យុគ យក្ស​ផ្លែ និង ម៉ន សា​ម៉េ​ត កក់​កៅអី​ សម្រាប់​ជុំ​ទី​៣

​អ្នក​ប្រដាល់​យុគ យក្ស​ផ្លែ ក្លិប​បូរី​រាជសីហ៍​មាន​រិ​ទ្ធ និង ម៉ន សា​ម៉េ​ត អ្នក​ប្រដាល់​ក្លិប​កង​ចក្រ​រាជសីហ៍​មាន​រិ​ទ្ធ​ពួកគេ​ពីរ​នាក់​នេះ បាន​កក់​កៅអី​ទុក​រួចហើយ សម្រាប់​ការប្រកួត​នៅក្នុង​ជុំ​ទី​៣ ដែលជា​វគ្គ​៨​នាក់​ចុងក្រោយ នៃ​ពានរង្វាន់​ជើងឯក​TV5 Knock Out Series​ទម្ងន់​៥៧​គ​.​ក្រ ក្រោយពី​ពួកគេ​ទាំងពីរ បាន​វាយ​ឈ្នះ​លើ​ដៃគូ ក្នុងការ​ប្រកួត​ជម្រុះ​ជុំ​ទី​២ កាលពី​យប់​ថ្ងៃ​សៅរ៍ ​ទី​០៥​ ខែ​មករា​ឆ្នាំ​២០១៩ នៅ​លើ​សង្វៀន TV5 ព្រែកកំពឹស។​
​
យុគ យក្ស​ផ្លែ គេ​វាយ​ឈ្នះ សេន កុសល អ្នក​ប្រដាល់​ក្លិប​មោងឬស្សី​មរតក​គុន​ខ្មែរ ដោយ​ពិន្ទុ​មិន​ឯក​ឆន្ទ ៤​ទល់​១ ពោលគឺ​ក្នុង​ចៅក្រម​៥​រូប មាន​៤​រូប​បានផ្តល់​ពិន្ទុ​ឲ្យ​យក្ស​ផ្លែ​ឈ្នះ និង​១​រូប​ផ្តល់​ឲ្យ​ សេន​កុសល​ឈ្នះ។​ សេន កុសល គេ​វាយ​ចាញ់​យក្ស​ផ្លែ​ដាច់​ពីរ​ទឹក​ទៅ​ហើយ ដោយ​ត្រូវ​យក្ស​ផ្លែ​វាយ​ត្រូវ​មុខ​ពេញៗ និង​ដួល​លើ​រេញ​ញឹកញាប់​ទៀត​ផង។
​
សេន កុសល គេ​គ្រាន់តែ​មានប្រៀប​បន្តិច​ត្រង់​អាជ្ញាកណ្ដាល​ព្រមាន​កាត់​ពិន្ទុ​យុគ យក្ស​ផ្លែ​នៅពេល​ដែល​យក្ស​ផ្លែ​វាយ​បំពាន​លើ​រូបគេ​នៅក្នុង​ទឹក​ទី​២​នោះ។ តែ​កុសល ក៏ត្រូវ​អាជ្ញាកណ្ដាល​រាប់​៨​ផង​ដែរ មុនពេល​ព្រមាន​យុគ យក្ស​ផ្លែ ​ដែល​ទាត់​ត្រូវ​ប្រដាប់​ការពារ​ពង​របស់​កុសល​នោះ។

