ក្លិបសូលទីឡូអង្គរ សមាជិកពានរង្វាន់លីគកំពូលកម្ពុជា (Metfone Cambodian League) បានផ្លាស់ប្តូរគ្រូបង្វឹកក្រោយចប់រដូវកាលចាស់ឆ្នាំ២០១៨ កន្លងទៅដោយចែកផ្លូវជាមួយគ្រូបង្វឹកចាស់សញ្ជាតិជប៉ុន លោក Yuki Matsuda តែបន្តកិច្ចសន្យាថ្មីជាមួយលោក Darren Pomroy គ្រូបង្វឹកជនជាតិអង់គ្លេសវិញម្តង។
លោក Darren Pomroy បានបញ្ចេញទស្សនៈថាថ្នាក់ដឹកនាំពិតជាដើរតួយ៉ាងសំខាន់ដើម្បីអភិវឌ្ឍក្លិប ហើយវាពិតជា អស្ចារ្យណាស់បូកផ្សំនឹងកីឡាករនៅសល់នារដូវកាលមុន និង យុវជនក្មេងៗដែលនាំចូលក្លិប។ ក្រោយចូលបង្វឹកប្រហែលមួយខែ លោកបង្ហើបថាកីឡាករស្រេកឃ្លាននឹងជ័យជម្នះ និង ធ្វើឲ្យបានល្អនារដូវកាលថ្មី។
គ្រូបង្វឹកកាន់អាជ្ញាប័ណ្ណ AFC A License រូបនេះបានបញ្ជាក់ថា តួនាទីរបស់លោកគឺជួយក្រុម និង កីឡាករម្នាក់ៗឲ្យជឿជាក់លើការលេងរបស់ពួកគេ រួមទាំងការផ្ដល់ទំនុកចិត្តដល់ពួកគេផងដែរ។ កីឡាករម្នាក់ៗ ត្រូវតែក្លាហានក្នុងការលេងនៅលើទីលានក្រោមការបង្វឹករបស់លោក និង លេងរបៀបមួយបែបរបស់ក្រុម សូលទីឡូ។ លោកសង្កត់ធ្ងន់បែបនេះ៖«ខ្ញុំជឿជាក់យ៉ាងមុតមាំថា យើងចាប់ផ្ដើមអ្វីដែលពិសេសសម្រាប់ក្លិបរបស់យើង។ ការផ្លាស់ប្ដូរគឺត្រូវពឹងផ្អែកលើការហ្វឹកហាត់ និង តាក់ទិករបស់យើង ផ្សំនឹងសមត្ថភាពរបស់កីឡាករ»។
ចំពោះលោក Darren Pomroy ត្រូវបានស្គាល់ថា ជាគ្រូដែលមានបទពិសោធ និងជាពិសេសដឹងពីសមត្ថភាពកីឡាករនៅក្នុងខេត្តសៀមរាបផ្ទាល់ ខណៈលោកក៏ជាគ្រូបង្វឹកនៃក្លឹបពាក់កណ្ដាលអាជីព Next Step ដែលជាក្លឹបបណ្ដុះកីឡាករយុវជនជាច្រើនក្នុងខេត្តផងដែរ មុនផ្លាស់មកដឹកនាំក្រុមសូលទីឡូអង្គរ នេះ។
សូមបញ្ជាក់ថា ក្រុមសូលទីឡូអង្គរ កាលពីស្ថិតនៅក្រោមការដឹកនាំរបស់លោក Yuki Matsuda បានឈរនៅចំណាត់ថ្នាក់លេខ១០ ក្នុងចំណោមសមាជិកទាំង១២ក្នុងពានរង្វាន់លីគកំពូលកម្ពុជា រដូវកាលឆ្នាំ២០១៨ក្រោយរកបានជ័យជម្នះចំនួន៥ លើក ហើយធ្លាប់ស្មើ៥ លើកនិងចាញ់១២ លើកមាន២០ពិន្ទុ ដែលអាចបន្តក្នុងលីគកំពូលរដូវកាលបន្ទាប់ទៀត។ ចំណែកក្នុងពានរង្វាន់សម្តេចតេជោ ហ៊ុន សែន វិញក្រុមសូលទីឡូអង្គរ បានធ្លាក់ត្រឹមវគ្គ១៦ក្រុមចុងក្រោយ បន្ទាប់ពីចាញ់គូប្រជែងក្នុងខេត្តតែមួយគឺអង្គរថាយហ្គឺរ ដោយលទ្ធផលទាំង២ជើង៣ទល់២៕
Source: Kampuchea Thmey Daily
0 Comments