កីឡាករ ចាន់ វឌ្ឍនាកា អតីតសមាជិកក្លិបបឹងកេត និងជាសមាជិកក្នុងក្រុម ជម្រើសជាតិកម្ពុជា បានក្លាយជាសមាជិកផ្លូវការរបស់ក្លិបបាល់ទាត់PKNS (Kelab Bolasepak Perbadanan Kemajuan Negeri Selangor) ដែលឈរចំណាត់ថ្នាក់លេខ៣ឆ្នាំ២០១៨ ក្នុងពានរង្វាន់លីគកំពូលម៉ាឡេស៊ី (2018 Malaysia Super League) សម្រាប់ត្រៀមប្រកួតរដូវកាលថ្មីឆ្នាំ២០១៩ ខាងមុខ។
នៅរសៀលថ្ងៃសុក្រ សប្ដាហ៍នេះក្លិប PKNS បានបង្ហាញសមាជិកថ្មីរបស់ខ្លួនចំនួន២នាក់ដែលសុទ្ធសឹងជាកីឡាករបរទេសដោយក្នុងនោះមានកីឡាករ ចាន់ វឌ្ឍនាកា របស់កម្ពុជា បំពេញក្នុងកូតារកីឡាករអាស៊ាន និងកីឡាករជនជាតិអាហ្សង់ទីនGabriel Miguel Guerra ដែលខ្ចីជើងពីក្លិបBoca Juniors B របស់អាហ្សង់ទីន ខណៈកីឡាកររូបនេះធ្លាប់ចូលរួមជាមួយក្រុម PKNS ម្តងរួចមកហើយកាលពីរដូវកាល២០១៥-២០១៦កន្លងទៅ។
នៅក្នុងសន្និសីទសារព័ត៌មានកីឡាករ ចាន់ វឌ្ឍនាកា បានតាំងចិត្តនឹងធ្វើឲ្យបានល្អនិងប្រឹងប្រែងជួយក្រុមថ្មី PKNS ក្នុងរដូវកាលថ្មីខាងមុខឲ្យអស់ពីសមត្ថភាព។ កីឡាកររបស់កម្ពុជារូបនេះបន្តថា រូបគេចូលរួមជាមួយក្លឹបនេះ ដោយសារក្លិបនេះមានលក្ខន្តិកៈល្អប្រសើរ ជាក្លឹបល្អខ្លាំងមួយនៅលីគម៉ាឡេស៊ី ដូច្នេះរូបគេពេញចិត្តមកទីនេះ និងស្វែងរកបទពិសោធបន្ថែមទៀត។ រូបគេជាកីឡាករកម្ពុជាទី២ ដែលប្រកបអាជីពនៅប្រទេសម៉ាឡេស៊ី រដូវកាលនេះបន្ទាប់ពីកីឡាករ ធារី ចន្ថាប៊ីន។
សូមរំលឹកថា ថ្មីៗនេះយោងតាមការចេញផ្សាយរបស់សាព័ត៌មានម៉ាឡេស៊ី បានបញ្ជាក់ថាលោកDatuk K. Rajagobal ដែលជាគ្រូបង្វឹករបស់ក្រុម PKNS បានសម្លឹងមើលកីឡាករ ចាន់ វឌ្ឍនាកា របស់កម្ពុជា និងកីឡាករGabriel Quak របស់សឹង្ហបុរី ដើម្បីចូលរួមក្នុងក្រុមបំពេញកូតារកីឡាករអាស៊ានក្នុងរដូវកាលថ្មីឆ្នាំ២០១៩ ឆាប់ៗនេះ។ ប៉ុន្តែទីបំផុតកៅអី១នេះគឺបានមកលើកីឡាករ ចាន់ វឌ្ឍនាកា របស់កម្ពុជាតែម្តង។
សូមបញ្ជាក់ថា កីឡាករ ចាន់ វឌ្ឍនាកា ជាអតីតយុវជនរបស់ក្លិបព្រះខ័នរាជស្វាយរៀង (ព្រះខ័នរាជ) ដែលចាប់អាជីពដំបូងកាលពីឆ្នាំ២០១១ នៅក្នុងឈុតធំក្រុមនេះ ស្របពេលនៅឆ្នាំ២០១២ រូបគេបានផ្ទេរទៅកាន់ក្លិបបឹងកេត រហូតដល់ចុងឆ្នាំ២០១៦ មុនចេញទៅជប៉ុន ដោយចូលរួមជាមួយក្លិប Fujieda MYFC សមាជិកពានរង្វាន់លីគលំដាប់ទី៣ (J3-league)។ នៅដើមឆ្នាំ២០១៨ ក្រោយចប់កិច្ចសន្យានៅប្រទេសជប៉ុន ចាន់ វឌ្ឍនាកា បានបន្តដំណើរទៅប្រទេសម៉ាឡេស៊ី ជាមួយ Pahang FA តែពាក់កណ្តាលរដូវកាលបានត្រឡប់មកចូលរួមជាមួយក្រុមបឹងកេត របស់កម្ពុជា វិញម្តង។
រូបគេធ្លាប់ឈ្នះពានរង្វាន់ឯកជនជាច្រើនទៀតដូចជាពានរង្វាន់កីឡាករវ័យក្មេងឆ្នើមប្រចាំឆ្នាំ២០១២ ដែលផ្ដល់ដោយគណៈកម្មាធិការជាតិអូឡាំពិកកម្ពុជា នៅឆ្នាំ២០១៣ ឈ្នះស្បែកជើងមាស ក្នុងពានរង្វាន់សម្តេចតេជោ ឆ្នាំ២០១៤ ឈ្នះពានកីឡាករល្អប្រចាំពានរង្វាន់លីគកំពូលកម្ពុជា ហើយឆ្នាំ២០១៥ រក្សាពានរង្វាន់កីឡាករឆ្នើមប្រចាំពានរង្វាន់លីគកំពូលកម្ពុជា និងជាម្ចាស់ស្បែកជើងមាសប្រចាំរដូវកាលនិងស្បែកជើងមាសក្នុងពានរង្វាន់ Toyota Mekong Club Championship 2015។ នៅឆ្នាំ២០១៦ រូបគេរក្សាពានរង្វាន់កីឡាករឆ្នើមប្រចាំពានរង្វាន់លីគកំពូលកម្ពុជា និងជាម្ចាស់ស្បែកជើងមាសប្រចាំរដូវកាលបានដដែល៕
Source: Kampuchea Thmey Daily
0 Comments