ទោះជា​យ៉ាងណា សេន កុសល គេ​ត្រូវ​ជ្រុះ​ធ្លាក់​ចេញពី​ការប្រកួត​ដណ្តើម​កំពូល​ជើងឯក​TV5 Knock Out Series ទម្ងន់​៥៧​គ​.​ក្រ​ត្រឹម​ជុំ​ទី​២​នេះ។ ឯ យុគ យក្ស​ផ្លែ គេ​ត្រូវ​បន្ត​ការប្រកួត​នៅ​ជុំ​ទី​៣​ទៀត។​
​
ចំណែក ម៉ន សា​ម៉េ​ត គេ​បាន​យកឈ្នះ​សិស្ស​ប្អូន​រួម​គ្រូ រឿន សុខលី អ្នក​ប្រដាល់​ក្លិប​ការិយាល័យ​ទី​៥ កងទ័ពជើងគោក ក្នុង​ទឹក​ទី​២ ក្នុងការ​ប្រកួត​ជម្រុះ​ជុំ​ទី​២​នេះដែរ។
​
រឿន សុខលី ត្រូវ​សិស្ស​ច្បង​ម៉ន សា​ម៉េ​ត វាយ​មិន​សំចៃ​ដៃ​នោះទេ ដែល​ធ្វើឲ្យ​ សុខលី ​ត្រូវ​អាជ្ញាកណ្ដាល​រាប់​៨​ម្តង ហើយ​និង​ដួល​មួយលើកទៀត អាជ្ញាកណ្ដាល​ក៏​បញ្ឈប់​សុខលី លែងឲ្យ​ប្រកួត​តែម្តង។ ​ដូច្នេះ រឿន សុខលី គេ​ត្រូវ​ជ្រុះ​ធ្លាក់​ត្រឹមនេះ ឯ ម៉ន សា​ម៉េ​ត គេ​នៅ​បន្ត​ការប្រកួត​នៅ​ក្នុង​ជុំ​ទី​៣​បន្តទៀត។​
​
គួរ​បញ្ជាក់ថា ការប្រកួត​ជម្រុះ​ចម្រាញ់​រក​កីឡាករ​ដែល​ខ្លាំង​នោះ នឹង​ធ្វើជា​៤​ជុំ ដោយ​ក្នុងចំណោម​៣២​នាក់ ក្នុង​ជុំ​ទី​១​ចម្រាញ់​ទុក​១៦​នាក់ ជុំ​ទី​២ ទុក​៨​នាក់ ដែល​ជា​អ្នកឈ្នះ​សម្រាប់​បន្ត​ការប្រកួត​ក្នុង​ជុំ ទី​៣ ដែល​ជា​ការប្រកួត​វគ្គ​៨​នាក់​ចុងក្រោយ​គឺ​ជម្រុះ​ចោល​៤​រូប ទុក​៤​រូប សម្រាប់​ទៅ​ប្រកួត នៅ​ជុំ​ទី​៤ ដែលជា​ការប្រកួត​វគ្គ​ពាក់កណ្ដាល​ផ្ដាច់ព្រ័ត្រ និង ផ្ដាច់ព្រ័ត្រ ដើម្បី​ដណ្ដើម​ពានរង្វាន់​ជើងឯក​TV5 Knock Out Series ទម្ងន់​៥៧​គ​.​ក្រ។​
​
ចំពោះ ការប្រកួត​ជា​លក្ខណៈ​អន្តរជាតិ​ជាតិ ដែល​ជា​ការ​ជួបគ្នា​រវាង​ ម៉ន ព្រហ្ម​ម៉ាញ អ្នក​ប្រដាល់​ក្លិប​ការិយាល័យ​ទី​៥ កងទ័ពជើងគោក ជាមួយ​អ្នក​ប្រដាល់​មកពី​ប្រទេស​ថៃ​ឈ្មោះ​កង បូរី (Kang Bori) ដោយ​ប្រកួត​ក្នុង​ទម្ងន់​៦៣,៥០០​គីឡូក្រាម​នោះ គឺ​ជ័យជំនះ បាន​ទៅលើ​កង បូរី។​
​
ម៉ន ព្រហ្ម​ម៉ាញ ត្រូវ​អ្នក​ប្រដាល់ កង បូរី ធាក់​ចំ​ចុងដង្ហើម​មួយ​ជើង​ពេញ ដែល​ធ្វើឲ្យ ​ម៉ន ព្រហ្ម​ម៉ាញ ដួល​ចុក​ននាល​លើ​រេញ ហើយ​ត្រូវ​អាជ្ញាកណ្ដាល​រាប់​ដល់​១០ បញ្ឈប់​ការប្រកួត​របស់​ ម៉ន ព្រហ្ម​ម៉ាញ ​តែម្តង។
​
ចំណែក ឡុង បេន​លឿន អ្នក​ប្រដាល់ ក្លិប​សាល​វ័​ន្ត​កីឡា បាន​វាយ​ផ្តួល​យកឈ្នះ​ភួង ណាំ​ហង អ្នក​ប្រដាល់ ក្លិប​រស្មី​កុមារកំព្រា ក្នុង​ទឹក​ទី​២ ប៉ុណ្ណោះ។ ពីរ​នាក់​នេះ ប្រកួត​គ្នា​ក្នុង​ប្រភេទ​ទម្ងន់​៦៣,៥០០​គីឡូក្រាម​៕


Source: Kampuchea Thmey Daily