធ្វើបាតុកម្ម កុដកម្ម ទៅលើបញ្ហានេះបញ្ឈប់ជាបន្ទាន់នូវសកម្មភាព ដែលឈានចូលទៅដល់ស្ថានភាពជ្រុលនិយមនេះឯង។
សម្តេចតេជោនាយករដ្ឋមន្ត្រីបានលើកឡើងទៀតថា ស្ថិតក្នុងក្របខណ្ឌពាណិជ្ជកម្មសេរីបណ្តាប្រទេសមួយចំនួនបាននាំទំនិញមកកម្ពុជាថយពន្ធ ហើយកម្ពុជាក៏នាំចូលទំនិញទៅគេវិញថយពន្ធប៉ុណ្ណឹងដូចគ្នាផងដែរ។ រៀងរាល់ឆ្នាំកម្ពុជាបានកាត់បន្ថយពន្ធគយពិតហើយការកាត់បន្ថយពន្ធគយនៅតាមក្របខណ្ឌរបស់អាស៊ាននិងក្របខណ្ឌសេរីជាមួយប្រទេសដទៃមិនបានធ្វើឲ្យប្រាក់ចំណូលពន្ធគយកម្ពុជាថយនោះទេ ផ្ទុយទៅវិញពន្ធគយកម្ពុជាមានការកើនឡើងទៅវិញ៕
Source: Kampuchea Thmey Daily
0 Comments