ភ្នំពេញ ៖ ស្របពេល ដែលទទួលបានដំណឹង នៃការធ្លាក់ខ្លួនឈឺ ហើយដោយមើលឃើញពីភាពខ្វះខាតរបស់តារាកំប្លែងជើងចាស់នាយ សាន ម៉ៅ ខណៈបច្ចុប្បន្នកំពុងតែចូលសង្គ្រោះបន្ទាន់នៅមន្ទីរពេទ្យប្រទេសថៃនោះ សម្ដេចកិត្តិព្រឹទ្ធបណ្ឌិតប៊ុនរ៉ានី ហ៊ុន សែន មានក្តីសន្ដោសប្រោសប្រណី បានបរិច្ចាគថវិកា ដើម្បីឧបត្ថម្ភជួយសម្រួលលើថ្លៃព្យាបាលសម្រាប់ក្រុមគ្រួសារនាយ។
ផ្អែកតាមការរៀបរាប់របស់លោក ហេង ឡុង គូស្នេហ៍របស់អ្នកនាង ចន ច័ន្ទលក្ខិណា បានលើកឡើងថា មានសង្ឃឹមហើយបងប្អូន សូមអបអរសាទរចំពោះបង សាន ម៉ៅ ដែលត្រូវបានសម្ដេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន ជួយឧបត្ថម្ភក្នុងការសង្គ្រោះបន្ទាន់នៅប្រទេសថៃ សូមជួយស៊ែរអបអរសាទរចំពោះគាត់ផង ពេលនេះលោកពូ សាន ម៉ៅ កំពុងសម្រាកព្យាបាលនៅមន្ទីរមួយដែលស្ថិតនៅខេត្តស៊ីសាកេត ប្រទេសថៃ។
លោក ហេង ឡុង បានបញ្ជាក់ឲ្យដឹងបន្ថែមទៀតថា ពេលនេះស្ថានភាពរបស់លោកបានធូរបន្តិចហើយ។ ខ្ញុំសូមជូនពរអោយលោកពូឆាប់ជាពីជំងឺទាំងឡាយ។ គេចាំបានថា តារាកំប្លែងនាយ សាន ម៉ៅកាលពីថ្មីៗកន្លងមកនេះបានធ្លាក់ខ្លួនឈឺធ្ងន់ ត្រូវបានក្រុមគ្រួសារបញ្ជូនចូលសង្គ្រោះបន្ទាប់នៅមន្ទីរពេទ្យកាល់ម៉ែត ប៉ុន្តែដោយសារស្ថានភាពជំងឺហាក់គ្មានភាពធូរស្រាល ក៏ត្រូវបានបញ្ជូនបន្តទៅសង្គ្រោះនៅប្រទេសថៃ។
ទន្ទឹមគ្នានោះដែរកាលពីថ្មីៗមុននេះប្រធានសមាគមសិល្បករខ្មែរអ្នកនាងចន ច័ន្ទលក្ខិណា ក៏បានបញ្ជាក់ដែរ ថា អំឡុងពេលលោកពូព្យាបាលនៅមន្ទីរពេទ្យ ក្នុងប្រទេសខ្មែរ ក្នុងបន្ទប់សង្គ្រោះបន្ទាន់រយៈពេល២១ថ្ងៃគាត់ចំណាយអស់ជិត១០០០០ម៉ឺនដុល្លារ។ ហើយគ្រួសាររបស់លោក ពូ(នាយ សាន ម៉ៅ ) បានយកផ្ទះ និង ឡាន ទៅបញ្ចាំបានថវិកាចំនួន១៥០០០ដុល្លារដើម្បីយកលោកពូទៅ ព្យាបាលនៅមន្ទីរពេទ្យក្នុងទឹកដីប្រទេសថៃ។
តារាស្រីអ្នកនាង ចន ច័ន្ទលក្ខិណា បន្ថែមថា ហើយមកដល់ពេលនេះ គឺគាត់បានចំណាយលើថ្លៃរថយន្តសង្គ្រោះពី ភ្នំពេញដល់ព្រំដែនខ្មែរថៃអស់៣០០០ដុល្លារហើយថ្លៃ រថយន្ត សង្គ្រោះពីព្រំដែនខ្មែរថៃ និងពីព្រំដែនខ្មែរថៃទៅខេត្តស៊ីសាកេតប្រទេសថៃគឺចំណាយអស់ជាង៧០០០ បាត នេះ គ្រាន់តែថ្លៃរថយន្តដឹកអ្នកជំងឺទេថ្លៃព្យាបាលគឺមិនទាន់ដឹងនៅឡើយទេ៕
Source: Kampuchea Thmey Daily
0 Comments